Matiyu 12:32 - Hanunuu

³² Una si unu ti bumagaw laban sa Anak Tawu may patawad di dapat ti tawu nu magbagaw laban sa Ispiritu Banal udyi patawadun, una sa kainda katpung pag panahun una hanggan waya aban.”

Matiyu 12:32 Iomraidhean Croise

Hub 36:13

Ti manga balaw maka-diyus maghamnu galit sa kanda tagipusuun, ag una pagparusahan sida Diyus, unman sida maghagad awat sa kanya.

Matiyu 11:19

Pagka nagsitay aku, ti Anak Tawu, magkaun mag-inum diman bag-u pagkumnun nida, ‘Malu tunda pag tawu daluk-daluk maglangu, mag-ampud siya sa manga manunukut buhis, hanggan sa iba waya ka manga makasalanan.’ Ti pagbuwatun kadunungan Diyus imaw ti puruyba sa katutuuhanan.”

Matiyu 12:31

Nakan ngani kang pagsabihun sa kanyu, patawadun di Diyus ti manga tawu una hintay kanda kasalanan una kanda magmuransa, dapat unman patawadun ti tawu magmuransa sa Ispiritu Banal.

Matiyu 12:8

Dahil ti Sirang Pamahari sa sirung kapangyarihan Anak Tawu.”

Matiyu 13:22

Tunda waydi pag nipamgas sa madugihan ipinahalimbawa sa tawu magpatingi sa Bagaw Diyus dapat makasadili siya sa manga bagay sa babaw daga, mairibgun yi siya sa manga kayamanan, nakan ti Bagaw Diyus udyi may rugar sa kay tagipusuun, udyi binmurak.

Matiyu 13:39

Tunda ngani pag kalaban ti nagsabug manga ilamnun imaw yi ti diyablu. Ti udas tig-arani imaw yi ti katapusan kalibutan. Ti manga anghil ti umani.

Matiyu 13:40

Nu kabitay pag tipunun ti manga ilamnun bag-u sunugun, katunda ti mangyari aban katpung katapusan kalibutan.

Matiyu 13:55

Unman aw anak siya panday? Unman aw kay ngaran niya ina si Marya? Unman aw sida ni Santiyagu, ni Husi, ni Simun, ni Hudas kay manga patar-ari lalaki?

Matiyu 8:20

Magkun si Hisus sa kanya, “May ulian ti manga simarun idu sa manga basad lukib, may pugad ti manga manuk, dapat aku, ti Anak Tawu, unman may paraharyan.”

Markus 10:30

makatanggap siya usa ka gatus maan kay tulus sitay sa babaw daga, manga ulian, manga patar-ari lalaki, patar-ari babayi, manga ina, manga anak, manga daga, may patapil waya manga pag-unuunu. Ag aban makatanggap siya buhi unman may katapusan.

Markus 3:28

“Ungud duy kang pagsabihun sa kanyu, patawadun di Diyus ti manga tawu una hintay kanda manga kasalanan, una waya sida nagmuransa laban sa Diyus.

Markus 3:29

Nu bay pagmuransahun tawu ti Ispiritu Banal, unman gid patawadun siya hanggan aban. Tunda pag kasalanan niya unman mab-ul hanggan aban.”

Lukas 12:10

“Una si unu ti bumagaw laban sa Anak Tawu may patawad di. Dapat ti tawu nu maglapastangan laban sa Ispiritu Banal balaw yi patawadun.

Lukas 16:8

“Nagdayaw kay amu sa tunda pag katiwala maradaya, dahil madunung siya magparaan. Dahil ti manga tawu taga kalibutan masyadu gid madunung magparaan sa kanda magpasundu sa kanda manga kaparihu, subra man sida madunung sa manga tawu nakaintindi tungkul sa Diyus.”

Lukas 18:30

mas lalu mayamu waya ti ipakaun maan sa kanya sitay sa babaw daga, ag aban buhi unman may katapusan.”

Lukas 23:34

Sinabi ni Hisus, “Amang, patawada duy nimu sida, dahil unman nida alam kanda pagbuwatun.” Bag-u kanda inayaw-ayaw kay manga rutay ni Hisus, kanda waya alinaban sa lunggungan.

Lukas 7:34

Aku diman, ti Anak Tawu, nagsitay magkaun di mag-inum, dapat kanyu pagbangdanan mahugud sa karan-an palalangu, mag-ampud siya sa manga manunukut buhis, sa manga makasalanan.

Huwan 7:12

Paglibakun yi siya mayamu tawu. Magkun ti iba, “Mayad gid pag tawu siya.” Ti iba magkun, “Bukun ngap mayad tunda, pagpatalangun ngap niya ti kayamuan tawu.”

Huwan 7:39

Kay pagtukuyun ni Hisus ti Ispiritu ti matanggap manga tawu nu sida magsarig sa kanya. Ati katpung udwaya ipinakaun ti Ispiritu dahil udwaya nangyari una kay pagkamatay ni Hisus una kay pagkabuhi uman may kadayawan.

Huwan 7:52

Magkun ti manga iba sa kan Nikudimu, “Kawu lugud taga Galiliya diman aw waydi? Suyasida gid nimu ti Banal Kasuratan, bag-u maalaman nimu unman may purupita lumuwang ginan sa Galiliya.” [

Binwat 3:19

“Nakan duy patlikudi yi niyu kanyu manga kasalanan bag-u pag-atubang yi sa Diyus hampay duraun yi niya kanyu kasalanan,

Ipisu 1:21

Nakan ngani ti tanan manga naminunu, manga may kangaranan, manga kamaskihan hanggan manga magpamahala, una sa babaw daga una sa langit, sa sirung di kamaskihan ni Kiristu. Subra kay ngaran ni Kiristu balaw lang ga iba ngaran, balaw lang sa taynguna hanggan sa paratabgan.

1 Timutiyu 1:13

Madi kaybi waya kang linapastangan, inunu-unu ag unman diman waydi pinahalgaan niku siya. Dapat kinaawaan di gid aku Diyus dahil tunda kang binwat kaybi kang udwaya nakaalam ag udwaya may pagsarig sa kanya.

1 Timutiyu 1:15

Tutuu ti pagsabihun ag kailangan paniwalaan tanan tawu magkun, “Nakan nagsitay si Kiristu Hisus sa kalibutan hampay iribri ti manga makasalanan.” Ag aku ngap ti takinan manga makasalanan.

1 Timutiyu 4:8

May pakinabang diman nu magpaantigu ti bilug. Dapat lalu waya may pakinabang nu mangungud kita kanta bilug hanggan tagipusuun sa kanta turunu marapasakup sa Diyus. Dahil nu katida kita pag mag-ugali, may patabgan di kita kaayadan balaw lang sa kainda pag buhi, lalu waya sa ikadwa pag buhi.

1 Timutiyu 6:17

Sabihi nimu ti manga mayaman, danga magpalabaw-labaw. Danga sida magsarig sa kanda kayamanan dahil tunda magkadura di. Bagkus ngap pagsarig sida sa Diyus, imaw ti abunda pag manugpakaun tanan bagay sa ikabaya nita.

2 Timutiyu 4:10

Dahil tinayakan yi aku ni Dimas. Ipinalabi di niya ti bagay sa kalibutan. Ati yi siya sa Tisalunika. Si Kirisinti nag-ati sa Galasya. Si Titu waydi ati sa Dalmasya.

Titu 2:12

Inda pag pangaawa ti magbutung sa kanta hampay tayakan ti daut pag ugali hanggan ti irisipun makasadili angay sa ugali kalibutan. Bag-u makaugali kita mahusay, matadlung ag angay sa kagustuhan Diyus sitay sa kalibutan.

Santiyagu 1:27

Kainda ay di ti pagkamatadlung ti kailangan ag pagbayaun nita Diyus Ama, nu ti tawu mag-awat sa manga ilu hanggan sa manga babayi buranday sa kanda kakurian, ag nu mainingatun siya sa kay sadili bilug hampay balaw madara sa daut pag ugali kalibutan inda.