Manugtudlu 7:14 - Hanunuu

¹⁴ Nu mayad kanmu kahamtangan, pagbaya kawu. Dapat nu asan kawu sa kakurian, alalahana ti Diyus balaw lang magpakaun mayad pag kahamtangan nu unman kakurian diman. Nakan unman nita maalaman nu hintay ti mangyari sa aratubangun.

Manugtudlu 7:14 Iomraidhean Croise

1 Hari 8:47

nu sa uryan manbag-u kanda manga tagipusuun ati sa rugar binihag, bag-u mag-ampu sida ag manpaawa-awa sa kanmu magkun, ‘Nagkasala kami, ag daut kanmi manga binwat,’

Hub 2:10

Sinmagut si Hub, “Magpakabagaw lang kawu sa unman may pulus. Kay lunsay mayad lang aw lugud pag bagay ti tanggapun nita ginan sa Diyus bag-u dayu kay daut?” Dapat una katida ti nangyari, balaw gid nagsalan si Hub sa pagbagaw daut.

Kanta 119:71

Mayad pinarusahan nimu aku, dahil sa panab-anan inda nakaalam aku sa kanmu manga tudlu.

Kanta 40:3

Tinudluan niya aku bag-u pag kanta, kanta pagdayaw sa kanya, sa kanta Diyus. Mayamu pag tawu ti kumakit inda, gumalang sida ag sumarig sa kanya.

Manugtudlu 10:14

Ag unman siya mag-apas magbagaw. Unman may nakaalam tungkul sa manga mangyari sa patabgan, nakan unman may makasabi nu hintay ti mangyari nu kita tigbak yi.

Manugtudlu 11:9

Kamu pag kalay-awan, pagbaya kamu habang anak waya. Buwata niyu kanyu pagkaibgan buwatun, dapat alalahana niyu parusahan kamu Diyus angay sa kanyu binwat.

Manugtudlu 12:13

Taynguna nabasa nimu inda tanan, inda kang uryan patigayun: Paggalang kawu sa Diyus ag sunda kay manga sugu, dahil imaw inda ti katungkulan kada tawu.

Manugtudlu 12:8

Aku ti manugtudlu magkumun, “Unman gid may pulus! Unman gid may pulus ti tanan!”

Manugtudlu 3:22

Nakan naisip niku ti pinakamayad buwatun tawu imaw ti pagbaya sa kay binudlayan, dahil para diman waydi inda sa kanya. Unman may makasabi sa tawu nu unu ti mangyari nu tigbak yi siya.

Manugtudlu 3:4

may udas sa paglumi ag may udas diman sa pagkasari, may udas sa manghimanglaw ag may udas diman sa pagbaya,

Manugtudlu 5:17

Kanta buhi lunsay kakurian, kaguluhan, panakitun ag pangagalit.

Manugtudlu 8:7

Dahil unman may tawu nakaalam sa aratubangun, unman may makasabi una si unu nu hintay ti mangyari.

Manugtudlu 9:7

Sigi, pagkaun kawu ag pag-inum intus pag may kabayaan, dahil ipinahintulut yi Diyus kaybi di waya inda kanmu buwatun.

Isayas 26:11

Panginuun, alistu yi duy kawu pumarusa sa kanda, pat-ay balaw nida alam. Paandami nimu sida, Panginuun. Pakay-aha sida. Ipakakit nimu sa kanda nu kabitay nimu kamahal kanmu manga nasakupan. Rurisun nimu sa panab-anan apuy kanmu manga kalaban.

Isayas 42:25

Nakan ngani, ipinasamit Panginuun ti masyadu niya pag pangagalit sa kanta sa panab-anan pagpakuri sa kanta sa girahan. Kay pangagalit parihu sa apuy nagsangput, mag-irub sa kanta, dapat balaw nita inda pinansin aw ngatay inisip.

Hirimyas 23:20

Balaw gid madura kang pangagalit tugka sa unman niku magkabuwat kang gustu buwatun. Ag sa uryan sirang, lubus niyu masalman inda.

Karukuan 3:38

Unman aw ti Kaabwat-abwatan pag Diyus ti mag-udyuk nu mangyari ti usa ka daut ngatay mayad pag bagay?

Mikas 6:9

Patingihi niyu ti pagsabihun Panginuun sa banwa Hirusalim, dahil ti maggalang sa kanya imaw ti may tutuu pag kadunungan. “Kamu pag manga nibilang sa lahi ni Huda, pagtiripnan kamu sa banwa Hirusalim ag pagpatingi.

Matiyu 9:13

Paglakaw yi kamu, isipun niyu inda kay pagkumnun Diyus, ‘Kang gustu pagmaawaun kamu ag balaw kanyu handug.’ Nagsitay aku hampay butungun ti manga makasalanan, balaw ti manga matadlung.”

Binwat 14:22

Pinarig-un nida ti manga patar-ari, pinaanyuan danga sida umurung sa kanda pagsarig sa Panginuun. Nanudlu waya sida sa manga patar-ari magkun, “Dayu maamanan nita ti mayamu pag kakurian bag-u kita makapasakup sa kay paghari Diyus aban.”

Diyuturunumiyu 26:11

Bag-u pagbarayaan kamu dahil sa mayad pag manga bagay ti pag-ipakaun Panginuun niyu Diyus sa kanyu hanggan sa kanyu magtal-anakan. Iminsan diman niyu sa kanyu mag-alaala ti manga Libita hanggan ti manga day-uhan mag-uli kaibahan niyu.

Diyuturunumiyu 28:47

Dahil balaw kamu nagsirbi may kabayaan ag kasulungan sa Panginuun niyu Diyus sa udas niyu kaabundahan,

Diyuturunumiyu 8:3

Ipinakumbaba niya kamu sa panab-anan pagpalun-us sa kanyu bag-u pinakan-an niya kamu mana — usa ka kalasi karan-unun unman waya gid niyu nasamitan una hanggan niyu manga ginurang. Binwat inda Panginuun hampay itudlu sa kanyu balaw lang sa karan-unun pag magkabuhi ti tawu, nu unman sa kada bagaw Panginuun.

Diyuturunumiyu 8:5

Kailangan isipun niyu nu kabitay ti ama magtamyaw sa kay anak, ti Panginuun niyu Diyus katunda diman magtamyaw sa kanyu.

Santiyagu 5:13

May tiriisun aw una si unu sa kanyu? Pagdarangin siya. May magbaya aw? Pagkanta siya pagdayaw sa Diyus.