Lukas 5:30 - Hanunuu

³⁰ Ti manga Parisiyu hanggan manga manugtudlu Kasuguan nagsungyaw sa kay manga tuludluan ni Hisus magkun, “Hayga duy kamu magkaun mag-inum minsan sa manga manunukut buhis hanggan sa manga makasalanan?”

Lukas 5:30 Iomraidhean Croise

Isayas 65:5

Magkun sida tag sa iba, ‘Danga kawu magpakarani sa kangku barang aku mayagtingan. Mas banal aku kaysa kanmu!’ Magkasamuk aku sa katunda pag manga tawu. Ag kang pangagalit sa kanda ga apuy maglabdaban sa buu malambung.”

Matiyu 5:46

Nu madunung kamu magmahal sa manga magmahal lang waydi sa kanyu, hintay waya pag pirimyu kanyu matanggap? Unman aw katida diman ti pagbuwatun manga manunukut buhis?

Matiyu 9:11

Pagka nakitan manga Parisiyu kanda magsararuhan, pinaingana nida kay manga tuludluan ni Hisus magkun, “Hayga magsaru kanyu maisturu sa manga manunukut buhis hanggan sa manga makasalanan?”

Markus 2:16

May manga Parisiyu ati, manga Manugtudlu ngani Kasuguan. Pagka nakitan nida si Hisus magkaun kay kasaru manga makasalanan hanggan manga manunukut buhis, sinabi nida sa kay manga tuludluan magkun, “Magkaun mag-inum aw siya kay kasaru manga manunukut buhis ag manga makasalanan?”

Markus 7:3

Ti manga Hudiyu lalu ti manga Parisiyu pag Hudiyu, balaw kadaka sida magkaun nu unman mangugas dapu kanda manga kamang angay sa ibinilin nida manga kaumputan.

Markus 9:16

Bag-u pinaingana niya sida magkun, “Hintay kanyu pag-ikadaut sa kanda?”

Lukas 18:11

Matindugan ti Parisiyu magdarangin sa kay sadili magkun, ‘Diyus, magpasalamat aku sa kanmu, dahil balaw aku ga iba pag tawu, balaw aku magtakaw, balaw aku maradaya, balaw aku marauragin, balaw diman aku ga tunda pag manunukut buhis.

Lukas 19:7

Pagka nakitan manga tawu si Hisus sinmaka sa kan Sakiyu balay, naglibak sida magkun, “Siya maaw manhapit sa balay makasalanan.”

Lukas 5:17

Pagka dugay nagtudlu maan si Hisus. May manga matukawan ati manga Parisiyu hanggan manga manugtudlu Kasuguan, nagluwang sida ginan sa kada banwa sa Galiliya hanggan Hudiya ag hanggan ginan sa Hirusalim. Ti kapangyarihan Panginuun lubus sa kan Hisus hampay paayadun ti may manga sakit.

Lukas 5:21

Dapat ti manga manugtudlu Kasuguan hanggan ti manga Parisiyu nanharampangan yi magkun, “Hintay nguna inda pag tawu, hayga palabi-labihun siya sa Diyus? Unman may makapatawad sa kasalanan nu unman ti Diyus lang.”

Lukas 7:34

Aku diman, ti Anak Tawu, nagsitay magkaun di mag-inum, dapat kanyu pagbangdanan mahugud sa karan-an palalangu, mag-ampud siya sa manga manunukut buhis, sa manga makasalanan.

Lukas 7:39

Siyun diman ti Parisiyu ti nagbuul sa kan Hisus. Pagka nakitan niya ti binwat babayi, inisip niya, “Nu tutuu purupita inda pag tawu, alam gid mana niya nu si unu ag nu hintay pag kalasi babayi siya tigpayid sa kay lulud, dahil makasalanan pag babayi siya.”

Binwat 23:9

Nakan nanriringgitan yi gid sida. Pagka dugay may tinmindug manga manugtudlu Kasuguan, manga Parisiyu waydi. Mahigpit sida nangatadlungan magkun, “Unman gid may nakitan kami kasalanan sa inda pag tawu. Barang ungud may nagbagaw sa kanya una anghil una ispiritu.”