Lukas 15:24 - Hanunuu

²⁴ Dahil sitay kang anak tigbak, dapat nabuhi uman. Kabag-u nadura, dapat nakitan maan.’ Nakan nagbaya gid sida.

Lukas 15:24 Iomraidhean Croise

Gimpuunan 45:28

Magkun si Hakub, “Magpasnu yi aku! Buhi waya kang anak si Husi. Atihan niku siya bag-u aku mamatay.”

Isayas 35:10

Tunda pag manga irinibri Panginuun bumalik magkarantahan sa Siun. Madura yi kanda karukuan hanggan maghimanglaw, matulsan yi tunda unman may katapusan pag kasulungan.

Isayas 66:11

hampay malakawan niyu ti kaabundahan parihu sa lapsag magsusu sa kay ina magkabsug.

Isikil 34:16

Hanapun niku tunda pag manga nagkaradura hanggan nagtaralalang. Bugkusan niku ti manga may biyag hanggan pabisugun niku ti manga malumuy. Dapat ipadamhak niku ti manga matabul hanggan mabaskug. Buwatun niku sa kanda nu unu ti matadlung.

Isikil 34:4

Unman niyu pagpabaskugun ti manga malumuy sa kanda. Unman niyu pagbulungun ti manga may sakit ngatay pagbugkusan ti manga may bari. Unman niyu paghanapun ti manga nagtalang ngatay ti manga nadura. Bagkus ngap, inunu-unu waya niyu sida.

Matiyu 8:22

Dapat magkun si Hisus sa kanya, “Pagkuyug kawu sa kangku, ipiyar nimu sa unman may manga buhi ti lumubung sa manga namatay.”

Markus 8:22

Pagka rinmas-ug sida ni Hisus sa Bitsayda pag banwa, may manga tawu nagdara tag sa kan Hisus usa ka tawu buta, nagpakihampang sa kan Hisus hampay kay kup-an kamang.

Lukas 10:19

Malu, inintirga yi niku kang kamaskihan sa kanyu hampay tat-an niyu ti manga ulay hanggan alutatip, hampay manalu kamu sa tanan kamaskihan ni Satanas ag unman may makadisgarasya sa kanyu.

Lukas 15:23

Bul-a niyu kanta pinatabul pag ibun baka, iyawa niyu bag-u kita mangaun hampay masulung gid.

Lukas 15:25

“Ati katpung kay anak panganay ati di sa kay tanman. Sa kay mag-uli pagka arani yi sa balay, nadnugan niya kanda manga giritarahan hanggan sayawan.

Lukas 15:32

Dapat kailangan kita magbaya gid ag masulung lubus, dahil sitay tigbak kanmu ari ag taynguna buhi yi maan. Sitay nadura ag kainda nakitan maan.’ ”

Lukas 15:4

magkun, “Halimbawa ti usa sa kanyu may karanidu usa ka gatus bag-u naparaw kay usa ka bilug. Unman aw lugud tayakan niya ti siyampulu may siyam ka karanidu sa pasturan hampay hanapun niya tunda pag nadura hanggan sa ud makitan?

Lukas 19:10

Dahil aku, ti Anak Tawu, nagsitay hampay hanapun ag iribri ti nadura.”

Lukas 9:60

Dapat sinabi ni Hisus sa kanya, “Ipiyar nimu sa unman may manga buhi ti lumubung sa manga namatay. Dapat pag-ati kawu, ibarita nimu sa manga tawu magkun, Diyus ti maghari sa tanan bagay.”

Huwan 11:25

Bag-u sinabi ni Hisus sa kanya magkun, “Sa kangku gid ginan duy pag mabuhi uman ti tawu. Aku diman ti gimpuunan buhi. Una abi mamatay ti tawu, nu siya magsarig sa kangku, balaw maduraan siya buhi.

Huwan 5:21

Dahil nu kabitay pagbuhiun uman Ama ti manga namatay, katunda diman waydi pagbuhiun uman Anak una hintay pag tawu kay gustu buhiun uman.

Ruma 11:15

Pagka sida dinayu Diyus bag-u pinaunyun ngap Diyus ti manga nasyun taga kalibutan tabug sa kanya. Nu bay tanggapun maan Diyus ti manga Hudiyu, tunda ga magpakaun buhi sa namatay.

Ruma 12:15

Pagpakibagay kamu sa manga magbaya, pagpakibagay diman sa manga maglumi.

Ruma 6:11

Katunda diman kailangan kilalan-un niyu kanyu sadili tigbak yi sa kasalanan, dapat buhi ngap para sa Diyus dahil sa kanyu pakiusa sa kan Kiristu Hisus.

Ruma 6:13

Danga niyu ipasakup sa kapangyarihan kasalanan una naan pag bahagi bilug niyu para gamit sa kadautan. Bagkus ngap pasakup kamu sa Diyus. Kamu pag manga namatay yi ag binuhi uman, ipakaun niyu sa Diyus kanyu buu pagkatawu hampay gamit yi sa katadlungan.

Ruma 8:2

Udyi kita sakup sa kapangyarihan kasalanan hanggan kamatayan, dahil ti kapangyarihan Ispiritu ti nagparibri sa kanta, imaw diman ti magpakaun buhi. Inda pag kaayadan matanggap nita dahil lang sa kanta pakiusa sa kan Kiristu Hisus.

1 Kurintu 12:26

Nu ti usa ka gamit bilug may mag-asaydan, ti tanan gamit minsan sa kanya magdungug kakurian. Nu ti usa ka gamit bilug pagdayawun, ti tanan manga gamit parihu magbaya minsan sa kanya.

Ipisu 2:1

Kamu pag manga patar-ari balaw Hudiyu, kaybi kamu manga tigbak dahil sa kanyu maglaban sa Diyus ag dahil sa kanyu kasalanan.

Ipisu 2:5

Una kaybi kita manga tigbak dahil sa kanta paglaban sa Diyus, dapat binuhi niya kita kaibahan ni Kiristu. Naribri kamu dahil lang sa kay mayad nabubut-un Diyus.

Ipisu 5:14

Dahil karayawan yi ngani tigpakilala sa tanan. Nakan ngani pagsabihun magkun, “Pag-imata yi kawu ginan sa katurugan, pagkabuhi yi kawu ginan sa kamatayan, rayawan yi kawu ni Kiristu.”

Kulusas 2:13

Kamu pag manga balaw Hudiyu, daan ga tigbak kamu sa kanyu tagipusuun dahil sa kanyu kasalanan ag dahil kamu balaw sakup sa Kasuguan, dapat binuhi uman kamu Diyus kaibahan ni Kiristu. Pinatawad yi kita sa kanta tanan pag manga kasalanan.

1 Timutiyu 5:6

Dapat ti buranday nu mag-ugali sa parabayain, isipa yi lang siya ga namatay.

Hudas 1:12

Daka gid pag kakay-ahan niyu, pagbul-an yi halaga kamu sa kanda magpaminsan sa kanyu karan-an magtar-arian, dahil aranghadu sida sa magkaun. Unman sida may pag-isipun nu unman kanda lang sadili. Sida ga manga rurum pagdarahun durus dapat unman waydi may ipakaun uran. Sida ga manga puun kayu unman magburak una mana kay udas mamurak, naayit una gamut, ungud namatay yi.

Ipinakakit 3:1

“Isurat nimu inda para sa anghil magbantay sa iglisya sa banwa Sardis: “Inda ti magsabi imaw yi ngani ti may pitu ka Ispiritu Diyus hanggan pitu ka pamgasan: Alam diman waydi niku kanmu pagbuwatun. Nu sa magbantay manga tawu kawu buhi dapat nu sa ungud kawu ga tigbak yi.