Lukas 1:32 - Hanunuu

³² May kadayawan aban siya ag ingarnan aban siya Anak Diyus Makamaskihan sa Tanan. Pakan-an siya aban Panginuun Diyus karampatan maghari ga kay ginurang diman kan Dabid.

Lukas 1:32 Iomraidhean Croise

2 Samwil 7:16

Pumarargu kanmu kaharian hanggan aban; kanmu linahi pumarargu humari sa unman may katapusan.’ ”

Kanta 132:11

Nagtaratu kawu kaybi kan Dabid, ag pihu tupadun nimu ag balaw bawiun. Magkun kawu: “Ti usa sa kanmu manga linahi paublusun niku sa kanmu bilang hari.

Kanta 132:12

Nu tupadun nimu manga linahi manga hari kang kasunduan hanggan ti manga tudlu niku itinudlu sa kanda, kanda manga linahi humari diman tugka aban.”

Isayas 16:5

Ag humari ti usa sa manga linahi ni Dabid matinupadun ag may pagmahal. Ipalantap niya ti katadlungan sa kay magpihu. Sigidas siya sa pagbuwat matadlung.

Hirimyas 17:25

papaladan niku kamu. Pirmi kamu magkaimaw hari sitay sa Hirusalim ginan sa linahi ni Dabid. Sida hanggan ti manga pinunu manparada masakyan sa manga kalisa hanggan manga kabayu pasulud sa puwirtahan banwa kaibahan ti manga taga Huda hanggan taga Hirusalim. Inda pag banwa Hirusalim pumirmaminti hanggan aban.

Hirimyas 22:2

Hari Huda, linahi ni Dabid, patingihi inda pag tultulanun Panginuun. Pagpatingi diman kanmu manga takinan hanggan nasakupan maglawuy sitay pag manga puwirtahan.

Danyil 2:44

“Sa ati pag panahun manga hari, ti Diyus sa langit pumatindug usa ka kaharian unman gid magpu hanggan aban. Balaw gid inda matalu iba kaharian, nu unman papasun waya ngap niya ti tanan kaharian ag pihu pumirmaminti inda hanggan aban.

Matiyu 1:1

Inda ti listahan gimpuunan lahi ni Hisu-Kiristu, ginan sa linahi ni Dabid, ginan diman waydi sa linahi ni Abraham.

Matiyu 12:42

Sa ati katpung pag udas aban ti Rayna ginan sa salatan baliwa kumastigus laban sa kanyu, dahil nagluwang siya ginan sa puun langit hampay patingihan kay kadunungan ni Sulumun. Dapat balaw di ga kan Sulumun ti nagsitay kainda sa kanyu.”

Matiyu 28:18

Nagpakarani si Hisus bag-u sinabi niya sa kanda magkun, “Ipinakaun sa kangku ti tanan karampatan sa langit hanggan sa babaw daga.

Matiyu 3:11

Tutuu kamu kang pag-itulbaw sa danum tanda sa kanyu nag-ampu sa kasalanan. Dapat ay may dumasun sa kang uryan lalu man makamaskihan sa kangku. Unman aku may karampatan magdara kay lapak. Siya di ti tumulbaw sa kanyu sa Ispiritu Banal hanggan sa apuy.

Markus 14:61

Dapat unman nag-ingay si Hisus, unman gid siya nagsagut. Pinmaingana maan ti Pangulu Manug-asiwa Balay Diyus magkun, “Kawu aw ti Pinili Diyus Manugribri pag Hari, ti Anak makapangyarihan pag Diyus?”

Markus 5:7

Kay irininggit daka magkun, “Hintay kanmu labut sa kangku, Hisus, kawu ti Anak Diyus makamaskihan sa tanan. Alang alang sa Diyus, danga pakurian nimu aku.”

Lukas 1:15

Dahil may kamaskihan siya aban sa atubangan Panginuun. Danga uminum siya intus, una hintay pag manga makalangu pag irinmun. Ginan di waya sa sulud tiyan niya ina sa kanya yi ti Ispiritu Banal.”

Lukas 1:35

Sinmagut ti anghil magkun, “Pumakababa tag sa kanmu ti Ispiritu Banal, humamuy sa kanmu ti kapangyarihan Diyus Makamaskihan, nakan ti anak ianak aban pagsabihun banal, ti Anak Diyus.

Lukas 1:76

Kawu duy anak, ingarnan kawu purupita Diyus Makamaskihan sa Tanan. Sapagka kawu ti un-an umuna bag-u ti Panginuun dumasun sa kanmu. Kawu nakan ti humanda dalan Panginuun.

Lukas 3:16

Dapat sinabi ni Huwan sa kanda tanan magkun, “Ungud ngani kamu kang pag-itulbaw sa danum. Dapat may rumas-ug makamaskihan man sa kangku. Unman may karampatan aku maglubad panhigut niya manga lapak. Itulbaw niya kamu aban sa Ispiritu Banal hanggan sa apuy.

Lukas 6:35

Dapat mahala niyu kanyu manga kalaban, pakan-an niyu sida mayad, pagpaudam kamu danga yi magsarig kuntay ulian kamu. Nu katunda, daka pag pirimyu kanyu tanggapun ag kilalan-un kamu manga anak Makamaskihan pag Diyus. Dahil magbaya siya una sa manga tawu unman may pasunaid ag makasalanan.

Huwan 12:34

Nagsabi ti manga tawu sa kanya magkun, “Naalaman nimi sa kanmi Kasuguan magkun, ti Pinili Diyus Manugribri pag Hari unman gid mamatay hanggan aban. Kabitay duy kanmu pagsabihun kuntay kailangan mamatay ti Anak Tawu? Si unu nguna tunda pag Anak Tawu?”

Huwan 6:69

Nagsarig duy kami sa kanmu, dahil nakilala nimi kawu ti Banal pag sugu ginan sa Diyus.”

Binwat 16:17

Magpakadasun tunda pag babayi suruguun sa kanmi ni Pablu magpakatawag magkun, “Inda pag manga tawu ti suruguun Diyus Makamaskihan sa tanan. Magtudlu sida sa kanyu nu kabitay kamu pag makakit karibrihan.”

Binwat 2:30

Siya purupita nakan naalaman niya may marig-un pag taratu ti Diyus sa kanya magkun, ginan sa kay linahi usa aban ti humari parihu sa kanya.

Binwat 2:36

“Nakan ngani kamu ti buu nasyun Israil, pagpasnui yi niyu kuntay tunda pag Hisus kanyu ipinaku sa kurus imaw ngap ti binwat Diyus Panginuun. Siya yi ti Pinili Diyus Manugribri pag Hari.”

Binwat 7:48

“Dapat ay ti Diyus, ti Makamaskihan sa tanan, unman mag-uli sa manga balay binwat manga tawu. Parihu sa kay sinabi purupita magkun,

Ipinakakit 3:7

“Isurat nimu inda para sa anghil magbantay sa iglisya sa banwa Piladilpiya: “Inda ti magsabi imaw yi ngani ti banal ag masarigan, ti may bitbit susi ni Hari Dabid. Nu siya ti nagbukas unman may makasiradu. Unman waydi may makabukas nu siya ti nagsiradu: