Libitiku 4:3 - Hanunuu

³ Nu pangulu manughandug ti nagkasala balaw tikis, ag dahil siyun nadamay ti manga tawu, manhandug siya sa Panginuun turiti baka unman may alangan bilang handug sa paglumpiyu kasalanan.

Libitiku 4:3 Iomraidhean Croise

2 Krunika 29:21

Nagdara sida pitu ka tudu baka, pitu ka lalaki karanidu, pitu ka anak karanidu, ag pitu ka lalaki kambing bilang handug sa paglumpiyu para sa kanda kaharian, sa Balay Diyus, ag sa manga nasakupan Huda. Sinugu ni Hari Isikyas ti manga manughandug ginan sa lahi ni Aarun hampay ihandug tida sa harandugan Panginuun.

Isra 8:35

Nakan ti tanan nagbalik ginan sa pagkabihag nagsagda sa Diyus sa Israil manga handug pag sunugun: 12 ka tudu baka para sa buu Israil, 96 ka tudu karanidu, ag 77 ka anak karanidu lalaki. Nagsagda diman sida 12 ka tudu kambing bilang handug sa pagpakalumpiyu. Inda tanan manga handug pag sunugun para sa Panginuun.

Pag-ighit 29:14

Dapat kay nayi, kay lukub, hanggan kay puna sunuga ati sa luwas kampu. Handug inda sa paglumpiyu.

Pag-ighit 29:21

Pagbuul kawu dugu kadiit sa harandugan ag ilibug inda sa lana ulibu pamayid, bag-u iwidwisik inda sa kan Aarun hanggan sa kay manga anak lalaki, hanggan sa kanda manga rutay. Sa panab-anan inda, maintirga si Aarun hanggan kay manga anak, hanggan kanda manga rutay.

Pag-ighit 29:7

Bag-u bul-a ti lana panhaplas ag buhusan sa ulu ni Aarun sa pagtalaga sa kanya.

Pag-ighit 30:10

Usa ka bisis kada timpu, kailangan lumpiyuhun ni Aarun ti harandugan sa panab-anan pagpayid dugu sa ga manga sungay sa suuk. Ti ipayid pag dugu ginan sa handug panlumpiyu. Kailangan inda buwatun kada timpu tugka sa sunud pag manga sinulput tawu, dahil inda pag harandugan pinakabanal gid para sa kangku.”

Isikil 40:39

Sa kada saruy sarakahan may duwa ka lamisa nu naan pag-iyawun ti manga hayup bilang handug pagsunugun, handug sa paglumpiyu kasalanan, ag handug bayad sa kasalanan.

Isikil 43:19

Ti manga manughandug magsirbi sa kangku, ginan sa lahi ni Libi hanggan manga linahi ni Saduk, pakan-an tudu baka ihandug nida bilang handug sa paglumpiyu.

Isikil 44:27

bag-u siya makasulud sa sulud pag sugkadan Balay Diyus sa pagsirbi ati, kailangan maghandug dap siya manga handug sa paglumpiyu para sa kay sadili. Aku, ti Panginuun Diyus, ti magsabi inda.”

Libitiku 1:10

Nu karanidu ngatay kambing waydi ti ihandug tawu bilang handug pagsunugun, kailangan lalaki inda ag unman may alangan.

Libitiku 1:3

Nu baka kay ihandug bilang handug pagsunugun, kailangan lalaki inda ag unman may alangan. Ihandug niya inda sa may arani sabian Turda Taragbuan, hampay sa panab-anan inda pag handug tanggapun siya Panginuun.

Libitiku 16:11

Iyawun ni Aarun ti turiti baka bilang handug sa paglumpiyu kay sadili hanggan sa kay magtal-anakan.

Libitiku 16:3

Inda ti pag-isugu Panginuun sa kan Aarun buwatun sa udas sumaka siya sa Pinakabanal pag Sulud-sulud: Mandara siya turiti baka hampay ihandug bilang handug panlumpiyu sa kasalanan ag lalaki karanidu hampay ihandug bilang handug pagsunugun.

Libitiku 16:5

Mamakaun sa kanya ti kabuuhan Israil tigudwa ka lalaki kambing hampay ihandug sa paglumpiyu manga kasalanan ag usa ka lalaki karanidu handug pagsunugun.

Libitiku 16:6

Ihandug ni Aarun ti turiti baka bilang handug panlumpiyu sa kasalanan hampay malumpiyu siya hanggan kay buu magtal-anakan.

Libitiku 4:14

Nu maalaman nida kuntay nagkasala ngani sida, ti kayamuan manhandug turiti baka bilang handug sa paglumpiyu kasalanan. Daran-un nida inda pag baka atag sa Turda Taragbuan.

Libitiku 4:23

Nu maalaman niya kuntay nagkasala ngani siya, manhandug siya lalaki pag kambing unman may alangan.

Libitiku 4:28

Nu maalaman niya kuntay nagkasala ngani siya, manhandug siya babayi pag kambing unman may alangan para sa nabwat niya salan.

Libitiku 4:5

Bum-ul dugu baka ti pangulu manughandug bag-u darahun niya sa sulud Turda.

Libitiku 5:6

Bilang bayad sa nabwat niya kasalanan, manhandug siya sa Panginuun usa ka babayi karanidu ngatay kambing bilang handug sa paglumpiyu kasalanan. Ihandug inda manughandug agud malukat ti tawu sa kay kasalanan.

Libitiku 6:18

Ti tanan lalaki lahi ni Aarun hanggan ti sunud niya pag manga sinulput tawu, mahimu di kumaun inda pag bahagi handug, dahil kanda inda pag bahagi sa handug para sa Panginuun sa panab-anan apuy. Ti maghiyaput tunda pag manga handug kailangan banal.

Libitiku 8:12

Bag-u binuhusan niya lana kay ulu ni Aarun hampay italaga siya sa Panginuun.

Libitiku 9:2

Magkun si Muysis sa kan Aarun, “Pagbuul kawu usa ka turiti baka hanggan usa ka lalaki karanidu parihu unman may alangan, bag-u handugan sa Panginuun. Tunda pag baka handug sa paglumpiyu kasalanan, ag ti karanidu handug pagsunugun.

Libitiku 9:3

Bag-u sabihun nimu sa manga Israilita pagdara sida lalaki kambing bilang handug sa paglumpiyu kasalanan. Pagdara diman sida baka hanggan karanidu parihu usa ka timpu kay idad ag unman may alangan bilang handug pagsunugun.

Bilang 16:22

Dapat linmuhud si Muysis hanggan si Aarun ag magkun, “Diyus, ti gimpuunan buhi sa tanan tawu, magalit aw kawu sa buu nasakupan dahil sa usa lang ka tawu nagkasala?”

Bilang 8:8

Pagkatapus, padaraha nimu sida turiti baka hanggan marinu pag kalasi arina may lakay lana handug pagkilala sa Panginuun. Padaraha diman nimu sida usa waya ka turiti baka handug sa paglumpiyu.

Ruma 8:3

Binwat Diyus ti unman nabuwat Kasuguan dahil sa kalumuyan nita pagkatawu. Sinugu niya kay sadili Anak ga histuda tawu makasalanan hampay ipakaun niya kay buhi sa kamatayan dahil sa kasalanan. Sa katida pag paraan nasintinsiyahan niya ti kasalanan nangulian sa tagipusuun manga tawu.

2 Kurintu 5:21

Unman nakalakaw sa kasalanan si Kiristu. Dapat ay dahilan ngani sa kanta siya ngap nibilang sa makasalanan hampay nu kita magpakiusa sa kanya, mangyari yi ngap sa kanta ti katadlungan Diyus.

Hibriyu 5:3

Nakan kailangan siya maghandug sa Diyus manga hayup minatay dahil sa manga kasalanan balaw lang tungkul sa manga iba tawu nu unman hanggan tungkul diman sa kay sadili bilug.

Hibriyu 9:12

Kas-a lang gid pag nagsaka si Kiristu ati sa Pinakabanal pag Sulud-sulud, udyi kailangan ulitun. Sa kay nagsaka may dara diman siya dugu hampay siya makaatubang sa Diyus, dapat balaw dugu kambing, balaw diman dugu ibun baka nu unman kay ngap sadili pag dugu. Nakan unman may katapusan kay kinamhan ati pag karibrihan sa kanta manga kasalanan.