Libitiku 10:19 - Hanunuu

¹⁹ Nagsagut si Aarun sa kan Muysis, “Kis-ab naghandug kang manga anak sa harandugan para sa paglumpiyu kasalanan hanggan kanda handug surunugun, dapat namatay ti duwa sa kanda. Sa inda pag nangyari makabaya aw nguna ti Panginuun nu kinaun niku ti handug sa paglumpiyu kasalanan taynguna pag sirang?”

Libitiku 10:19 Iomraidhean Croise

Isayas 1:11

Magkun siya, “Ud may kabuluhan sa kangku ti mayamu niyu handug. Sawa yi aku sa kanyu manga handug pagsunugun — manga karanidu hanggan taba manga hayup kanyu pinatabul. Balaw aku magbaya sa dugu manga tudu baka, manga karanidu, hanggan manga kambing.

Isayas 1:15

“Nu mandarangin kamu balaw niku kamu pansinun. Una paulit-ulit waya kamu mandarangin balaw niku kamu patingihan dahil mayamu kanyu minatay pag tawu.

Hirimyas 14:12

Una waya balaw sida manhandum karan-unun, balaw niku patingihan kanda maghagad awat sa kangku. Una manhandug waya sida manga handug pagsunugun ag handug pasalamat sa kangku, balaw niku tunda tanggapun. Bagkus ngap, matyun niku sida sa gira, lun-us, ag sarut.”

Hirimyas 6:20

Unman may halaga sa kangku kanda manga pag-isagda kamangyan una ginan waya inda sa Shiba, ngatay manga pamanglu ginan waya sa arayu pag rugar. Balaw niku tanggapun kanda manga handug pagsunugun. Unman aku magbaya sa kanda manga handug sa kangku.

Husyas 9:4

Balaw yi kamu pasnuan maghandug intus sa Panginuun. Kanyu manga handug unman makapasulung sa kanya. Una si unu ti kumaun inda pag manga handug ipaparihu sa mauring, dahil tunda parihu lang sa karan-unun sa balay namatyan. Kanyu manga karan-unun para lang sa kanyu sadili; balaw inda mahimu maisagda sa Balay Panginuun.

Libitiku 10:20

Nagpasnu si Muysis sa kay sagut ni Aarun.

Libitiku 9:12

Bag-u iniyaw diman ni Aarun ti hayup bilang handug pagsunugun. Kay dugu tunda dinara niya manga anak sa kanya bag-u iwinidwisik niya sa sangput harandugan.

Libitiku 9:8

Nakan nagpakarani si Aarun sa harandugan bag-u iniyaw niya ti turiti baka bilang handug sa paglumpiyu kasalanan.

Malakyas 1:10

Magkun ti Panginuun Makamaskihan, “Mana may usa sa kanyu sa manga manughandug ti tumalakup sa manga sabian niku Balay, hampay balaw yi kamu magpamakut unman may pulus pag apuy sa kang harandugan. Balaw niku tanggapun kanyu manga handug, dahil balaw aku magbaya sa kanyu.

Malakyas 1:13

Magkun waya kamu magsuku yi kamu sa kanyu maghandug sa kangku, ag pag-ipasipala niyu kang harandugan. Nakan maaw pagsagdahan niyu aku manga hayup may garis, pilay ngatay may sakit. Kanyu aw isip tanggapun niku tunda?

Malakyas 2:13

“Inda waya gid kanyu pagbuwatun: Magpakalumi kamu mabaskug sa harandugan Panginuun dahil balaw yi niya pagpansinun ngatay pagbayaun kanyu manga handug.

Diyuturunumiyu 12:7

Ati kamu pag pagkaun hanggan kanyu magtal-anakan sa atubangan Panginuun niyu Diyus, ag pagbaya kamu sa tanan niyu binwat dahil pinapaladan kamu Panginuun.

Diyuturunumiyu 26:14

Balaw niku inda kinaun mintaras magpanrukuan aku; unman niku inda tinandug mintaras mauring aku; ag unman niku inda isinagda sa namatay. Ungud, Panginuun niku Diyus, sinunud niku kawu. Binwat niku ti tanan nimu pag-isugu sa kanmi.

Pilipus 4:4

Pagbaya kamu pirmi sa kanyu magpakiusa sa Panginuun, ulitun waya gid niku maan magkun, pagbaya kamu!

Hibriyu 7:27

Balaw siya parihu sa iba pangulu manughandug kailangan maghandug sirang-sirang, un-an para sa kanda sadili kasalanan, bag-u di sa kasalanan manga tawu. Kas-a lang ihinandug siya sa Diyus, pagka ipinakaun niya kay sadili bilug hampay mamatay. Balaw yi niya binwat waya uman.

Hibriyu 9:8

Sa tunda yi ngani pag buruwatun pag-ipakilala yi Ispiritu Banal udwaya mabukasan ti Pinakabanal pag Sulud-sulud hanggan sa udwaya mab-ul ti Banal pag Turda.