Isayas 9:15 - Hanunuu

¹⁵ Kay ulu imaw ti manga takinan ag manga paggalangun pag tawu, kay ikug imaw ti manga pudilun pag purupita.

Isayas 9:15 Iomraidhean Croise

1 Hari 13:18

Magkun ti gurangun purupita, “Purupita diman aku ga kanmu. Ag sinugu Panginuun kay usa ka anghil hampay sabihun sa kangku kuntay daraha niku kawu sa kang balay hampay makakaun ag makainum.” (Dapat magpudil maaw ti gurangun.)

Hub 22:8

Pagpalabihun nimu kanmu pagkamakapangyarihan ag pagkabantug sa pag-apu daga.

Isayas 19:15

Unman may una si unu sa bilug daga Ihiptu, mayaman ngatay pugri, garalangun aw ngatay karabsun, ti makaawat sa kay nasyun.

Isayas 23:9

Ti Panginuun Makamaskihan ti may gayak inda hampay iababa ti magpadayaw sa kay kapangyarihan hanggan ti manga pagkilalan-un bantug sa buu kalibutan.

Isayas 28:15

Dahil magpadayaw kamu ag magkumun, “Nagbuwat kami kasunduan sa kamatayan hampay balaw kami mamatay, ag nagkasundu kami sa rugar manga namatay hampay balaw kami madara ati. Nakan ngani, balaw kami mipadamhak una waya rumas-ug ti manga kadautan ga baha, dahil kami magsarig maribri sa panab-anan nimi pamudil ag pagdaya.”

Isayas 28:17

Buwatun niku panukat ti katadlungan. Ipapalid niku sa bagyu hanggan sa baha ti kapudilan pagsarigan niyu rumibri sa kanyu.

Isayas 28:7

Dapat kainda, pasuray-suray ti manga manughandug hanggan ti manga purupita dahil sa kanda kalanguhan, balaw yi sa kang-ud kanda naisipan. Salan yi ti pagkaintindi manga purupita sa pangakakitun, balaw kang-ud ti manga pasya manga manughandug.

Isayas 29:10

Dahil pinaturug kamu Panginuun mahamuuk. Pinatakipan niya kanyu manga ulu hanggan manga mata balaw may iba nu unman kanyu manga purupita.

Isayas 3:12

Magkun ti Panginuun, “Pag-ihidun manga kalay-awan kang manga nasakupan. Manga babayi ti magdumara. “Manga nasakupan niku, pagdayaun kamu niyu manga takinan. Pag-abatun nida kamu sa salan pag dalan.”

Isayas 3:5

Apihun kada usa kay kaparihu. Labanan manga anak ti manga gurangun, ag labanan manga makuri ti garalangun pag manga tawu.

Isayas 43:27

Nagkasala sa kangku kanmu un-an pag manga ginurang, naglaban sa kangku kanmu manga takinan.

Isayas 5:13

Nakan kamu pag manga nasakupan niku bihagun dahil unman niyu magkasalman kang pagbuwatun. Kamu hanggan kanyu manga takinan magkaramatay sa lun-us ag uwaw.

Isayas 59:3

Dahil magmatay kamu, magbuwat waya manga tuhay pag kadautan. Magbagaw kamu manga kapudilan.

Isayas 59:4

Balaw niyu pag-isipun ti katadlungan; ti manga bangdan niyu sa kanyu manga kaparihu pudu kapudilan. Daut kanyu manga pag-isipun, bag-u imaw tida kanyu pagbuwatun.

Hirimyas 23:32

Magtultulanun sida manga tagin-up balaw tutuu, nakan pagpatalangun nida kang manga nasakupan sa kanda manga kapudilan. Balaw niku sida pagsuguun ngatay pag sabihan pagbagaw, nakan unman sida may kaayadan maipakaun sa manga tawu. Aku, ti Panginuun, ti magsabi inda.

Hirimyas 23:9

Magkarunut kang tagipusuun dahil sa manga pudilun pag purupita. Pagtakigan hanggan kang manga but-ul, ga langu aku dahil sa banal pag tultulanun Panginuun laban sa kanda.

Hirimyas 5:31

Ti manga purupita magpaburayhaw kapudilan. Ti manga manughandug magdumara angay sa sadili nida kapangyarihan. Katida ti pagkaibgan manga nasakupan niku. Dapat unu ti buwatun nida nu rumas-ug yi ti katapusan?”

Karukuan 2:14

Ti manga barita niyu manga purupita bukun tutuu, unman may kabuluhan ag magpatalang sa kanyu. Unman nida itinultul kanmu kasalanan hampay balaw mana kawu mabihag.

Isikil 13:19

Paglabagun niyu aku sa atubangan niku nasakupan dahil lang sa pira ka akup sibada ag pira ka bilug tinapay. Sa panab-anan niyu pamudil, pagkumnun niyu mamatay ti balaw dapat mamatay, ag pagkumnun diman niyu balaw mamatay ti dapat mamatay. Ag magpaniwala kang nasakupan sa kanyu kapudilan.

Isikil 13:22

“Pagparukuun niyu ti manga matadlung sa panab-anan niyu kapudilan, una aku ngani mismu unman nagparuku sa kanda. Paggaryahun niyu ti manga daut danga sida mag-apas sa kanda daut pag buruwatun sa panab-anan pagtaratu sa kanda kuntay maribri sida sa kamatayan.

Husyas 9:8

Bilang purupita, pag-ibahan aku niku Diyus sa paggiya sa kanyu manga taga Israil. Dapat una naan tag aku gustu niyu aku ipadamhak; parihu aku sa manuk kanyu pagkaibgan sudkun. Magkagalit sa kangku ti manga tawu sa Israil, ti pagkilalan-un Diyus kay ulian.

Amus 2:4

Inda ti pagsabihun Panginuun tungkul sa Huda: “Dahil sa parargu pagbuwat kasalanan ti manga taga Huda, parusahan gid niku sida. Dahil binugyahan nida kang kasuguan ag unman nida sinunud kang manga surundanun. Pinatalang sida nida pagsirbi sa manga diyus-diyusan imaw diman ti sinirbihan nida manga ginurang.

Mikas 3:5

“Inda waydi ti pagsabihun Panginuun tungkul sa manga purupita magdaya sa kay manga nasakupan, magtaratu mayad pag kahamtangan sa manga magsagpun sa kanda, dapat pagpadalaun nida sa kadamhakan ti dayu magsagpun sa kanda.

Malakyas 2:9

Nakan pinahintulutan niku puyaan kamu ag pakay-ahun tanan tawu dahil unman niyu sinunud kang manga palakaw ag may pagkilingan waya kamu sa kanyu manga magtudlu.”

Matiyu 24:24

Dahil may pumabalhinguun aban kuntay siya yi ngani ti Pinili Diyus Manugribri pag Hari. May lumuwang manga pudilun pag purupita. Pumakakit sida manga makadululaw pag tanda hanggan manga lilingutan pag manga buwat hampay nu mahimu lang, patalangun nida hanggan ti manga pinili Diyus.

Matiyu 7:15

Magkun si Hisus, “Pag-aman kamu sa manga pudilun pag purupita. Magpakarani sida sa kanyu ga bilang karanidu kanda histuda dapat nu sa kay tutuu sida ga manga maisug pag simarun idu.

1 Huwan 4:1

Manga patar-ari, danga duy magpasnu kamu sa kada tawu mag-aku kuntay sa kanya ti Ispiritu Banal. Subuki dap niyu siya nu ngatay tunda pag Ispiritu ungud ngani ginan sa Diyus, aw ngatay unman. Dahil mayamu yi pag manga pudilun purupita naglinutaw sa kalibutan.

Ipinakakit 19:20

Nabihag ti hayup malangas, nabihag diman waydi ti pudilun pag purupita imaw ti manugbuwat makadululaw pag tanda sa atubangan hayup malangas. Tunda ngani pag manga tanda makadululaw ti ginamit niya pandaya sa manga tawu nakatanggap marka hayup malangas, sa manga magsamba sa kay tawu-tawu. Ti hayup malangas ag ti pudilun pag purupita iyinmut buhi tag sa maglabdab danaw apuy asupri.

1 Samwil 9:6

Dapat nagsagut ti suruguun, “Kalway dapu duy, may usa ka manugsirbi Diyus arani lang sitay. Paggalangun siya manga tawu ag tutuu ti tanan niya pagsabihun. Atabug duy kita sa kanya, barang sabihun niya sa kanta nu naan nita pag makitan ti manga asnu.”