Isayas 65:2 - Hanunuu

² “Magpakaalagad aku sa kang manga nasakupan maganit kay ulu ag unman magsunud sa mayad pag-ugali. Kanda pagsundun kanda lang sadili naisipan.

Isayas 65:2 Iomraidhean Croise

Gimpuunan 6:5

Pagka nakitan Panginuun ti manga pagbuwatun manga tawu sa kalibutan lunsay lang kadautan, ag kanda pag-isipun pirmi kadautan,

Kanta 36:4

Una mahuwayan siya maggayak di daut. Paghingabtun niya makabuwat balaw mayad, ag balaw niya pagbugyahan ti daut.

Kanta 36:5

Kanmu pagmahal ag pagkamatinupadun, Panginuun, balaw matakal; mas abwat waya inda sa kalangitan.

Kabagawan 1:24

Dahil balaw niyu pinakidnugan kang magtawag sa kanyu kuntay pagpakarani kamu sa kangku,

Kabagawan 16:29

Paggaryahun makaransa pag tawu kay kaparihu sa pagbuwat kadautan.

Isayas 1:2

Patingihi niyu langit ag daga, dahil magkun ti Panginuun, “Inalagaan niku ag pinadaka ti manga Israilita kang manga anak, dapat naglaban sida sa kangku.

Isayas 1:23

Kanmu manga takinan manga supakil ag kaibahan manga mananakaw. Gustu nida pirmi may upa, ag magpanhagad pamakaun. Balaw nida pag-apinan ti karampatan manga ulila ag balaw diman nida pagpatingihan ti manga buranday magdangup.

Isayas 30:1

Magkun ti Panginuun, “Kaawaawa kang manga anak supakil. Magbuwat sida manga gayak balaw angay sa kang nalub-anan. Magtaratu sida balaw niku pagpasnuan. Nakan lalu di magkadugangan kanda kasalanan.

Isayas 30:9

Dahil manga manuglaban sida, pudilun, ag dayu mamatingi sa manga adal niku.

Isayas 55:7

Patlikudi yi manga tawu daut kanda daut pag manga ugali, bag-uha yi kanda daut pag naisipan. Pagbalik yi sida sa Panginuun nita Diyus, dahil kaawaan ag patawadun niya sida.

Isayas 55:8

Magkun ti Panginuun, “Kang naisipan balaw parihu sa naisipan niyu ag ti pamaraan niku balaw parihu sa pamaraan niyu.

Isayas 63:10

Lang madi katida, naglaban sida ag pinaruku nida ti Banal Ispiritu. Nakan ngani, linabanan sida Panginuun, ag kalaban yi ngap niya sida.

Isayas 66:18

Alam niku kanda pagbuwatun ag pag-isipun. Nakan rumas-ug aku tipunun niku kang manga nasakupan sa tanan nasyun, bag-u makitan nida kang kadayawan.

Isayas 66:3

Dapat ay kaindaay kang kundisyun sa manga tawu magsunud sa kanda sadili kagustuhan ag magbaya sa kanda pagbuwatun subra daut laban sa kangku: Nu manmatay sida baka hampay ihandug, kilalan-un niku sida ga nakamatay tawu. Nu manhandug sida karanidu kilalan-un niku sida ga nakamatay idu. Nu mangayaw sida handug bilang pakaun, kilalan-un niku ga nanagda sida dugu babuy. Ag nu magtuub sida kamangyan bilang pag-alaala sa kangku, kilalan-un niku magdayaw sida sa diyus-diyusan.

Isayas 66:4

Bukud waya siyun, padarahan niku sida kaparusahan subra gid nida kadalaan. Dahil katpung aku nagtawag unman sida nagsagut; katpung aku nagbagaw balaw sida namatingi. Nagbuwat sida daut sa kang pamantay ag nu hintay kang pagdayuun, imaw ngap kanda pagbuwatun.”

Hirimyas 18:12

Dapat sumagut ti manga tawu, ‘Balaw mahimu! Iparargu diman nimi kanmi gustu; sundun nimi ti daut ag kaganitan nimi tagipusuun.’ ”

Hirimyas 3:17

Sa tida pag udas, ingarnan niyu ti Hirusalim ‘Tukawan hari Panginuun.’ Bag-u ti tanan manga nasyun maniripnan sa Hirusalim hampay dayawun ti ngaran Panginuun. Udyi gid nida sundun ti gustu maraganit ag daut nida pag tagipusuun.

Hirimyas 4:14

“Manga taga Hirusalim, lumpiyuha niyu ti kadautan sa kanyu tagipusuun hampay maribri kamu. Tugka kapira kamu mag-isip sa daut?

Hirimyas 5:23

Dapat maganit kay ulu ag maralaban inda pag manga tawu. Kinalimtan ag pinatlikudan nida aku.

Hirimyas 7:24

“Pat-ay unman sinunud nida ngatay pinansin kang manga pagkumnun sa kanda. Bagkus ngap, sinunud nida ti gustu maraganit ag daut nida tagipusuun. Bagkus ngap, lalu waya sida nagpakarayu sa kangku.

Bilang 15:39

Inda pag manga paraway-raway imaw ti pumaala-ala sa kanyu sa tanan niku manga sugu hampay tupadun niyu inda ag balaw kanyu lang pag kagustuhan ti pagbuwatun niyu.

Matiyu 15:19

Dahil ginan ngani sa tagipusuun ti manga daut pag naisipan, ti maglibun sa tawu, ti mag-uragin, ti magpamabayi, ti magpanlalaki, ti magtakaw, ti magkastigus sa bukun tutuu, ti magmuransa.

Matiyu 23:37

Sinabi ni Hisus, “Hirusalim, Hirusalim, pagpanmatyun nimu ti manga purupita, pagbatuhun nimu ti manga sinugu Diyus tabug sa kanmu. Kapira yi ginan kang hinanap ti manga mag-uli sa kanmu sulud, hampay kang likumun, parihu ga inaan manuk mag-ukub sa kay manga butu, dapat dayu di ngap kamu.

Lukas 13:34

“Hirusalim, Hirusalim, pagpanmatyun nimu ti manga purupita, pagbatuhun pagmatyun nimu ti manga sinugu Diyus tag sa kanmu. Kapira yi ginan kang hinanap ti manga mag-uli asan hampay kang tipunun parihu ga inaan manuk mag-ukub sa kay butu, dapat dayu di ngap kamu.

Ruma 10:21

Dapat sinabi niya tungkul sa Israil magkun, “Ginan surip hanggan malambung aku magpakapatigagad sa usa ka nasyun tawu maganit kay ulu ag maglaban sa kangku.”

Ruma 2:5

Dapat ay sa kaganitan nimu tagipusuun ud waydi mag-ampu sa kanmu kasalanan, pagpakadugangan nimu ti parusa kay ganti Diyus sa kanmu nu ipaburayhaw kay galit Diyus aban sa kaudasan niya matadlung pag sintinsiya.

Diyuturunumiyu 29:19

Una si unu ti nakadnug sa inda pag manga pasandam saad danga mag-isip kuntay balaw siya maunu nu pumarargu siya sa kay gustu. Ti tutuu, magdara inda kadamhakan sa kanyu tanan.

Diyuturunumiyu 31:27

Dahil alam di niku nu kabitay kamu maralabag ag maganit kanyu ulu. Una ngani taynguna kaibahan niyu aku, maglaban yi kamu sa Panginuun, lalu waya gid nu tigbak yi aku!

Diyuturunumiyu 9:7

“Isipa niyu nu kabitay niyu ginalit ti Panginuun niyu Diyus sa pangawakawaan. Ginan sa sirang nagluwas kamu sa Ihiptu tugka kainda, pirmi yi lang kamu maglaban sa Panginuun.