Isayas 5:6 - Hanunuu

⁶ Pabay-anan yi lang niku inda ag balaw yi asikasuhun. Balaw yi niku inda puldan kay manga sanga ngatay balubuan kay puun. Pabay-anan yi lang niku mibusul sa manga ilamnun ag manga halaman madugi. Bag-u suguun niku ti manga rurum tubay yi inda padna uran.”

Isayas 5:6 Iomraidhean Croise

1 Hari 17:1

May usa ka purupita kay ngaran si Ilyas. Mag-uli siya sa Tisbi sakup Gilyad. Magkun siya sa kan Akab, “Pagsiguraduhun niku sa kanmu, sa nabubut-un buhi pag Panginuun, ti Diyus Israil kang pagsirbihan, kuntay unman may tun-ug ngatay uran rumas-ug sa sulud pira ka timpu tugka sa unman niku sabihun kuntay pag-uran ngatay pagtun-ug.”

1 Hari 8:35

“Nu balaw nimu pauranun dahil nagkasala sa kanmu ti nasakupan nimu, ag nu mandarangin sida maatubangan sa inda pag rugar ag mandayaw sa kanmu, ag mag-ampu sa kanda manga kasalanan dahil pinarusahan nimu sida,

Hub 31:40

mana manubu sa kang daga ti manga dugihan ag manga ilamnun sa halip tirigu ag sibada.” Sitay pag nap-ut kay bagaw ni Hub.

Kabagawan 24:31

Punu yi inda manga ilamnun ag dugihin pag manga kayu, bag-u daut yi kay alad.

Isayas 24:12

Ti banwa madaut yi lang gid, hanggan kay manga sabian.

Isayas 30:23

Pakan-an kamu Panginuun uran sa panahun tig-taranum, ag bumaliw abunda kanyu tubas. Kanyu manga hayup manharab sa maluang pag pasturan.

Isayas 49:19

Nidamhak kawu ag nagbaliw mapanglaw, dapat taynguna ulianan yi kawu nimu nasakupan. Unman yi sida harus mag-itabu sa kanmu. Ti manga nagwayak sa kanmu pumakarayu yi.

Isayas 55:13

Manubu yi ti manga puun sipris hanggan mirtu sa daan turubuan kaybi manga halaman madugi. Tunda pag manga nangyari makapakaun kadayawan sa kangku. Bumaliw puruyba inda niku kamaskihan hanggan aban.”

Isayas 7:19

Ag inda sida mangulian una naan baliwa: sa matukadun pag manga luung, sa manga lukib manga tunu, sa manga tanum madugi, ag sa manga pasturan.

Hirimyas 14:1

Inda ti sinabi sa kangku Panginuun tungkul sa paglawig init:

Hirimyas 14:22

Unman una di usa ka diyus-diyusan manga nasyun ti makapauran ngatay makapaanitay. Una ti langit ngapu unman diman makapauran. Kawu lang, Panginuun kanmi Diyus ti lubus makabuwat inda, nakan sa kanmu duy kami pag magsarig.

Hirimyas 25:11

Bumaliw mapung-aw inda pag daga. Inda pag nasyun hanggan ti manga nasyun sa kay kalibut sumirbi sa hari Babilunya sa sulud pitumpulu ka timpu.

Hirimyas 45:4

“Baruk, inda waya ti sinabi Panginuun ‘Wasakun niku inda pag nasyun kang ipinatindug. Ayitun niku kang itinanum. Ag buwatun niku inda sa buu daga.

Karukuan 2:6

Dinaut niya kay Balay ga payag lang sa tanman. Ipinahintulut niya kalimtan nasakupan Hirusalim ti itinagka pag manga pista ag manga Sirang Pamahari. Sa kay masyadu pag pangagalit ipinurya niya ti hari hanggan ti manughandug.

Husyas 3:4

Dahil kay ibug sabihun, maduraan hari hanggan takinan ti nasakupan Israil sa kadugayun pag panahun. Maduraan diman manga handug hanggan aramirawan pag batu, katunda diman ti ipud garamitun sa panhula hanggan ti manga diyus-diyusan.

Husyas 9:6

Una waya makapalagiw kamu sa kadamhakan, tipunun di maan niku kamu sa Ihiptu ag ilbung sa Mimpis. Matabunan lang ilamnun ag dugihan pag manga kayu kanyu mahalaga pag manga kagamitan pilak hanggan kanyu manga balay.

Huwil 1:7

Dinaut nida kang manga tanum ubas hanggan ti manga puun igus. Inarit-it nida kay lukub manga tanum tugka sa linmagti kay manga sanga.

Amus 4:7

“Inampara diman niku ti uran sa sulud tulu ka bulan bag-u rumas-ug ti tig-arani. Pagpauranan niku ti usa ka banwa dapat kay iba unman. Pagpauranan niku ti usa ka tanman dapat kay iba magkamarhan.

Lukas 21:24

Matyun sida manga sundalu may armas baladaw, kay iba bihagun darahun tag sa una naan pag nasyun. Tatatataan manga balaw Hudiyu ti Hirusalim hanggan sa udwaya lumawuy ti kaudasan kapangyarihan manga balaw Hudiyu.”

Diyuturunumiyu 29:23

Kanyu buu daga bumaliw parihu sa tigangan daga natabunan yi asupri ag asin. Unman gid may magtanum sa inda pag daga dahil ti tanum unman manubu. Bumaliw parihu sa pagkadamhak Suduma ag Gumura, hanggan Adma ag Sibuyim pagka dinaut Panginuun dahil sa kay masyadu gid pag pangagalit.

Ipinakakit 11:6

May karampatan sida pumigil sa langit hampay udyi umuran sa kaudasan nida magpurupita. May karampatan diman sida baliwun dugu ti danum ag hampay magpadara una hintay pag kahigpitan tag sa babaw daga una lang kapira kanda gustu.