Isayas 49:9 - Hanunuu

⁹ Sabihun nimu sa manga Israilita nabihag hanggan sa napirisu sa kadudulman, ‘Pagluwas kamu! Ribri yi kamu!’ “Miparihu sida sa manga karanidu magharab sa saruy manga dalan ngatay sa manga padang.

Isayas 49:9 Iomraidhean Croise

Kanta 102:20

hampay patingihan niya ti arunghung niya nasakupan binihag ag hampay iribri niya kay nasakupan maratyun.

Kanta 146:7

Pagpakan-an niya katadlungan ti manga pag-apihun, ag pagpakan-an niya karan-unun ti manga magkalun-us. Pinalpasan niya ti manga pirisu,

Kanta 22:26

Mangaun ti manga pugri ag mabsug sida. Dayawun kawu manga magdangup sa kanmu. Pagsa kanda ti kaayadan hanggan ti malawig pag buhi.

Kanta 69:33

Pagpatingihan Panginuun ti manga pugri ag balaw niya pagkalimtan ti binihag pag nasakupan niya.

Isayas 41:18

Pabulusun niku ti danum sa sapa, bumulus inda sa manga mamara tagudtud ag magkaimaw manga bulbugan sa manga karatagan. Buwatun niku lasaan ti pangawakawaan hanggan ti manga tigangan daga magkaimaw manga bulbugan.

Isayas 42:16

Abatun niku kang manga nasakupan buta sa katutuuhanan, tabug sa dalan udwaya nida nalakawan. Rayawan niku ti paglakawan nida madlum ag tadlungun niku ti manga nangunha-kunha pag dalan kanda paglakawan. Buwatun niku inda ag balaw niku sida pabay-anan.

Isayas 42:7

hampay pamuklatun ti manga buta, palpasan ti manga bihag, hanggan ti ipinaslud sa madlum pag pirisuhan.

Isayas 48:17

“Magkun ti Panginuun kanyu Manugribri, ti Banal pag Diyus Israil: Aku ti Panginuun niyu Diyus ti nagtudlu sa kanyu nu hintay ti mayad para sa kanyu, aku diman ti naggiya sa kanyu tabug sa hustu pag dalan.

Isayas 5:17

Ti nawayak pag banwa imaw ti pag-ulian manga mayaman, binuwat lang pasturan manga karanidu.

Isayas 61:1

Ti Ispiritu Panginuun Diyus sa kangku. Dahil pinili niya aku hampay manudlu mayad pag barita sa manga makuri. Sinugu niya aku hampay libangun ti manga nabiyagan kay tagipusuun ag para ibarita sa manga bihag hanggan sa manga pirisu sida malaya yi.

Isayas 65:13

Nakan aku ti Panginuun Diyus magkun, kang manga manugsirbi mangaun ag manginum, dapat kamu lun-usun ag uwawun. Magbaya sida dapat kamu mangay-a.

Isayas 9:2

Ti manga tawu sa kadudulman makakit masyadu gid pagkarayawan, ag marayawan ti may manga kakurian.

Isikil 34:23

Pakan-an niku sida usa ka manugbantay kay linahi ni Dabid, kang suruguun. Siya ti mangalaga ag manbantay sa kanda.

Isikil 34:29

Pakan-an niku sida daga abunda sa ani hampay unman yi sida mangagwanta sa lun-us ngatay puyaan iba manga nasyun.

Huwil 3:18

Sa ati katpung pag udas, papaladan niku kamu. Umabunda kanyu bag-u intus ginan sa mayamu pag ubas sa kabantudan, umabunda diman kanyu gatas ginan sa mayamu baka hanggan kambing magharab sa manga tagudtud. Udyi mak-atan kanyu manga laad hanggan sapa. Bumulus ti bulbugan ginan sa Balay Panginuun. Imaw ti maglantap sa manga nak-at pag bululusan danum sa may manga puun akasya.

Libitiku 25:54

Nu unman siya malukat sa tunda pag manga paraan, mapalpasan di maan siya hanggan kay manga anak sa Timpu Pagpalpas ag Pagbalik.

Mikas 5:4

Dumarahan niya ti nasakupan Israil sa panab-anan kabisugan ag kamaskihan Panginuun. Parihu siya sa usa ka manug-alaga karanidu. Nakan mangabuhi sida may kahusayan dahil galangun manga tawu sa buu kalibutan kay kapangyarihan.

Lukas 1:79

Marayawan ti manga tawu nangulian sa kadudulman ag hinarian kamatayan. Ilakaw kanta raprapa sa dalan kahusayan sa Diyus hanggan sa kanta kaparihu.”

Lukas 2:32

usa ka sulu hampay marayawan ti manga balaw Hudiyu, ag hampay ipakilala ti kadayawan nimu nasyun Israil.”

Lukas 4:18

“Ti Ispiritu Panginuun nangulian sa kangku, dahil pinili niya aku hampay magtudlu Mayad pag Barita sa manga pugri. Sinugu niya aku hampay ibarita sa manga sa pirisuhan sida makaribri, hanggan sa manga buta sida humiling, ag hampay iribri ti manga naapi.

Huwan 10:9

Aku ti puwirtahan. Una hintay pag tawu nu sumulud lakaw sa kangku, siya maribri. Sumulud siya lumuwas ag makakit siya karan-unun.

Huwan 8:12

Nagbagaw maan si Hisus sa manga Parisiyu magkun, “Aku ti sulu sa kalibutan. Nu ti tawu magpasakup sa kangku, sa kanya yi ti karayawan tigpakaun buhi ag balaw yi siya lumakaw sa madlum.”

Binwat 26:18

Kailangan pamuklatun nimu kanda manga mata, kailangan bawiun nimu sida ginan sa kadudulman atag sa marayaw, ginan sa kapangyarihan ni Satanas tabug ngap sa Diyus, hampay nu sida sumarig sa kangku, patawadun kanda manga kasalanan hampay mipaminsan sida sa manga tawu napasakup sa Diyus.’

Ipisu 5:14

Dahil karayawan yi ngani tigpakilala sa tanan. Nakan ngani pagsabihun magkun, “Pag-imata yi kawu ginan sa katurugan, pagkabuhi yi kawu ginan sa kamatayan, rayawan yi kawu ni Kiristu.”

Ipisu 5:8

Kaybi kamu sakup sa kadudulman, dapat taynguna kamu sakup yi sa marayaw dahil sa kanyu pakiusa sa Panginuun. Nakan ngani pag-ugali kamu parihu sa manga tawu sakup yi sa marayaw.

Diyuturunumiyu 32:13

Pinadumara niya sida sa manga kabantudan, ag pinakaun sa manga patubas daga. Tinugunan niya sida sa panab-anan daykut ginan sa ukang batu ag lana ginan sa manga ulibu magtubu sa mabatu pag daga.

Kulusas 1:13

Irinibri niya kita ginan sa kapangyarihan kadudulman, ipinauli yi niya kita sa kaharian niya magmayadun pag Anak.

1 Pidru 2:9

Dapat kamu ungud usa ka pinili pag lahi. Parihu sa manga manughandug sa Balay Diyus, kanyu pagsirbihan si Kiristu pag Hari. Kamu usa ka nasyun binukud para sa Diyus. Pinili kamu Diyus hampay kamu kay sadili yi pag nasakupan ag hampay ipaburayhaw niyu kay manga buwat makadululaw. Siya diman waydi ti nagtawag sa kanyu ginan sa kadudulman tabug sa kaladulawan pag karayawan niya.