Isayas 44:13 - Hanunuu

¹³ Ti manugpanday magsukat usa ka pulud kayu. Pagrirukan niya inda histuda tawu. Bag-u paglahaban niya marinu pag histuda tawu sa panab-anan niya manga kagamitan hampay ipauli sa balay diyus-diyusan.

Isayas 44:13 Iomraidhean Croise

Gimpuunan 31:19

Nitaun waydi ginminan si Laban hampay uguyan kay manga karanidu, ag habang udwaya siya, bin-ul ni Rakil ti manga diyus-diyusan niya ama.

Gimpuunan 31:30

Alam niku magkaibug yi gid kawu muli. Dapat hayga tinakaw nimu kang manga diyus-diyusan?”

Gimpuunan 31:32

Dapat nu tungkul sa kanmu nadura pag manga diyus-diyusan, nu makitan nimu inda una sa kantapu sa kanmi, parusahi siya kamatayan. Sa atubangan nita manga katawuhan bilang manga kastigus, bantayi nimu nu may imaw kawu magkaapu atay sa kanmi, ag nu may imaw bul-a nimu.” Unman alam ni Hakub si Rakil maaw ti nagbuul manga diyus-diyusan ni Laban.

Gimpuunan 35:2

Nakan magkun si Hakub sa kay magtal-anakan hanggan sa tanan kaibahan niya, “Yamtan yi niyu kanyu manga diyus-diyusan. Lumpiyuha kanyu sadili ag ilisi kanyu manga rutay bilang tanda bag-u ag malumpiyu pag buhi.

Isayas 41:7

Ti manga manugpanday hanggan ti panday-pilak, ag ti iba waya pag manga manugtarabahu magbuwat manga diyus-diyusan magparabisugan sa usa kag sa usa magkumun, ‘Marinu gid kanta buwat.’ Bag-u ipinaku nida kanda binwat tawu-tawu sa kay palaulian hampay balaw magpu.

Isayas 44:14

Hampay may magamit siya kayu, magpukan siya sidru, insina, ngatay sipris kay itinanum sa katalunan. Nantanum diman siya puun abitu, dahil pagpakauranun tinmubu diman inda.

Isikil 8:10

Nakan nagsulud ngani aku, nakitan niku ti alad batu punu tuhay-tuhay pag manga kinurtihan hayup magyapang ag iba waya pag manga hayup pagkilalan-un mauring. Nakitan diman niku ati ti tanan pag diyus-diyusan nasakupan Israil.

Isikil 8:11

Matindugan ati ti 70 ka paggurangunun sa Israil, usa sa kanda si Haasanyas anak ni Sapan. Ti kada usa may paghiyaptan sukadan kamangyan, ag ti anus kamangyan magtalimbuuk.

Isikil 8:12

Bag-u magkun ti Diyus sa kangku, “Anak tawu, malu nakitan yi nimu nu hintay ti pagbuwatun sa lihim manga paggurangunun sa Israil? Kada usa sa kanda asan sa sulud-sulud niya diyus-diyusan. Magkun sida, ‘Unman magbantay ti Panginuun sa kanta; binugyahan yi niya ti Israil.’ ”

Binwat 17:29

“Kita ngani manga anak Diyus. Nakan danga nita isipun ti Diyus parihu sa gintu, una pilak, una batu binwat diyus-diyusan, lunsay pinathaw lang isip tawu bag-u binwat niya kamang.

Ruma 1:23

Tinalikdan nida ti mamaski pag Diyus unman may kamatayan, kanda ngap pagsambahun ti manga ilinarawan pag manga tawu may kamatayan, manga manuk, manga hayup, manga iyay magyapang.

Diyuturunumiyu 27:15

“Saadan ti magbuwat una hintay pag manga diyus-diyusan buwat sa batu ngatay sa galang bag-u inda kanda sambahun sa lihim. Dahil pagkagalitan Panginuun inda pag manga diyus-diyusan buwat lang tawu.” Bag-u sumagut ti tanan tawu, “Amin!”

Diyuturunumiyu 4:28

Ag ati yi kamu pag mansamba sa manga diyus-diyusan buwat sa kayu ag batu, balaw maghiling, unman diman magdungug hanggan magkaun ngatay maghungaw.

Talaghusay 18:24

Sinmagut si Mikas, “Magpaingana waya kamu? Bin-ul niyu ti manga diyus-diyusan kang ipinabwat, hanggan kang manughandug. Unman may nasawad sa kangku.”