Isayas 42:1 - Hanunuu

¹ Magkun ti Panginuun, “Inda kang pag pabisugun pag manugsirbi. Pinili niku siya ag magbaya aku sa kanya. Asan sa kanya kang Ispiritu, ilantag niya ti katadlungan sa manga nasyun.

Isayas 42:1 Iomraidhean Croise

Gimpuunan 49:10

Parargu kawu magpangulu, Huda. Ginan sa kanmu linahi ti bumaliw manga takinan. Nakan pumakaun buhis sa kanmu ti manga nasyun ag sumunud sa kanmu.

Kanta 72:4

Mana apinan ag awatan hari ti manga pugri, ag taluhun niya ti manga mag-api sa kanda.

Kanta 89:4

Kada hari sa Israil ginan sa kanmu manga linahi tugka aban; kanmu kaharian pumarargu sa unman may katapusan.”

Isayas 2:4

Sa panab-anan manga kasuguan niya, pagkarausahun niya ti mayamu nasyun. Nakan balaw yi man-girirahan ti manga nasyun, ag balaw yi waydi sida mamaanad kanda sundalu para sa girahan. Buwatun wadi nida sudsud aradu kanda manga baladaw ag sanggut panabas kanda manga bangkaw.

Isayas 32:16

Lumantap ti katadlungan ag katuwiran sa pangawakawaan hanggan sa maabunu pag daga.

Isayas 41:8

“Dapat kawu, Israil, kang manugsirbi ag pinili ginan sa linahi ni Hakub, ag ginan sa linahi ni Abraham kang ampud,

Isayas 41:9

tinawagan niku kawu ag bin-ul ginan sa pinakaarayu baliwa pag rugar sa kalibutan. Sinabi niku sa kanmu kawu kang manugsirbi. Pinili niku kawu ag balaw dinayu.

Isayas 42:2

Balaw siya manringgit ngatay mamagaw mabisug sa manga baklayan.

Isayas 43:10

Manga nasakupan Israil, kamu kang manga kastigus. Ipinasaman niku kamu kang manugsirbi, agud makilala niyu aku ag sumarig kamu sa kangku, bag-u masalman niyu aku lang ti Diyus. Ud may iba diyus inmuna sa kangku, unman diman may Diyus dumasun waya sa kangku.

Isayas 50:10

Si unu sa kanyu ti may dala sa Panginuun ag magsunud sa pag-itudlu niya manugsirbi? Kailangan pagpaniwala siya sa Panginuun Diyus una sa dalan madulum unman may rayaw.

Isayas 52:13

Magkun ti Panginuun, “Kang manugsirbi manalu. Bumaliw bantug siya ag paggalangun.

Isayas 53:11

Nu makitan niya kay burak niya kakurian, makabaya siya. Magkun ti Panginuun, “Sa panab-anan kadunungan niku matadlung pag manugsirbi, mayamu ti kilalan-un niya matadlung, mangagwanta siya para sa kanda manga kasalanan.

Isayas 59:21

Inda kang kasunduan sa kanyu: Dayu madura kang Ispiritu asan sa kanyu hanggan kang manga itinultul pag bagaw sa kanyu. Tultulan niyu inda sa kanyu manga anak, ag kailangan itultul maan nida inda sa kanda manga anak tugka sa dumasun pag manga sinulput. Aku, ti Panginuun, ti magsabi inda.”

Isayas 61:1

Ti Ispiritu Panginuun Diyus sa kangku. Dahil pinili niya aku hampay manudlu mayad pag barita sa manga makuri. Sinugu niya aku hampay libangun ti manga nabiyagan kay tagipusuun ag para ibarita sa manga bihag hanggan sa manga pirisu sida malaya yi.

Isayas 63:1

Si unu tunda tig patangad ginan sa Busra sa sakup Idum, kay marinu pag rutay nadagtaan maragang? Magras-ug siya may dara kapangyarihan. Siya ti Panginuun magpaburayhaw kapanaluhan niya manga nasakupan ag may kamaskihan magribri.

Hagay 2:23

Sabiha diman nimu sa kan Surubabil sa kang suruguun kuntay sa tunda pag sirang, pamahalaun niku siya sa panab-anan niku kamaskihan dahil siya yi kang pinili. Aku, ti Panginuun Makamaskihan, ti may sabi inda.”

Sakaryas 3:8

Taynguna, pagpatingi kawu, Huswi pangulu manughandug: Kawu hanggan ti manga kaparihu nimu manughandug tanda sa manga pararas-ugun mangyari. Itultul niku kang suruguun pag-ingarnan Sanga.

Malakyas 1:11

Sa kay tutuu, pagdayawun manga nasyun kang ngaran, ginan sa butlakan tugka sa isalpan. Una naan pag rugar magtuub ti manga tawu kamangyan ag maghandug malumpiyu pag manga handug sa kangku.

Matiyu 17:5

Sa kay di waya magbagaw hinamuyan sida masinay pag rurum. May nagbagaw ati ginan sa rurum magkun, “Inda kang pagmahalun pag Anak, siya lubus kang pagbayaun. Patingihi gid niyu siya.”

Lukas 3:22

Nagpakababa sa kanya ti Ispiritu Banal ga histuda kalampati. Bag-u may magbagaw ginan sa langit magkun, “Kawu kang pagmahalun pag Anak, kawu lubus kang pagbayaun.”

Lukas 4:18

“Ti Ispiritu Panginuun nangulian sa kangku, dahil pinili niya aku hampay magtudlu Mayad pag Barita sa manga pugri. Sinugu niya aku hampay ibarita sa manga sa pirisuhan sida makaribri, hanggan sa manga buta sida humiling, ag hampay iribri ti manga naapi.

Lukas 4:19

Hampay ipahayag kuntay inda yi ti kaudasan kay magparibri Panginuun sa kay nasyun.”

Lukas 9:35

May nagbagaw ginan sa rurum magkun, “Inda kang Anak, kang pinili, siya ti kanyu patingihi.”

Huwan 16:32

Dapat malu, udyi gid dumugay, kainda yi ngap sab, kamu mamululagan yi, ti kada tawu tabug sa kay sadili balay bag-u tayakan niyu aku usa-usa wadi. Dapat balaw waydi aku usa-usa, dahil ti Ama sa kangku di.

Huwan 3:34

Ti sinugu Diyus imaw tig barita manga bagaw ginan sa Diyus dahil pag-ilubus Diyus kay Ispiritu sa kanya.

Huwan 6:27

Danga kamu magbudlay tungkul lang sa karan-unun magkabangsiw. Pagmasigasid kamu hampay matanggap niyu ti karan-unun unman magkabangsiw, imaw ti makapakaun tutuu pag buhi unman may katapusan. Tunda ngani pag karan-unun ti ipakaun Anak Tawu sa kanyu dahil may tinanggap siya karampatan ginan sa Diyus Ama.”

Binwat 10:38

Naalaman yi waydi niyu inda pag Hisus taga Nasarit, ti pinili Diyus, nakan ipinakaun Diyus sa kanya ti Ispiritu Banal hanggan ti kapangyarihan. Namalibutan siya una naan tag, nagbuwat siya mayad. Ti tanan tawu inapuan diyablu kay diman pinaayad, dahil sa kanya gid ti Diyus.

Binwat 11:18

Pagka nadnugan manga patar-ari inda pag manga sinabi ni Pidru, udyi sida may pagsabihun sa kan Pidru. Bagkus ngap nagdayaw sida sa Diyus magkun, “Nu katunda maaw, ipinakaun diman Diyus sa manga balaw Hudiyu hampay makaampu sida sa kanda kasalanan ag makatanggap buhi.”

Binwat 28:28

Bag-u sinabi waya ni Pablu magkun, “Kailangan pagmaalaman yi gid niyu, duy, inda pag barita ginan sa Diyus tungkul sa karibrihan ipadakit sa manga balaw Hudiyu. Nu bay sida gid pihu mamatingi.”

Binwat 9:15

Magkun maan ti Panginuun sa kan Ananiyas, “Pag-ati duy kawu, dahil pinili ngap niku si Saulu hampay siya sumirbi sa kangku hampay ipakilala niya kang makamaskihan pag ngaran sa manga balaw Hudiyu, sa manga hari hanggan sa nasyun Israil.

Ipisu 1:4

Udwaya nalalang ti kalibutan, daan kita pinili pinausa Diyus sa kan Kiristu hampay kita manga sakup yi Diyus ag udyi may ikasaway sa kay magbantay niya. Dahil sa kay pagmahal Diyus,

Ipisu 1:6

Dayawun nita siya dahil sa makadululaw pag kaayadan kay ipinapalad niya sa kanta sa panab-anan niya pagmahalun pag Anak.

Ipisu 3:8

Sa tanan manga nasakup sa Diyus aku ti unman may kabuluhan. Dapat una katida nagustuhan diman niya ipakaun sa kangku inda pag buruwatun, hampay itudlu niku sa manga balaw Hudiyu ti Mayad pag Barita tungkul sa abunda ag dayi maaput naisipan pag papalad ginan sa kan Kiristu.

Pilipus 2:7

Dapat tinalikdan dapu niya tunda tanan-tanan, pinili niya ti pagkapanawuhun, nagpaparihu sa manga tawu ag nakitan siya sa histuda tawu.

Kulusas 1:13

Irinibri niya kita ginan sa kapangyarihan kadudulman, ipinauli yi niya kita sa kaharian niya magmayadun pag Anak.

1 Pidru 2:4

Pagpakarani kamu sa kan Kiristu. Siya yi ngani ti ga batu may buhi, dinayu manga tawu, dapat pinili ngap Diyus, kay yi pagpahalagahan.

1 Pidru 2:6

Dahil magkun sa Banal Kasuratan, “Bantayi niyu, ipinakana niku sa banwa Siun ti usa ka batu pag kalap binuwat niku patakinan, imaw yi ti mahalaga. Balaw mibuyu una hintay pag tawu nu sumarig sa kanya.”