Isayas 30:10 - Hanunuu

¹⁰ Magkun sida sa manga purupita, ‘Danga yi niyu sabihun sa kanmi ti tungkul sa manga ipinaburayhaw Diyus sa kanyu. Danga yi niyu sabihun sa kanmi ti matadlung. Sabihun niyu sa kanmi ti manga bagay makapasulung sa kanmi ag ti manga balaw matupad pag pangakakitun.

Isayas 30:10 Iomraidhean Croise

1 Hari 21:20

Pagka nakitan ni Akab si Ilyas, magkun siya, “Nasampakan diman aku niku kalaban!” Sinmagut si Ilyas, “Hu, inmataytag aku sa kanmu dahil ipinabili nimu kanmu sadili sa pagbuwat daut sa magbantay Panginuun!

1 Hari 22:27

Ag sabihun niyu sa kanda nagsugu aku kuntay pirisuha inda pag tawu. Tinapay ag danum lang ti ipakaun sa kanya tugka sa makabalik aku may kahusayan ginan sa labanan.”

2 Krunika 16:10

Dahil siti, masyadu nagalit gid si Asa sa purupita, nakan inda kay ipinapirisu. Ag sa tida diman pag udas, nag-umpisa pinakurianan ni Asa kay iba niya manga nasakupan.

2 Krunika 25:16

Habang magbagaw ti purupita, sinmagut ti hari, “Hayga pagpaanyuan nimu aku? Binwat aw kawu niku tagapaanyu? Paghim-ung kawu, dahil nu unman, ipamatay niku kawu.” Nakan naghim-ung ti purupita makalawuy niya sabihun: “Pihu rurisun kawu Diyus dahil sinamba nimu ti manga diyus-diyusan ag unman kawu namatingi sa kangku.”

Hub 41:3

Manpaawa-awa aw lugud siya pirmi sa kanmu kuntay palpasi nimu siya? Pumakihampang aw siya sa kanmu kuntay kaawai nimu siya?

Isayas 28:15

Dahil magpadayaw kamu ag magkumun, “Nagbuwat kami kasunduan sa kamatayan hampay balaw kami mamatay, ag nagkasundu kami sa rugar manga namatay hampay balaw kami madara ati. Nakan ngani, balaw kami mipadamhak una waya rumas-ug ti manga kadautan ga baha, dahil kami magsarig maribri sa panab-anan nimi pamudil ag pagdaya.”

Isayas 29:10

Dahil pinaturug kamu Panginuun mahamuuk. Pinatakipan niya kanyu manga ulu hanggan manga mata balaw may iba nu unman kanyu manga purupita.

Isayas 5:20

Kaawaawa kamu ti magsabi kuntay ti daut mayad ti mayad daut. Ti kadudulman pagsabihun niyu rayaw ag ti rayaw pagsabihun niyu kadudulman. Ti mapait pagsabihun niyu matagsing ag ti matagsing pagsabihun niyu mapait.

Hirimyas 11:21

Pagkaibgan matyun aku taga Anatut nu balaw aku umapas sa pagtultul bagaw Panginuun. Nakan inda ti pagsabihun Panginuun Makamaskihan, “Parusahan niku sida. Mamatay sa gira kanda manga kalay-awan lalaki, ag mamatay sa lun-us kanda manga anak.

Hirimyas 23:17

Inda ti pirmi nida pagsabihun sa manga tawu dayu magpatingi sa kang manga bagaw ag magsunud sa maganit nida tagipusuun: ‘Bumaliw mayad kanyu kahamtangan. Unman may daut mangyari sa kanyu.’

Hirimyas 26:11

Magkun ti manga manughandug ag manga purupita sa manga may kangaranan hanggan sa tanan tawu siyun, “Kailangan sintinsiyahan kamatayan inda pag tawu dahil nagbagaw siya laban sa inda pag banwa. Nadnugan diman niyu kay pagsabihun!”

Hirimyas 29:27

Hayga balaw nimu inampara si Hirimyas taga Anatut kuntay magsabi purupita siya asan sa kanyu?

Hirimyas 36:29

Bag-u sabihun nimu sa hari kuntay inda ti pagsabihun niku, ‘Inirub nimu ti malulunan pag kasuratan dahil pagsabihun ati kuntay wayakun hari Babilunya inda pag daga, ag matyun kay manga tawu hanggan manga hayup.

Hirimyas 38:4

Nakan magkun ti manga may kangaranan tabug sa hari, “Kailangan matyun inda pag tawu. Pagpalumuyun lang niya ti nalub-anan manga sundalu nasawad, hanggan ti manga nasakupan dahil sa manga pagsabihun niya sa kanda. Balaw siya maghingbut kaayadan para sa manga tawu nu unman kadamhakan ngap nida.”

Hirimyas 5:31

Ti manga purupita magpaburayhaw kapudilan. Ti manga manughandug magdumara angay sa sadili nida kapangyarihan. Katida ti pagkaibgan manga nasakupan niku. Dapat unu ti buwatun nida nu rumas-ug yi ti katapusan?”

Amus 2:12

Dapat hintay kanyu binwat? Pinainum niyu intus ti manga Nasariyu ag inampara niyu ti manga purupita kuntay danga sida magtultul kang bagaw.

Amus 7:13

Danga yi kawu magtultul bagaw Diyus sitay sa Bitil, dahil atay ti balay Diyus ti pagsambahan hari hanggan kay kaharian.”

Mikas 2:11

Kanyu pagkaibgan pag manugbarita imaw ti manugbarita unman may pulus, maradaya, pudilun, ag kaindaay kay pagsabihun: ‘Umabunda kamu sa intus ag sa iba waya pag manga irinmun.’ ”

Mikas 2:6

Kainda, pagpatigayunun waya niyu kami. Magkumun kamu, “Danga yi kami pagpatigayuna tungkul sa tunda pag kadamhakan niyu pagsabihun, dahil balaw gid kami mangay-a.

Huwan 7:7

Ti manga tawu taga kalibutan unman may pag-ikadaut sa kanyu. Dapat aku kanda pagkadat-an, dahil pirmi pag-ipaburayhaw niku kanda manga buwat daut.

Huwan 8:45

Dapat aku unman pagpaniwalaan niyu dahil katutuuhanan kang pagsabihun sa kanyu.

Binwat 4:17

Dapat ay kailangan sabihan nita sida danga yi gid sida magbagaw una sa kantapu tungkul sa kamaskihan ni Hisus hampay inda pag barita unman milantag sa tanan tawu.”

Binwat 5:28

“Hinigpitan yi nimi kamu magkun danga yi gid kamu magtudlu tungkul sa kamaskihan ni Hisus. Dapat malu, hintay ngap kanyu binwat? Sa buu banwa Hirusalim tanan-tanan tawu nakadnug yi gid kanyu tudlu. Gustu waya niyu kami pakan-an saragtun tungkul sa kamatayan siyun pag tawu.”

Ruma 16:18

Ti katunda pag manga tawu unman magsirbi sa kan Kiristu sa kanta Panginuun, bagkus ngap pag-intindihun lang nida kanda sadili kailangan. Pagdayaun nida ti manga kurang sa kinaalman sa panab-anan marahusay ag mararinu nida pamagaw.

Galasya 4:16

Taynguna bay aku kanyu aw nangus kalaban dahil sa kang magsabi sa katutuuhanan?

2 Timutiyu 4:3

Dahil rumas-ug aban ti udas balaw yi patingihan manga tawu ti katutuuhanan pag tudlu. Bagkus ngap sundun nida kanda sadili kagustuhan. Manhanap sida manga manugtudlu balaw may iba itudlu nu unman ti kanda lang magustuhan manga manugpatingi.

2 Timutiyu 4:4

Kanda hilig aban sa manga suyut lang, dayi patingihan nida ti katutuuhanan.

Ipinakakit 11:7

Dapat nu nakatapus sida nakapadakit yi Bagaw Diyus, lumuwang ti Hayup Malangas ginan sa kaabasad-basadan bag-u lumaban siya sa kanda kay taluhun ag matyun.

1 Samwil 9:9

Magkun si Saul sa kanya, “Mayad! Abala yi, atag yi kita sa manughula.” (Kaybi sa Israil nu may tawu magkaibug makatanggap bagaw ginan sa Diyus, kaindaay kay pagsabihun, “Abala yi, atag yi kita sa manughula,” dahil ti manga pag-ingarnan purupita taynguna pag-ingarnan manughula kaybi.) Inmati ngani si Saul hanggan ti suruguun sa banwa nu naan katpung ti manugsirbi Diyus.