Isayas 26:7 - Hanunuu

⁷ Maratag ti dalan tawu matadlung, kawu, Panginuun matadlung, ti nagratag inda.

Isayas 26:7 Iomraidhean Croise

1 Krunika 29:17

Diyus niku, alam niku pag-usisaun nimu kanmi tagipusuun ag magbaya kawu nu makitan nimu matadlung inda. Imaw tunda buu tagipusuun ag nalub-anan ti pagpakaun niku inda pag manga bagay. Ag una ti kanmu nasakupan atay kainda nakitan niku nagpakaun diman may nalub-anan. Nakan nagbaya gid aku.

Hub 31:6

mana parusahan aku Diyus. Dahil siya ti nakaalam nu nagsalan aku.

Kanta 1:6

Dahil pag-alagaan Panginuun ti manga magkabuhi matadlung, dapat ti magkabuhi sa kadautan, kadautan diman ti dumara tag sa kadamhakan.

Kanta 11:4

Ti Panginuun ati sa kay banal pag Balay; ati sa langit sa kay tukawan hari. Pagbantayan niya ag pag-usisaun ti tanan tawu.

Kanta 11:7

Matadlung ti Panginuun ag pagkaibgan niya ti manga buwat matadlung. Nakan ti manga magpangabuhi kang-ud makapakarani sa kay atubangan.

Kanta 25:4

Panginuun, tudluan sa kangku kanmu manga kagustuhan.

Kanta 25:5

Tudlui aku magkabuhi angay sa katutuuhanan, dahil kawu ti Diyus kang manugribri. Kawu kang pagsarigan pirmi.

Kanta 27:11

Tudluan sa kangku kanmu kagustuhan. Giyahi aku sa hustu pag dalan, dahil pagbantayan aku niku manga kalaban magkaibug bumwat daut sa kangku.

Kanta 5:9

Balaw masarigan ti pagsabihun niku manga kalaban, dahil paghingbutun nida ipadamhak ti iba. Kanda manga baragawun mahawag ga kalubngan mabukasan. Kanda manga pagsabihun pudu pandaya.

Kabagawan 11:5

Ti matadlung pag magpangabuhi tawu unman may ikasabi makapaalwan sa kay magkabuhi, dapat ti magpangabuhi sa daut midamhak dahil sa kay daut buwat.

Kabagawan 20:7

Ti matadlung pag tawu magpangabuhi unman may ikasabi. Mapalad kay manga anak magsunud sa kanya.

Kabagawan 21:8

Balaw matadlung ti buruwatun tawu may kasalanan, dapat matadlung ti buruwatun tawu unman may kasalanan.

Kabagawan 3:6

Alalahana ti Panginuun sa tanan nimu pagbuwatun, ag giyahan niya kawu sa matadlung pag dalan.

Kabagawan 4:18

Ti pangabuhi tawu matadlung parihu sa pagbutlak init mag-amat di magrayaw habang magdugay.

Isayas 30:18

Dapat mag-alagad ti Panginuun kamu pumakarani sa kanya hampay kaawaan niya. Alistu di siya iparanas sa kanyu kay pasunaid. Dahil ti Panginuun imaw ti Diyus matadlung, mapalad ti magsarig sa kanya.

Isayas 35:8

Magkaimaw laun pag baklayan sa pangawakawaan ag tida ingarnan, “Banal pag Baklayan.” Unman may makasalanan ngatay unman may namuangan ti makalakaw siti. Nu ud ti manga magsunud lang sa Panginuun.

Isayas 42:16

Abatun niku kang manga nasakupan buta sa katutuuhanan, tabug sa dalan udwaya nida nalakawan. Rayawan niku ti paglakawan nida madlum ag tadlungun niku ti manga nangunha-kunha pag dalan kanda paglakawan. Buwatun niku inda ag balaw niku sida pabay-anan.

Isayas 52:12

Dapat taynguna, balaw yi niyu kailangan mag-apura sa pag-ighit, ga maglayas. Dahil Panginuun ti mag-una sa kanyu. Ti Diyus Israil ti bumaliwa sa kanyu.

Isayas 57:2

Dahil nu namatay ti tawu matadlung, may kahusayan yi siya.

Hirimyas 10:23

Panginuun, alam niku ti buhi tawu balaw sadili niya. Balaw siya ti may hiyaput sa kay aratubangun.

Husyas 14:9

Mana masalman ag maintindihan may pan-intindi ti manga nakasurat sitay. Kang-ud gid ti palakaw Panginuun ag pagsundun inda manga matadlung, dapat nagbaliw karadayaanan sa manga malinabagun.

Sipanyas 3:5

Dapat asan di ti kadayawan Panginuun sa karaw-an nida banwa. Pagbuwatun Panginuun ti mayad ag balaw ti daut. Sirang-sirang pag-ipakakit niya kay kaayadan, ag unman niya inda pag-apasan. Dapat ti daut parargu sa pagbuwat daut ag unman sida magkay-a.

1 Kurintu 4:5

Nakan ngani danga dapu pagpihua una hintay pag tawu nu daut nu mayad hanggan sa ud rumas-ug ti Panginuun. Siya ti pumaburayhaw sa manga ilinihim ga sa madlum. Bulwatun niya aban ti pagkutubun tawu. Ati katpung ti kada tawu dayawun Diyus angay sa kay binwat.

2 Kurintu 1:12

Inda kanmi ipagdayaw sa Diyus, pagpatutuuhanan nimi naisipan unman may pabalhinguun kanmi magpakiusa sa tanan tawu ag lalu ngap sa kanyu angay sa kanmi magpasakup sa kay kabanalan hanggan katutuuhanan Diyus, dahil lang sa kay pakaun kaayadan Diyus, bukun yi sa kadunungan angay lang sa pagkatawu.

Ipisu 2:10

Kita hinuman Diyus niusa sa kan Kiristu Hisus hampay itigana nita kanta buhi bilug sa buruwatun mayad, imaw kay ihinanda Diyus kaybi waya ginan hampay kanta ugaliun.

1 Huwan 3:10

Sitay pag makilala ti manga anak Diyus ag ti manga anak diyablu. Una hintay pag tawu ti unman mag-ugali sa matadlung, unman siya anak Diyus, una ti tawu nu unman pagmahalun niya kay patar-ari, unman diman siya anak Diyus.

1 Huwan 3:7

Kamu duy pag manga anak niku, danga kamu padaya una sa kantapu. Ti matadlung kay buwat pag tawu, ga kan Kiristu diman waydi matadlung siya.