Isayas 19:21 - Hanunuu

²¹ Ipakilala Panginuun kay sadili sa kanda, ag sa ati pag sirang kilalan-un nida ti Panginuun. Sambahun nida siya sa panab-anan tuhay-tuhay pag manga handug. Manaratu sida sa Panginuun, ag tupadun nida tida.

Isayas 19:21 Iomraidhean Croise

1 Hari 8:43

patingihi sida asan sa kanmu ulian sa langit. Ag buwata una hintay ti hagadun nida, hampay ti tanan manga tawu sa kalibutan makakilala ag gumalang sa kanmu parihu sa kanmu nasakupan manga Israilita, ag hampay maalaman nida paggalangun kawu sa ipinatindug niku pag Balay Diyus.

Kanta 61:8

Bag-u manganta aku pirmi manga pagdayaw sa kanmu ag tupadun niku pirmi kang taratu sa kanmu.

Kanta 67:2

agud maalaman tanan nasyun sa kalibutan kanmu nalub-anan ag karibrihan.

Kanta 68:31

Ti manga taga Ihiptu pumasakup sa kanmu. Ti manga taga Itiyupya mandali-dali mangayaw kanda manga pamakaun sa kanmu.

Kanta 68:32

Pagkanta kamu sa Diyus, kamu pag manga mag-uli sa manga kaharian sa kalibutan. Pagkanta kamu pagdayaw sa Panginuun

Manugtudlu 5:4

Nu mantaratu kawu sa Diyus, danga pagpadugaya, tupada gid inda. Tupada gid kanmu itinaratu sa kanya dahil unman siya magbaya sa manga unman may intindi, sa manga unman magtupad sa kanda taratu.

Isayas 11:11

Sa ati pag sirang utru gamitun Panginuun kay kamaskihan hampay pauliun ti manga nasawad pag nasakupan niya dinara-bihag sa Asirya, sa Ihiptu, sa Patrus, sa Itiyupya, sa Ilam, sa Babilunya, sa Hamat ag sa iba waya rugar arayu.

Isayas 11:9

Udyi may mandaut ngatay man-guba sa Siun, ti banal niku pag bantud. Dahil bumaliw lantap sa buu kalibutan ti pagkilala sa Panginuun parihu sa kalalawdan dagat punu danum.

Isayas 27:13

Nu tumunug ti budyung mabisug, magbinalik sa Hirusalim ti magkakurian pag manga Israilita nabihag Asirya ag Ihiptu. Sambahun nida ti Panginuun sa banal pag bantud Hirusalim.

Isayas 37:20

Nakan Panginuun nimi Diyus, iribri nimu kami sa kamang Asirya, hampay maalaman tanan kaharian sitay sa kalibutan kawu lang, Panginuun ti Diyus.”

Isayas 44:5

May manga sumabi, ‘Aku sa Panginuun,’ may sumabi diman, ‘Aku linahi ni Hakub.’ May imaw diman mamauli marka sa kanda manga kamang pangaran Panginuun, ag ipaparihu kay sadili minsan sa nasakupan Israil.”

Isayas 45:14

Magkun ti Panginuun sa Israil, “Masakup nimu ti Ihiptu, ti manga taga Itiyupya hanggan ti manga taga Siba kanda kalalakihan arabwat. Ataytag sida sa kanmu dara kanda kayamanan hanggan manga inani. Sida bumaliw bihag nimu. Manluhud sida sa kanmu ag sumabi, ‘Tutuu ungud ti Diyus kaibahan nimu, siya lang ti Diyus!’ ”

Isayas 49:7

Ti Panginuun, ti Manugribri ag Banal pag Diyus Israil, magkun sa tawu pagpuyaan ag pagkayagtingan manga nasyun hanggan manugsirbi manga takinan, “Makitan manga hari nu si unu gid ungud kawu ag tumindug sida hampay galangun kawu. Ti manga takinan yumuk-ub sa kanmu. Mangyari inda dahil sa kangku, ti Panginuun matinupadun, ti Banal pag Diyus Israil. Aku ti nagpili sa kanmu.”

Isayas 55:5

Tawagan niyu ti balaw kaibahan niyu pag manga nasyun, ag mandaldali sida pumakarani sa kanyu, dahil aku, ti Panginuun niyu Diyus, ti Banal pag Diyus Israil, ti nagpakaun kagalangan sa kanyu.”

Isayas 56:7

Darahun niku sida sa kang banal pag bantud ag ati pag pasulungun sa kang balay dararanginan. Tanggapun niku sa kang harandugan kanda manga handug pagsunugun hanggan ti tuhay waya pag handug, dahil kang Balay Diyus ingarnan balay dararanginan manga tawu ginan sa tanan nasyun.”

Isayas 60:7

Daran-un manga taga Kidar hanggan manga taga Nibayut kanda manga karanidu tabug sa kanmu, bag-u ihandug tunda sa harandugan Panginuun hampay makabaya siya. Lalu waya pahalgaan Panginuun kay Balay.

Isayas 66:23

Sa kada umpisa bulan ag sa kada Sirang Pamahari ti tanan tawu sumamba sa kangku. Aku, ti Panginuun, ti magsabi inda.

Hunas 1:16

Dahil siyun pag nangyari, daka gid kay paggalang manga tawu sa Panginuun. Nakan nagsagda sida tabug sa kanya ag nanaratu pumarargu sa pagsirbi hanggan pagsagda sa kanya.

Habakuk 2:14

Dahil nu kabitay ti dagat punu danum, ti tanan tawu sa kalibutan mapnu diman kinaalman tungkul sa kamaskihan Panginuun.

Sipanyas 3:10

Kang manga namululagan pag nasakupan sa baliw dipay manga sapa Itiyupya mandara manga handug sa kangku.

Malakyas 1:11

Sa kay tutuu, pagdayawun manga nasyun kang ngaran, ginan sa butlakan tugka sa isalpan. Una naan pag rugar magtuub ti manga tawu kamangyan ag maghandug malumpiyu pag manga handug sa kangku.

Huwan 17:3

Inda yi ngani ti ibug sabihun buhi unman may katapusan nu kilalan-un tawu kawu lang ti tutuu gid pag Diyus ag nu kilalan-un niya si Hisu-Kiristu, ti sinugu nimu.

1 Pidru 2:5

Bilang ga manga batu may buhi waydi pagga manga kalap kamu Balay Diyus hampay ulian Ispiritu. Bag-u bilang ga manga manughandug ibinukud para sa Diyus, pagpakaun kamu sa Diyus manga pakaun angay sa Ispiritu, kay pagbayaun Diyus dahil sa kan Hisu-Kiristu.

1 Pidru 2:9

Dapat kamu ungud usa ka pinili pag lahi. Parihu sa manga manughandug sa Balay Diyus, kanyu pagsirbihan si Kiristu pag Hari. Kamu usa ka nasyun binukud para sa Diyus. Pinili kamu Diyus hampay kamu kay sadili yi pag nasakupan ag hampay ipaburayhaw niyu kay manga buwat makadululaw. Siya diman waydi ti nagtawag sa kanyu ginan sa kadudulman tabug sa kaladulawan pag karayawan niya.

1 Samwil 17:46

Taynguna pag sirang ipakaun kawu Panginuun sa kangku. Matyun ag puldun niku kanmu liug. Taynguna diman pag sirang, ti manga bangkay nimu manga kaibahan Pilistiyu ipakaun niku sa manga manuk hanggan sa maraisug pag hayup, bag-u maalaman sa buu kalibutan may Diyus ti Israil.