Isayas 1:15 - Hanunuu

¹⁵ “Nu mandarangin kamu balaw niku kamu pansinun. Una paulit-ulit waya kamu mandarangin balaw niku kamu patingihan dahil mayamu kanyu minatay pag tawu.

Isayas 1:15 Iomraidhean Croise

1 Hari 8:22

Sa atubangan buu nasakupan Israil, tinmindug si Sulumun sa atubangan harandugan Panginuun bag-u ipinaabwat niya kay kamang,

1 Hari 8:54

Pagka natapus ni Sulumun kay darangin hanggan kay manga paghagadun sa Panginuun, tinmindug siya sa atubangan harandugan Panginuun, nu naan pag maluhudan siya ag maabwatan kay kamang sa langit.

Isra 9:5

Igu rinmas-ug tunda pag udas, inmapas aku sa kang magpanrukuan. Linmuhud aku gitas-gitas kang rutay, ag nandarangin maabwatan kang manga kamang sa Panginuun, kang Diyus.

Hub 27:20

Rumas-ug sa kanya ti kadalaan ga magpaywas pag baha ag ipayag buhawi nu rumas-ug ti yabi.

Hub 35:13

Tutuu gid, unman pagpatingihan Makamaskihan pag Diyus kanda maghagad awat unman may pulus.

Kanta 134:2

Paabwatan niyu kanyu manga kamang sa kanyu magdarangin sa sulud Balay Diyus, ag dayawa niyu ti Panginuun.

Kanta 55:1

Diyus, patingihi kang darangin; patingihi kang maghagad awat.

Kanta 66:18

Nu pinabay-anan lang niku kang manga kasalanan unman mana nagpatingi ti Panginuun sa kangku.

Pag-ighit 9:29

Sinmagut si Muysis, “Nu nakalwas yi aku banwa, ipaabwat niku kang kamang ag mandarangin sa Panginuun. Bag-u umapas ti linti hanggan kilat, ag unman yi umuran yilu, hampay maalaman nimu Panginuun ti may apu kalibutan.

Kabagawan 1:28

Bag-u manawag kamu sa kangku, dapat balaw niku kamu sagutun. Hanapun niyu aku, dapat unman niyu aku makitan.

Kabagawan 6:17

ti marapadayaw, ti marapudil, ti magmatay tawu,

Isayas 4:4

Sa panab-anan kamaskihan ag maglabdab pag parusa Panginuun, pihuun niya ag lumpiyuhun ti kadautan manga babayi sa Hirusalim hanggan ti manga maratyan ati.

Isayas 45:15

Diyus ag Manugribri Israil, balaw nimu pag-ipakakit kanmu sadili.

Isayas 58:4

Balaw ngani kamu maghandum karan-unun, dapat mag-arawayan diman kamu, magtalaluhan, ag magsuruntukan waya. Danga niyu isipun kanyu unman maghandum karan-unun taynguna makaawat hampay dungugun niku kanyu darangin.

Isayas 58:7

Pakan-i niyu karan-unun ti manga magkalun-us, ipatahan niyu sa kanyu ulian ti unman may ulian, ayawi niyu rutay ti unman may rutay, ag awati niyu kanyu manga katawuhan.

Isayas 64:7

Unman una di usa sa kanmi ti maghagad ag maghingbut makahiyaput sa kanmu. Dahil napakarayu kawu sa kanmi, ag pinabay-anan nimu kami sa kanmi manga kasalanan.

Isayas 8:17

Magpaniwala aku sa Panginuun una waya pinatlikudan niya ti linahi ni Hakub. Sa kanya di aku pag magsarig.

Hirimyas 11:11

Nakan aku, ti Panginuun magsabi, mamadara aku sa kanda kaparusahan kuntay unman nida makapaiwas. Una manhagad sida awat sa kangku, balaw niku sida patingihan.

Hirimyas 14:12

Una waya balaw sida manhandum karan-unun, balaw niku patingihan kanda maghagad awat sa kangku. Una manhandug waya sida manga handug pagsunugun ag handug pasalamat sa kangku, balaw niku tunda tanggapun. Bagkus ngap, matyun niku sida sa gira, lun-us, ag sarut.”

Hirimyas 4:31

Nadnugan niku ti maglumi hanggan magpabawi, ga babayi magpanganak sa kay panganay anak. Lumi inda manga nasakupan Hirusalim ga maghingagaw kanda arup. Pag-ipaabwat nida kanda manga kamang magkun, “Kaawaawa waydi kami; ag ga malipungan yi, dahil asan yi kanmi manga kalaban ti manmatay sa kanmi.”

Isikil 11:6

Mayamu kanyu pinanmatay sa inda pag banwa ag nagkarawayak lang ti manga bangkay sa baklayan.

Isikil 14:3

“Anak tawu, inda sida magmahal sa kanda manga diyus-diyusan imaw ti magdara sa kanda sa pagbuwat daut, hayga pahintulutan niku sida manhagad paanyu ginan sa kangku?

Isikil 39:23

Maalaman diman iba manga nasyun binihag ti nasakupan Israil dahil sa kanda manga kasalanan, dahil unman sida nagtupad sa kangku. Pinabay-anan niku sida girahun manga kalaban ag panmatyun.

Husyas 5:6

Mansagda kamu manga karanidu, manga kambing hanggan manga baka sa pagdangup sa kangku, dapat unman niyu malakawan kang kadayawan dahil binugyahan yi niku kamu.

Mikas 3:4

Sa udas parusahan kamu, manhagad kamu awat sa Panginuun, dapat balaw niya kamu awatan. Pabay-anan niya kamu dahil sa kanyu daut pag manga buwat.

Sakaryas 7:13

Dahil unman nida pinatingihan kang manga pagsabihun, unman diman niku patingihan nu manawag sida sa kangku.

Matiyu 23:13

Sinabi ni Hisus, “Kaawaawa kamu pag manga manugtudlu Kasuguan hanggan manga Parisiyu, magpabalhinguun lang kamu! Bilang ga tinalakpan niyu ti sabian hampay ti manga tawu dayu makasulud sa kaharian langit. Kamu dayu magsulud sa kaharian langit bag-u kanyu waya pag-amparahun ti manga magkaibug magsulud ati.

Matiyu 6:7

“Nu magdarangin kamu danga kayamu pag bagaw unman may pulus, danga parihu sa ugali manga unman magsarig sa Diyus. Kanda isip barang patingihan sida Diyus dahil sa kayamuan nida pagbagawun imaw-imaw diman.

Huwan 9:31

Alam nita ti Diyus unman magpatingi sa tawu nu siya makasalanan. Dapat nu ti tawu magsamba sa Diyus ag magtupad sa kay kagustuhan, pihu gid patingihan Diyus.

1 Timutiyu 2:8

Kang gustu ngani ti manga lalaki una naan pag rugar nu magdarangin kailangan ipaabwat nida kanda manga kamang tag sa Diyus, ipasakup nida lubus sa Diyus kanda naisipan, danga may galit hanggan magtalaluhan.