Ipisu 5:3 - Hanunuu

³ Kamu manga nasakup sa Diyus, nakan ngani danga yi magbuwat una magsampit man sa harampangan una kabitay pag kalasi magpanguragin, kayagtingan una manga mahalay pag hilig.

Ipisu 5:3 Iomraidhean Croise

Kanta 10:3

Dahil pag-ipadayaw nida kanda daut pag manga kagustuhan. Sida pag manga daluk magsaad ag magpuya sa kanmu, Panginuun.

Kanta 119:36

Pagmaraibgun aku sa pagsunud sa kanmu manga tudlu kaysa maghingbut yumaman.

Pag-ighit 18:21

Dapat pagpili kawu manga tawu makaawat sa kanmu. Kailangan may imaw sida kakayahan maghusay, may dala sa Diyus, makatiwalaan, ag unman magtanggap suhul. Buwatun nimu sida tagahusay sa kada gurupu sa tig 1,000, 100, 50 ag 10 ka tawu.

Pag-ighit 20:17

“Danga niyu pagkaibgi maapu ti balay niyu kaparihu, ngatay kay asawa, kay manga panawuhun, kay manga baka, kay asnu, ngatay ti una hintay pag kasiyunan niya.”

Pag-ighit 23:13

“Sunda niyu inda tanan kang sinabi sa kanyu. Danga kamu magdarangin sa tuhay pag manga diyus ngatay sampitun lang kanda ngaran.

Kabagawan 28:16

Subra maisug ti manugpanguna unman may pan-intindi. Ti manugpanguna balaw magkaibug yumaman sa daut pag paraan lumawig kay buhi.

Hirimyas 22:17

Dapat kawu bay, unman may tuhay pagkaibgan nu ud mandaya, magmatay manga tawu unman may kasalanan, mag-api, hanggan magpandahas.

Hirimyas 6:13

“Ginan sa pinakapugri tugka sa darayawun, pararihu lang sida manga maramuun sa kuwarta. Una ti manga purupita ag manga manughandug manga manugdaya diman.

Hirimyas 8:10

Nakan ipakaun niku sa iba kanda manga asawa hanggan manga tanman. Dahil ginan sa pugri tugka sa may kaya pararihu nagbaliw maramuun sa kuwarta, hanggan yi ti manga purupita ag manga manughandug.

Isikil 33:31

Nakan magpakarani kang nasakupan sa kanmu ag ga magkaibug gid sida magpatingi sa kanmu, dapat kay tutuu unman nida pagtupadun kanmu pagsabihun. Mayad lang sida magbagaw kuntay pagmahalun nida aku, dapat ti sa sulud nida tagipusuun imaw ti maramuun sa kuwarta.

Libitiku 15:18

Nu mangululidan ti lalaki ag babayi, bag-u manluwang ti ginan sa kinatawu lalaki, kailangan marigus sida duwa, dapat ibilang di sida sa mauring tugka sa misalup ti init.

Mikas 2:2

Pag-agawun niyu ti manga tanman hanggan ti pagkaibgan niyu pag manga balay. Pagdayaun niyu ti manga tawu hampay mab-ul niyu kanda balay una hanggan kanda minana pag daga.

Bilang 25:1

Katpung makampuhan ti manga Israilita sa Sitim, ti manga lalaki nag-umpisa nangululid sa manga babayi Muabita.

Matiyu 15:19

Dahil ginan ngani sa tagipusuun ti manga daut pag naisipan, ti maglibun sa tawu, ti mag-uragin, ti magpamabayi, ti magpanlalaki, ti magtakaw, ti magkastigus sa bukun tutuu, ti magmuransa.

Lukas 12:15

Bag-u sinabi niya sa kanda, “Pag-ingat gid kamu, pag-aman kamu agud kanyu tagipusuun unman maramuun. Dahil ti tawu balaw kumakit buhi nu sa abunda lang pag kasiyunan.”

Lukas 16:14

Inda pag manga adal tanan-tanan nadnugan manga Parisiyu manga maraibgun sa kuwarta. Nakan linibak nida si Hisus.

Binwat 15:20

Dapat ay suratan nita sida sa danga sida kumaun karan-unun ihinandug sa diyus-diyusan, danga sida magpamabayi magpanlalaki, danga sida kumaun taguban hayup nu in-gut unman nakaluwang kay dugu ag danga waydi sida kumaun dugu.

Binwat 20:33

Unman aku may hinirak una kantapu pag gintu, pilak, una rutay.

Ruma 1:29

Nasakup yi sida tanan kalasi kadautan, kalukuhan, maramuun, daut pag naisipan. Punu sida kainggitan. Nag-ugali sida sa maglibun tawu, sa magtalaluhan, sa magdaya hanggan sa maglupig. Sida maglibak daut,

Ruma 16:2

Tanggapun niyu siya dahil sakup siya sa Panginuun. Katunda diman kailangan matinanggapun ti manga nasakupan Diyus. Awatan niyu siya una sa unu pag kailangan niya dahil mayamu waydi patar-ari ti inawatan niya hanggan aku paman inawatan diman waydi niya.

Ruma 6:13

Danga niyu ipasakup sa kapangyarihan kasalanan una naan pag bahagi bilug niyu para gamit sa kadautan. Bagkus ngap pasakup kamu sa Diyus. Kamu pag manga namatay yi ag binuhi uman, ipakaun niyu sa Diyus kanyu buu pagkatawu hampay gamit yi sa katadlungan.

1 Kurintu 10:8

Danga diman waydi kita mag-uragin, balaw parihu sa kanda, ti iba nag-uragin, nakan duwapulu may tulu ka libu ti namatay sa usa ka sirang dahil sa parusa Panginuun.

1 Kurintu 5:1

May nakadangat barita sa kangku kuntay masyadu daut pag nangyari. Usa sa kanyu magpanguragin tabug sa kay ina ulung. Una sa manga unman nakatanggap unman may magpanguragin katida.

1 Kurintu 6:13

Mahimu sumabi ti iba, “Ti manga karan-unun para sa tiyan. Ti tiyan para sa manga karan-unun, dapat parihu duraun di Diyus una ti tiyan, una ti manga karan-unun.” Ti bilug tawu balaw para sa panguragin, nu unman bagkus ngap para sa Panginuun gid. Ag ti Panginuun para sa bilug.

1 Kurintu 6:18

Pag-iwas kamu sa panguragin. Ti tanan kasalanan nu pagbuwatun tawu, iba ti mag-idamhak sa kakurian dapat tigpanguragin midamhak ngap kay sadili bilug.

2 Kurintu 12:21

Magkadala aku nu asan tabug maan, barang pakay-ahun aku niku Diyus sa kanyu atubangan. Nu katunda kang gid ikalumi ti kayagtingan, ti panguragin hanggan kahalayan udwaya ipinatawad unman diman waya iinampu.

Ipisu 5:12

Dahil makakaray-a sabihun ti manga pagbuwatun nida sa lihim.

Ipisu 5:5

Alam diman niyu unman may kaparti sa kaharian Diyus ag ni Kiristu ti tawu nu magpanguragin, nu maraw-ay, nu maraibgun sa kasiyunan, dahil ti maraibgun sa kasiyunan parihu sa magsamba sa diyus-diyusan.

Pilipus 1:27

Nakan ngani kailangan gid kamu pag-ugali angay sa Mayad pag Barita tungkul sa kan Kiristu. Nu katunda una aku makaasan ag makitan niku kamu, una unman, maalaman diman niku mirinsan di kanyu turunu ag mag-arawatan kamu hampay maingatan ti kanta pagsarigan Mayad pag Barita una may manga kalaban.

Kulusas 3:5

Nakan kailangan matyun yi lang niyu ti kagustuhan niyu angay waya sa kalibutan, ti panguragin, ti manga mahalay, ti gamun sa kahalayan, ti daut pag manga hilig, ti mairibgun sa kasiyunan imaw diman ti usa ka kalasi panamba sa diyus-diyusan.

1 Tisalunika 4:3

Inda yi ngani ti kagustuhan Diyus, paglubus yi kamu pasakup sa Diyus ag pagpakarayu kamu sa kahalayan.

1 Tisalunika 4:7

Kita kay pinili Diyus hampay balaw mag-ugali sa mahalay nu unman hampay lubus kita sakup sa Diyus.

1 Timutiyu 2:10

Kailangan kanda ngap pinagkabisti kay mayad buwat imaw ti dapat sa manga babayi manga magpasakup sa Diyus.

1 Timutiyu 3:3

Kailangan unman maraibgun siya sa irinmun makalangu, balaw diman arisgadu, kailangan pag maalumanay ngap siya, maraibgun sa kahusayan, danga maraibgun sa kuwarta.

1 Timutiyu 6:10

Dahil ti hangad sa kuwarta imaw ti gimpuunan tanan kadautan. Dahil may manga tawu maraibgun sa kuwarta nagsimray sa kanda pagsarig, nagpakaun sida kakurian sa kanda sadili buhi.

2 Timutiyu 3:2

Ti manga tawu aban makasadili, maramuun sa kuwarta, palabi-labihun, yabang-yabangin, magpanmuransa, supladu sa gurangun, unman may pasunaid sa kay sadili, ag unman magpasakup sa Diyus.

Titu 1:11

Kailangan sida amparahan sa kanda maglaban hanggan magdaya, dahil pagguluhun nida ti manga magtal-anakan. Basta sida sa kumakit lang kuwarta, pag-itudlu nida ti unman kailangan itudlu.

Titu 1:7

Kailangan gid unman may ikasabi sa manug-asiwa iglisya. Ti manug-asiwa iglisya imaw ti piniyaran buruwatun Diyus. Kailangan siya unman palabi-labihun, unman waydi arisgadu, balaw maglangu, balaw magalitun, balaw daluk,

Titu 2:3

Katunda diman pagkumun kawu sa manga gurangun pag babayi, kailangan ipakakit nida kanda maggalang sa Panginuun hanggan sa tawu, danga sida parabangdan sa tawu, danga sida magkadara sa manga irinmanun, bagkus kailangan pagtudlu sida sa mayad.

Hibriyu 12:16

Pagdahan kamu hampay unman may mag-uragin sa kanyu ag hampay unman may tawu asan ga kan Isaw. Unman pinahalgaan niya ti kaayadan Panginuun. Ibinalyu kabay niya kay karampatan bilang panganay sa usa ka pinggan karan-unun.

Huswi 7:21

Sa manga bagay naagaw nita, may nakitan aku usa ka marinu pag rutay ginan sa Babilunya, pilak manga duwa ka kilu may tunga, ag usa ka barita gintu manga tunga kilu. Naibug gid aku sa inda pag manga bagay, nakan bin-ul niku. Ilinbung niku inda sa daga sa sulud niku turda. Ti pilak ati gid sa sirung.”

1 Pidru 5:2

Kang gid bilin sa kanyu alagaan niyu ti manada Diyus kay iinintirga sa kanyu. Tupada niyu kanyu buruwatun pag may maluag pag naisipan, balaw sa nalugusan kanyu kagustuhan. Dahil tunda ngani kay gustu Diyus. Tupada ngani niyu kanyu katungkulan danga magkaibug sa may pakasa, lalu ngap pag may kabayaan kanyu magsirbi.

2 Pidru 2:10

Lalu gid parusahan aban ti manga mag-ugali angay lang sa sadili nida kagustuhan sa daut pag naisipan hanggan sa mahalay ag unman madunung magpanagunsirung sa may kangaranan. Manga paranghasin tunda pag manga pudilun pag manga manugtudlu, manga palabi-labihun. Unman paggalangun nida ti manga makapangyarihan sa langit, bagkus ngap kanda paglibakun.

2 Pidru 2:14

Unman sida may paghanapun nu ud pararauragan lang. Ud magsuku sida sa magbuwat kasalanan. Pagtaban-tabanun nida ti manga malumuy tag sa kasalanan. Anad gid sida sa maramuun. Sida manga sinaadan yi Diyus.

2 Pidru 2:3

Manga maramuun sida, nakan magpabalhinguun sida sa kanda tudlu hampay sida pakan-an niyu kuwarta. Ginan waya sa kabag-u ihinanda yi ti sintinsiya sa kanda, alistu yi sumintinsiya.

Ipinakakit 2:14

Dapat aku may pagsabihun inda laban sa kanmu: Ti iba sa kanmu magsunud sa tudlu ni Balaam. Si Balaam kabay ti nagtudlu kaybi sa kan Balak hampay patalangun niya ti manga Israilita tag sa kasalanan. Nakan nagkaun ngani sida manga ihinandug sa manga diyus-diyusan ag nagpanguragin sida.

Ipinakakit 2:21

Pinakan-an niku siya rugar hampay iampu niya kay manga kasalanan, dapat unman may gustu siya magbag-u kay ugali sa magpanguragin.

Ipinakakit 21:8

Dapat makuri masyadu ti malakawan manga madalain, manga unman nagsarig sa Diyus, manga magkadara sa daut pag kahalayan, manga maglibun sa kay kaparihu tawu, manga uragin, manga magsarig sa kapangyarihan ni Satanas, manga magsamba sa diyus-diyusan hanggan tanan pag manga pudilun. Iyamut sida sa malabdaban danaw apuy asupri, tida imaw ti ikadwa pag kamatayan.”

Ipinakakit 22:15

Dapat matayak sa luwas banwa ti manga daut pag tawu, ti manga magsarig sa kapangyarihan ni Satanas, ti manga magpanguragin, ti manga maglibun tawu, ti manga magsamba sa diyus-diyusan, ti tanan magbaya sa maradaya hanggan ti manga magdaya.

Ipinakakit 9:21

Unman ainampu nida kanda binwat kasalanan sa kanda manga maglibun, sa kanda magdaya, sa kanda magpanguragin hanggan sa kanda magtakaw.

1 Samwil 8:3

Dapat ti ugali niya manga anak balaw parihu sa kanya, maraibgun sida sa kuwarta, magpasuhul ag balaw nida pag-ilantag ti katadlungan.