Ipisu 3:4 - Hanunuu

⁴ Sa kanyu magbasa inda maalaman niyu nu kabitay kang mag-intindi sa madalum pag katutuuhanan ni Kiristu.

Ipisu 3:4 Iomraidhean Croise

Matiyu 13:11

Sinmagut si Hisus, “Ipinahintulut sa kanyu ti makatau sa manga katutuuhanan unman nihayag tungkul sa kaharian langit, dapat unman ipinahintulut inda sa kanda.

Lukas 8:10

Magkun si Hisus, “Ipinakaun Diyus sa kanyu hampay masalman niyu ti madalum pag katutuuhanan udwaya niburayhaw tungkul sa kay paghari Diyus. Dapat sa manga iba pag-itudlu niku sa manga pahalimbawa hampay ‘Una sida magpakabantay, unman sida makasalum, ag una sida magpakapatingi, unman nida maintindihan.’”

Ruma 11:25

Manga patar-ari, gustu niku maalaman niyu ti usa ka katutuuhanan udwaya maburayhawan, hampay balaw mag-isip kamu palabi-labi sa kanyu sadili. Ti kaganitan nasyun Israil balaw padayun-dayun, balaw hanggan aban. Inda magkadugay lang hanggan sa udwaya makapakarani sa Diyus ti tanan manga ginayak niya pag manga balaw Hudiyu.

Ruma 16:25

Dayawun nita ti Diyus. Siya ti makaparig-un sa kanyu pagsarig angay sa Mayad pag Barita tungkul sa kan Hisu-Kiristu kang pag-itudlu sa kanyu. Maalaman diman waydi nita tunda sa katutuuhanan udwaya maburayhawan kaybi ginan sa sulud kadugayun pag timpu.

1 Kurintu 13:2

Una pinakan-an yi aku Panginuun hampay makapurupita ag una maalaman niku ti tanan katutuuhanan unman ipinaburayhaw sa tawu, hanggan ti tanan kaalamanan, una abi pinakan-an aku Panginuun buu pagsarig hampay ipakababa niku ti manga bantud, bag-u unman aku may pagmahal, unman diman aku may pulus.

1 Kurintu 4:1

Kailangan duy kilalan-un niyu kami kay manga suruguun ni Kiristu. Ipiniyar Diyus sa kanmi ti madalum pag katutuuhanan balaw daan ipinaburayhaw sa tawu.

2 Kurintu 11:6

Mahimu aku balaw marinu sa pinamagawan, dapat balaw ungud kurang sa kadunungan. Pirmi yi waydi ipinakilala nimi inda sa kanyu sa tanan nimi buruwatun.

Ipisu 1:9

hampay lubus maintindihan nita kay udwaya pinaburayhaw pag gayak niya.

Ipisu 3:3

Ipinakilala Diyus sa kangku ti madalum pag katutuuhanan udwaya daan ipinaburayhaw ga kang yi isinurat sa kabag-u.

Ipisu 3:9

Pinili niya aku hampay iadal niku sa tanan tawu nu kabitay pag matupad ti paggayakun Diyus unman daan ipinaburayhaw niya. Inda kaybi di waya ginan unman gid ipinaalam Diyus, imaw ti naglalang tanan bagay.

Ipisu 5:32

Inda ti usa ka pinakamahalaga ag madalum pag katutuuhanan. Kang isip inda tungkul sa kan Kiristu ag tungkul sa iglisya.

Ipisu 6:19

Daranginan diman niyu aku hampay pakan-an kang-ud gid pag baragawun, agud ilubus kang katutuman sa kang magpanudlu sa madalum pag katutuuhanan tungkul sa Mayad pag Barita.

Kulusas 1:26

Imaw yi ti madalum pag katutuuhanan, kaybi di waya ginan sa kadugayan pag panahun unman waya nipaburayhaw niya sa manga linahi, dapat taynguna ipinaalam yi Diyus sa manga nasakup sa kanya.

Kulusas 2:2

Nakan katida kang pagbuwatun hampay rumig-un kanda tagipusuun ag hampay sida paminsanun sa pagmahal. Nu katida may kang-ud sida pag-intindi sa katutuuhanan bag-u kilalan-un nida si Kiristu, imaw ti madalum pag katutuuhanan kaybi ginan udwaya ipinaburayhaw Diyus.

Kulusas 4:3

Kada kamu magdarangin, idarangin diman niyu kami hampay pakan-an kami Panginuun rugar sa makatudlu kay Bagaw ag hampay maipakilala ti madalum pag katutuuhanan ni Kiristu. Dahil sa kang magtudlu nakan aku pinirisu taynguna.

1 Timutiyu 3:16

Tutuu gid madalum ag makadululaw pag katutuuhanan nita surundanun magkun, “Napakilala siya Diyus sa kay nabilug tawu, pinatutuuhanan siya Ispiritu Banal, nakitan siya manga anghil, itinudlu siya sa manga nasyun tawu, una naan pag rugar may nagpaniwala sa kanya, tinanggap siya ati sa langit may kadayawan.”

1 Timutiyu 3:9

Dayu mahimu sida matinupadun sa madalum pag katutuuhanan tungkul sa kanta pagsarig nu may pag-alalahanun waya sida kasalanan sa kanda tagipusuun.