Ipisu 1:13 - Hanunuu

¹³ Dahil sa kan Kiristu, kamu pag manga balaw Hudiyu nagpatingi sa tutuu pag barita Diyus, sa Mayad pag Barita imaw tigpakaun karibrihan. Dahil diman sa kan Kiristu kamu nagsarig sa Diyus. Nakan ngani ipinakaun Diyus sa kanyu ti Ispiritu Banal imaw kay itinaratu Diyus, bilang puruyba kuntay kamu pinili Diyus hampay kay yi manga sakup.

Ipisu 1:13 Iomraidhean Croise

Kanta 119:43

Pabagawa aku sa kanmu tutuu pag manga bagaw sa tanan pag udas, dahil ti kang pag-asa asan lang sa kanmu manga sugu.

Huwil 2:28

“Bag-u ipakaun niku kang Ispiritu sa tanan tawu. Kanyu manga anak lalaki hanggan babayi manpadakit kang manga bagaw. Kanyu manga gurangun lalaki managin-up, ag kanyu manga kan-akan makakit manga pangakakitun.

Lukas 11:13

Madi kamu manga makasalanan, madunung diman kamu magpakaun mayad pag pakaun sa kanyu manga anak. Lalu ipakaun niyu Ama sa langit ti Ispiritu Banal sa tawu nu maghagad sa kanya.”

Lukas 24:49

Dapat ay ipakaun dapu niku sa kanyu ti itinaratu niku Ama. Pag-alagad waya kamu sitay sa banwa Hirusalim hanggan sa udwaya kamu maras-ugan kapangyarihan ginan sa langit.”

Huwan 1:17

Ti Kasuguan ipinadakit ni Muysis sa kanta. Dapat ginan sa kan Hisu-Kiristu pag naalaman nita ti mayad nabubut-un Diyus hanggan ti katutuuhanan tungkul sa kanya.

Huwan 14:26

Dapat suguun Ama ti Manug-awat ti Ispiritu ngani Banal sa kanyu sa manga napasakup sa kangku. Itudlu niya sa kanyu ti tanan pag manga bagay. Umawat siya sa kanyu hampay balaw malimtan niyu ti tanan manga itinudlu niku sa kanyu.

Huwan 15:26

“Sumitay ti Manug-awat ginan sa Ama tag sa kanyu, ti Ispiritu ngani imaw tigtudlu katutuuhanan tungkul sa Diyus. Suguun niku siya ginan sa Ama bag-u itultul niya sa kanyu ti tungkul sa kangku.

Huwan 3:33

Nu ti tawu magpaniwala sa kay pag-itultul, tunda ngani pag tawu tigpuruyba sa kay katutuuhanan Diyus.

Huwan 6:27

Danga kamu magbudlay tungkul lang sa karan-unun magkabangsiw. Pagmasigasid kamu hampay matanggap niyu ti karan-unun unman magkabangsiw, imaw ti makapakaun tutuu pag buhi unman may katapusan. Tunda ngani pag karan-unun ti ipakaun Anak Tawu sa kanyu dahil may tinanggap siya karampatan ginan sa Diyus Ama.”

Binwat 1:4

Ati katpung, kasaru waya nida si Hisus kay sinabi magkun, “Dag-ighit kamu ginan sa Hirusalim. Alagda gid niyu ti itinaratu ipakaun Ama sa kanyu imaw yi ti sinabi niku daan sa kanyu.

Binwat 13:26

Magkun si Pablu, “Manga kaparihu niku Hudiyu, manga linahi ni Abraham hanggan kamu pag manga balaw Hudiyu manga niabay sa surundanun Hudiyu, kita yi duy ti pinadakitan barita tungkul sa inda pag karibrihan.

Binwat 2:33

Dinara siya tabug sa langit ipinatukaw siya Diyus sa kay sikun baliwa minsan sa kay karampatan maghari. Tinanggap niya angay sa itinaratu Diyus ti Ispiritu Banal ginan sa Ama. Bag-u ilinubus niya ipinakaun ti Ispiritu Banal sa kanmi ga kanyu nakitan ag nadnugan taynguna.

Ruma 1:16

Balaw gid niku pag-ikakay-a ti Mayad pag Barita, dahil imaw yi ti kapangyarihan Diyus sa ikaribri kada tawu nu sumarig, una sa tanan sa manga Hudiyu, bag-u hanggan sa manga balaw Hudiyu.

Ruma 4:11

Tinuri siya bilang pinagkatanda sa kay pagkilala Diyus sa kanya kuntay matadlung siya dahil sa kay pagsarig una udwaya siya tinuri. Nakan siya yi ti pinagkagurang tanan tawu magsarig sa Diyus. Siyun ginan sida kinilala waydi Diyus kuntay manga matadlung una manga balaw tinuri.

Ruma 6:17

Dapat ay salamat sa Diyus, dahil kaybi kamu manga panawuhun kasalanan, taynguna bay masurundun yi kanyu tagipusuun sa iinadal pag katutuuhanan kanyu yi tinanggap.

2 Kurintu 1:22

Tinandaan niya kita kuntay kita kanya. Ipinakaun niya sa kanta ti Ispiritu mag-uli sa kanta tagipusuun, imaw kay puruyba matanggap nita kay manga itinaratu.

2 Kurintu 6:7

sa magbagaw katutuuhanan hanggan sa kamaskihan Diyus. Kanmi matadlung pag ugali buhi imaw kanmi armas panlaban hanggan panangga.

Galasya 3:14

Linukat kita ni Kiristu hampay ti manga papalad kay itinaratu Diyus sa kan Abraham tanggapun manga balaw Hudiyu ginan sa kan Kiristu Hisus. Nakan ngani nu sumarig kita sa kanya, tanggapun nita ti Ispiritu angay sa kay itinaratu Diyus.

Ipisu 4:21

Pinatingihan kabay niyu kay pag-iadal niya ag tinudluan yi kamu katutuuhanan tungkul sa kan Hisus.

Ipisu 4:30

Danga pagpakan-i niyu karukuan ti Ispiritu Banal Diyus dahil siya yi ngani ti pinagkapirma Diyus sa kanyu, ti puruyba hampay kamu kay pagkilalan-un aban nu rumas-ug ti taning kaudasan nu kita kay yi iribri.

1 Tisalunika 2:13

Inda waya ti pirmi pag-ipasalamat nimi sa Diyus, pagka itinudlu nimi sa kanyu kay Bagaw Diyus, tinanggap niyu tunda ga tutuu ngani Bagaw Diyus, bukun ga bagaw lang tawu. Kay kamaskihan Bagaw Diyus makitan diman gid waydi sa kanyu buhi dahil kamu manga magsarig.

2 Timutiyu 2:15

Pagmasigasid hampay makaatubang kawu sa Diyus, kanmu ugali pagmaangay sa kanya, manugbuwat unman may ikakay-a, matinupadun pag manugtudlu sa tutuu pag barita Diyus.

2 Timutiyu 2:19

Dapat marig-un kay ipinakana Diyus pag manga tudlu magkun, “Magkakilala di Panginuun nu si unu ti sa kanya.” Ag “Ti kada tawu magtawag sa Panginuun, pagpakarayu sa magbuwat kadautan.”

2 Timutiyu 3:15

Ginan sa diit di waya kawu, naanad yi kawu sa Banal Kasuratan, imaw ti makapakaun kadunungan sa kanmu sa ikaribri nimu nu kawu magsarig sa kan Kiristu Hisus.

Titu 2:11

Dahil ipinakakit Diyus kay pangaawa sa ikaribri tanan tawu.

Hibriyu 2:3

Kabitay kita dayu parusahan gid nu unman intindihun nita ti barita tungkul sa inda pag mahalaga pag karibrihan. Pagka sa kabag-u, Panginuun gid ti nagpaalam bag-u ti manga nakadnug sa kanya nagtultul maan sa kanta, pinatutuuhanan nida ti karibrihan.

Santiyagu 1:18

Angay sa kay kagustuhan binag-u niya kanta buhi pagka ipinakilala niya sa kanta ti bagaw katutuuhanan, hampay kita bilang ga kay yi akaan burak sa tanan niya linalang.

Santiyagu 1:21

Nakan ngani pagpatlikud kamu ginan sa kayagtingan niyu buwat; pagbul-a niyu ti daut pag ugali; pagpakumbaba kamu lubus ag tanggapa niyu ti Bagaw Diyus ti itinanum sa kanyu tagipusuun. Inda pag Bagaw Diyus ti makaparibri sa kanyu.

1 Pidru 2:10

Nu kaybi di waya gid kamu bukun kay nasyun Diyus, taynguna bay kamu kay yi pinili hampay kay nasakupan. Kaybi kamu kay inirangan balaw pagkaawaan. Dapat taynguna kamu kay kinaawaan.

Ipinakakit 7:2

Bag-u nakitan niku ti usa waya ka anghil nag-atag tungud baliwa sa butlakan init, may bitbit siya pananda ginan sa Diyus buhi. Nagbagaw siya daka sa upat ka anghil sa pinakan-an Diyus kamaskihan mandaut sa daga hanggan sa dagat magkun,