Ipinakakit 3:10 - Hanunuu

¹⁰ Ingatan diman niku kawu nu rumas-ug yi ti udas pagsubuk sa tanan manga tawu sa bilug kalibutan, dahil nag-agwanta kawu sa kanmu pagtupad sa kang bilin.

Ipinakakit 3:10 Iomraidhean Croise

Isayas 24:17

Kamu pag manga nasakupan manga nasyun sa kalibutan, mag-alagad sa kanyu ti kadalaan hanggan ti kali, ag suduk.

Danyil 12:10

Mayamu ti manga magkilala sa katutuuhanan ti lumpiyuhun kanda buhi, ag makaintindi sida sa manga pagsabihun niku pag bagay. Dapat ti manga daut pagparargu sa pagbuwat kadautan, ag unman sida makaintindi sa manga pagsabihun niku pag bagay.

Sakaryas 13:9

Ag ti ikatlu pag bahagi masawad lumpiyuhun niku parihu sa pilak pag-ipalakaw sa apuy. Subukun niku sida parihu sa gintu pag-ipalakaw sa apuy nu lunsay ngatay unman. Mandarangin sida sa kangku ag sagtun niku sida. Sabihun niku, ‘Sida kang nasakupan.’ Ag sabihun diman nida, ‘Ti Panginuun kanmi Diyus.’ ”

Matiyu 24:14

Itudlu dapu sa bilug kalibutan ti Mayad pag Barita tungkul sa kay paghari Diyus hampay lalu maalaman tanan nasyun. Bag-u di rumas-ug ti katapusan.”

Matiyu 26:41

Pagmaimatahan kamu, pagdarangin gid hampay kamu balaw madara sa tuksu. Ti naisipan mana alistu, dapat ay ti bilug malumuy.”

Matiyu 6:13

Danga ipalakaw nimu kami sa mahigpit pagsubuk, dapat ingatan nimu kami sa May Puun Kadautan. Dahil kawu yi ngani tig hari may kamaskihan hanggan kadayawan hanggan waya aban. Amin.’

Markus 14:9

Ungud duy kang pagsabihun sa kanyu, una naan pag itudlu ti Mayad pag Barita sa buu kalibutan, hanggan ti binwat babayi matultul diman bilang ga pag-alaala sa kanya.”

Lukas 2:1

Sa ati katpung nagras-ug kay bilin ni Pangulu Hari Agustu magkun, kailangan sinsuhun ti tanan tawu sa kay kaharian.

Huwan 17:6

“Ipinakilala niku kawu sa manga tawu kanmu iinintirga sa kangku ginan sa kalibutan. Daan sida manga sakup nimu bag-u kanmu iinintirga sida sa kangku ag tinupad nida kanmu bagaw.

Ruma 1:8

Una sa tanan, magpasalamat aku sa kang Diyus sa panab-anan ni Hisu-Kiristu dahil sa kanyu tanan, dahil ngani kanyu pagsarig sa kan Kiristu nibantug sa buu kalibutan.

1 Kurintu 10:13

Unman may subuk rumas-ug sa kanyu nu unman mabata niyu. Masarigan gid ti Diyus, balaw pahintulutan niya kamu subukan sa udyi niyu makaya. Dapat dungan sa subuk magbuwat siya paraan hampay makalawuy kamu sa kakurian, hampay maagwanta niyu ti subuk.

Ipisu 6:13

Nakan ngani isulung niyu ti panangga ginan sa Diyus. Nu katunda makatiis kamu sa kanyu maglaban nu rumas-ug ti daut pag udas. Bag-u nu matapus tunda kanyu naglaban, marig-un diman kamu sa kanyu pagsarig sa Panginuun.

2 Timutiyu 2:12

Nu kita mainagwantahun sa kakurian humari diman kita kaibahan ni Kiristu. Nu itanggi nita siya sa atubangan manga tawu, itanggi waydi niya kita.

Santiyagu 3:12

Manga patar-ari, balaw mamurak ulibu ti puun igus. Balaw diman waydi lumuwang ti danum matab-ang sa bulbugan maasin.

1 Pidru 4:12

Mahal niku pag manga patar-ari, danga niyu kadulawan ti manga mabuyat pagsubuk kanyu magkalakawan. Kanyu aw lugud isip kamu lang ti pagsubukan?

2 Pidru 2:9

Ti Panginuun madunung magparibri sa manga lubus napasakup sa kanya nu may malakawan sida subuk. Madunung waydi siya sa manga unman matadlung hampay sida maparusahan hanggan sa udwaya udas sintinsiya.

Ipinakakit 1:9

Aku si Huwan, kanyu patar-ari. Magpakiusa kita sa kan Hisus, nakan parihu kita makalakaw sa kakurian, kanta gid pag agwantahun dahil sa kanta magpasakup sa kay paghari Diyus. Tinulak aku atag sa puru Patmus sa karaw-an dagat dahil sa kang magtudlu Bagaw Diyus imaw yi ti katutuuhanan kay ipinakilala ni Hisus.

Ipinakakit 11:10

Nu mamatay aban tunda pag duwa ka manugpadakit bumaya ti tanan manga tawu sa kalibutan. May pistahan sida, bag-u mamarakan-an waya dahil tigbak yi tunda pag duwa ka purupita ti namakaun subra pag kakurian sa kanda.

Ipinakakit 13:10

Una hintay pag tawu ti pagturuminuhun hampay mabihag, pihu gid siya mabihag aban. Una hintay ti pagturuminuhun hampay mamatay sa baladaw, pihu gid siya matyun baladaw aban. Nakan ngani kailangan ti manga napasakup sa Diyus pagpakarig-un kay pagsarig.

Ipinakakit 13:14

Dinaya niya ti tanan tawu sa babaw daga dahil sa manga tanda ipinabuwat sa kanya sa atubangan usa ka hayup malangas. Nagarya niya ti manga tawu hampay bumwat tawu-tawu ga hayup malangas, imaw ti nabiyagan baladaw dapat nag-ayad di maan.

Ipinakakit 13:8

Sumamba sa kanya ti tanan tawu magkabuhi sa babaw daga, purya lang ti manga tawu kay ngaran nisurat yi sa ribru kabuhian ginan waya sa pagkalalang kalibutan. Tunda pag ribru kay apu ti Anak Karanidu imaw ti minatay.

Ipinakakit 14:12

Nakan ngani kailangan pagpakarig-un ti manga napasakup sa Diyus, ti manga magsunud ngani sa kay sugu Diyus ag unman mag-urung sa kanda pagsarig sa kan Hisus.

Ipinakakit 14:6

Nakitan maan niku ti usa ka anghil maglayang sa tungud may dara siya unman may katapusan pag Mayad pag Barita hampay ipadakit niya sa manga tawu mag-uli sa babaw daga, sa kada nasyun, sa kada linahi, sa kada pamagaw hanggan sa kada kalasi tawu.

Ipinakakit 16:14

Tunda pag manga labang magbuwat manga makadululaw. Pagpalibutan nida ti tanan manga hari sa bilug kalibutan hampay kanda tipunun tabug sa gira ati katpung aban nu kaudasan yi Diyus makamaskihan sa tanan. Tunda katpung aban pag kaudasan daka gid kay kabantugan.

Ipinakakit 17:2

Sa tunda pag babayi pag nagpauragin ti manga hari sa babaw daga, ga nalangu ti tanan tawu sa bilug kalibutan sa kay pinagkaalak niya, sa magpanguragin.”

Ipinakakit 17:8

Ti kanmu nakitan pag hayup malangas buhi nu kaybi, kainda bay udyi dapat lumuwang maan uman ginan sa kaabasad-basadan bag-u midamhak di gid maan siya aban. Ti manga tawu magkabuhi sa babaw daga ag kanda ngaran unman nakalista sa ribru kabuhian ginan waya sa gimpuunan kalibutan, tunda pag manga tawu lumingut nu makitan nida ti hayup malangas. Dahil kaybi buhi, siyun ginan udyi siya, dapat aban lumuwang maan.

Ipinakakit 2:10

Danga duy kadalaan nimu ti manga kakurian kanmu patabgan udyi dugay aban. Malu, ipapirisu diyablu ti iba sa kanyu hampay kamu kay subukan. May tiisun gid kamu sa sulud sampulu ka sirang. Pagpakarig-un duy kawu hanggan tugka sa kamatayan bag-u pakan-an niku kawu buhi imaw yi kang pirimyu sa kanmu nanalu.

Ipinakakit 3:8

Alam niku kanmu manga buwat. Binukasan niku ti usa ka sabian sa kanmu katpungan. Unman may makasiradu tunda pag sabian. Alam niku diit diit lang kanmu kaya dapat sinunud nimu kang itinudlu ag unman nimu ipinaulam kanmu pagsarig sa kangku.

Ipinakakit 6:10

Magpamurus sida sa tawag magkun, “Panginuun, kawu ti makamaskihan, ti banal hanggan ti masarigan. Kabitay waya kadugay kami pag mag-alagad. Kapira waya pag sintinsiyahan nimu sa kaparusahan ti manga tawu mag-uli sa babaw daga dahil sa kanda nagmatay sa kanmi.”

Ipinakakit 8:13

Bag-u nakitan niku ti usa ka agila maglayang sa tungud. Nadnugan niku siya nagbagaw daka magkun, “Masyadu yi lang madala ti malakawan tanan tawu magkabuhi sa babaw daga sa tunug manga budyung nu uypun tulu waya ka anghil.”