Husyas 9:10 - Hanunuu

¹⁰ Magkun ti Panginuun, “Manga taga Israil, katpung pinili niku kanyu manga ginurang bilang kang nasakupan, nagbaya gid aku. Parihu sa tawu nagbaya pagka nakakit siya ubas magtubu sa tigangan ngatay pagka nakakit siya un-an pag burak igus. Dapat pagka nag-atag sida sa Baal Piyur, inintirga nida kanda sadili sa makakaray-a pag diyus-diyusan ag niparihu sida sa manga mayagting pag diyus-diyusan kanda pagmahalun.

Husyas 9:10 Iomraidhean Croise

1 Hari 16:31

Kurang waya sa kanya ti pagsunud sa manga kasalanan binuwat ni Hirubuam, bin-ul waya niya ag inasawa si Hisibil kay anak ni Hari Itbaal taga Sidun. Tunda ginan, nagsirbi siya ag nagsamba sa diyus-diyusan Baal.

2 Hari 17:11

Nagsunug sida manga kamangyan sa kada simbahan sa abwat pag manga rugar, parihu sa binuwat manga nasyun ipinalayas Panginuun sa panab-anan nida. Nagbuwat sida daut pag manga bagay pag-ikagalit Panginuun.

Kanta 115:8

Ti magbuwat sa katida pag manga diyus-diyusan ag ti tanan pag magsarig sa kanda bumaliw diman ga kanda unman may pulus.

Kanta 81:12

Nakan pinabay-anan niku kamu sa kanyu kaganitan ulu, ag binwat niyu kanyu pagkaibgan.

Kanta ni Sulumun 3:6

Si unu nguna inda ti pararas-ugun ginan sa pangawakawaan ga sa madamul pag anus may hungaw mira ag kamangyan — manga pamanglu pag-ipabili manugnigusyu?

Isayas 28:4

Inda pag banwa asan sa maabunda pag karatagan, pat-ay kay karinuan inda madura ga busang magkarubay. Kadaka maragdag tunda parihu sa un-an burak igus pagbul-un ag kadaka pagkan-un kada makakit.

Hirimyas 11:13

“Kamu pag manga taga Huda, pagkayamu kanyu manga diyus-diyusan, parihu kay kayamu sa kanyu manga banwa. Ag nu kabitay kayamu ti manga baklayan sa Hirusalim, katida diman kay kayamu ti harandugan ipinatindug niyu hampay sunugan kamangyan para sa mayagting pag diyus-diyusan ni Baal.

Hirimyas 24:2

Ti manga igus sa usa ka alat marinu, lutu, ag bag-u puti. Dapat ti manga igus waydi sa usa ka alat nalugu yi ag balaw yi makaun.

Hirimyas 3:24

Ginan waya sa kanmi pag kaanak, ti manga makakaray-a pag diyus-diyusan imaw ti namakinabang sa manga binudlayan nimi manga kaumputan. Bin-ul kanda manga hayup hanggan kanda manga anak.

Hirimyas 3:25

Kailangan ngani duy kami patagu dahil sa kay-a dahil kami hanggan kanmi manga ginurang nagsalan sa kanmu, Panginuun nimi Diyus. Ginan waya sa pagkaanak nimi tugka kainda, unman duy kami sinmunud sa kanmu.”

Hirimyas 31:2

Aku, ti Panginuun, magsabi alagaan niku ti manga nasawad buhi sa kanda habang magbaklay sida sa pangawakawaan. Bumalik aku hampay pakan-an paraharyan ti Israil.”

Hirimyas 5:31

Ti manga purupita magpaburayhaw kapudilan. Ti manga manughandug magdumara angay sa sadili nida kapangyarihan. Katida ti pagkaibgan manga nasakupan niku. Dapat unu ti buwatun nida nu rumas-ug yi ti katapusan?”

Isikil 20:8

“ ‘Dapat naglaban sida sa kangku, ag unman sida namatingi. Unman nida binugyahan ti mayagting pag manga diyus-diyusan Ihiptu. Nakan magkun aku ipaagum niku sa kanda kang masyadu pag pangagalit ati sa Ihiptu.

Husyas 11:1

Magkun ti Panginuun, “Katpung anak waya ti Israil, pagmahalun niku siya. Tinawag niku siya ginan sa Ihiptu bilang kang anak.

Husyas 13:5

Inalagaan niku kamu sa pangawakawaan, sa tigangan pag rugar.

Husyas 2:15

Iuli niku sa kanya kay manga tanman ubas, ag buwatun niku ti Karatagan Akur dalan manpaala-ala mayad pag paratabgan. Sagtun niya aku parihu sa kay binwat katpung anak waya siya, katpung sa kay pagluwas niya sa Ihiptu.”

Husyas 4:14

Dapat balaw niku sida parusahan sa kanda pagbuwatun daut dahil kamu hanggan pag manga lalaki mag-ulid diman sa manga babayi baraydan ati sa Balay Diyus, ag maghandug waya kamu kaibahan nida para sa manga diyus-diyusan. Nakan dahil kamu pag nasakupan unman may intindi tungkul sa katutuuhanan, midamhak kamu.

Husyas 4:18

Pagkatapus nida inum irinmun makalangu, sigi lang sida sa ulid sa manga babayi baraydan. Kanda manga takinan gustu gid bumuwat kakay-ahan kaysa kadayawan.

Amus 4:5

Pagsunug kamu tinapay may pamadaka bilang handug pasalamat sa kangku. Malu, ipadayaw niyu tunda hanggan kanyu manga buluntad pag handug, dahil tunda kanyu pagkaibgan buwatun. Aku, ti Panginuun Diyus, ti magsabi inda.

Mikas 7:1

Magkun si Mikas, “Kaawaawa aku! Ga tawu aku magkalun-us maghanap manga nasawad burak ubas ngatay igus dapat ay unman aku may nakitan una di usa.

Bilang 15:39

Inda pag manga paraway-raway imaw ti pumaala-ala sa kanyu sa tanan niku manga sugu hampay tupadun niyu inda ag balaw kanyu lang pag kagustuhan ti pagbuwatun niyu.

Bilang 18:13

Ungud, kanyu ti tanan kalakal kanda pag-ihandug sa kangku ginan sa un-an patubas nida daga. Mahimu kumaun inda una si unu sa kanmu magtal-anakan ti malumpiyu.

Ruma 6:21

Hintay nguna pag masulung kanyu nakitan ati katpung? Tunda lang pag manga buwat kanyu pag-ikay-a taynguna, dahil kay patabgan ngani kamatayan.

Diyuturunumiyu 32:10

Nakitan niya sida sa tigangan daga, sa rugar harus unman may magtubu tanum. Inalagaan niya sida ag binantayan parihu sa pag-alaga tawu sa kay alintawu mata.

Diyuturunumiyu 32:17

Nagsagda sida sa manga labang balaw tutuu pag diyus — manga diyus balaw nida kilala ag bag-u lang linmutaw, ag balaw ginalang nida manga ginurang.

Diyuturunumiyu 4:3

Nakitan niyu ti binwat Panginuun sa Baal Piyur. Minatay Panginuun niyu Diyus ti manga kaparihu niyu Israilita nagsamba sa kan Baal.

Talaghusay 6:32

Siyun ginan iningarnan si Gidyun “Hirubaal” kay ibug sabihun, “Pabay-ani idipinsa ni Baal kay sadili,” dahil dinaut niya ti harandugan ni Baal.