Husyas 2:4 - Hanunuu

^4-5 Ag kamu kay manga anak balaw niku kaawaan, dahil manga anak kamu babayi magpanguragin. Makakaray-a ti pagbuwatun niyu ina ti naglusad sa kanyu. Magkun waya siya, ‘Mandasun aku sa kang manga lalaki imaw ti magpakaun sa kangku karan-unun hanggan danum, manga pisahan dilana ag linu, hanggan lana ulibu ag irinmun intus.’

Husyas 2:4 Iomraidhean Croise

2 Hari 9:22

Pagka nakitan ni Huram si Hihu, pinaingana niya siya, “Kahusayan aw kanmu inataytag Hihu?” Sinmagut si Hihu, “Kabitay bumaliw kahusayan nu may imaw diman pamulungan ag pagsamba sa manga diyus-diyusan ti inumpisahan nimu ina ni Hisibil?”

Isayas 27:11

Pagka nabari ag nalayung ti manga sanga, tinipun inda manga babayi ag binwat pamagba. Dahil sa unman may intindi inda pag manga tawu. Balaw sida kaawaan Diyus imaw ti naglalang sa kanda.

Isayas 50:1

Magkun ti Panginuun sa kay manga nasakupan, “Ipinurya aw lugud niku ti Hirusalim parihu sa usa ka lalaki nanayak sa kay asawa? Puruybahan niyu! Ipinabihag yi aw niku kamu parihu sa usa ka tawu ipinabili kay manga anak sa kay inutangan hampay buwatun suruguun bayad sa kay utang? Unman gid! Ipinabili kamu dahil sa kanyu kasalanan. Dinayu ti Hirusalim dahil sa kanyu paglapastangan.

Isayas 57:3

Dapat kamu pag manga linahi panhirian, ag manug-uragin, hanggan manga babayi baraydan, pagpakarani kamu hampay kamu sintinsiyahan.

Hirimyas 13:14

Panlintugun niku sida sa usa kag usa, ti gurang ag ti anak. Balaw gid aku maawa sa pagmatay sa kanda. Aku, ti Panginuun ti magsabi inda.’ ”

Hirimyas 16:5

Magkun waya ti Panginuun, “Danga kawu magsulud sa manga balay may manga namatay. Danga kawu magpanrukuan sa kanda ngatay pumakakit magkaawa una sa kantapu. Dahil bin-ul yi niku kang pagmahal ag pangaawa sa inda pag manga tawu.

Isikil 23:25

Sa kang masyadu pag pangagalit sa kanmu, paparusahan niku kawu sa kanda. Ag sa kanda pangagalit puldun nida kanmu irung ag manga tuli. Bihagun nida kanmu manga anak, ag ti masawad panmatyun nida baladaw ngatay sunugun.

Isikil 8:18

Nakan masamitan nida kang pangagalit. Balaw gid niku sida kaawaan. Una manringgit waya sida mabisug sa paghagad awat sa kangku, balaw niku sida patingihan.”

Isikil 9:10

Nakan unman gid niku sida kaawaan bagkus buwatun diman niku sa kanda ti binwat nida sa iba.”

Husyas 1:2

Inda ti ka bag-u sinabi Panginuun sa kan Husyas: “Pag-asawa kawu babayi magpanguragin, ag kanyu manga anak kilalan-un anak babayi uragin. Dahil inda ti mustara magpanguragin niku nasakupan sa panab-anan nida pagpatlikud sa Panginuun hanggan pagsamba sa manga diyus-diyusan.”

Husyas 1:6

Namuduy maan si Gumir ag nanganak babayi. Magkun ti Panginuun sa kan Husyas, “Ingarni ti anak Lu Ruhama, dahil balaw niku kaawaan ngatay patawadun ti nasakupan Israil.

Husyas 5:7

Pinudilan niyu aku dahil kanyu manga anak, anak niyu sa luwas. Nakan taynguna, rurisun niku kamu hanggan kanyu manga daga sa sulud usa lang ka bulan.

Sakaryas 1:12

Magkun ti anghil Panginuun, “Panginuun Makamaskihan, tugka duy kapira pag pakurianan nimu ti Hirusalim hanggan ti manga iba waya banwa sa Huda? May 70 yi ka timpu duy kawu magkagalit sa kanda?”

Huwan 8:41

Dapat kanyu ngap pagbuwatun ti buwat niyu ama.” Sinabi nida sa kanya magkun, “Balaw kami iinanak sa kalyag. Usa-usa lang gid kanmi ama, ti Diyus yi ngani.”

Ruma 11:22

Sitay pag makilala nita kay kaayadan Diyus hanggan kay kaisugan. Magpangisug siya sa manga nagkasala sa kanya, dapat mayad siya sa kanmu nu udyi kawu pablag sa kay kaayadan. Nu bay kawu pablag, puldun diman kawu.

Ruma 9:18

Nakan ngani pagkaawaan Diyus nu kay gustu niya kaawaan, ag pagpaganitun niya ti tagipusuun tawu nu kay gustu niya paganitun.

Santiyagu 2:13

Udyi kaawaan Diyus sa kay magsintinsiya ti tawu unman madunung magkaawa. Dapat ti tawu nu madunung magkaawa, unman kailangan magkadala sa parusa Diyus.