Husyas 13:10 - Hanunuu

^10-11 Taynguna naan kanyu hari hanggan manga takinan sa kanyu banwa ti manribri sa kanyu? Naan yi ti hari hanggan ti manga takinan niyu hinagad sa kangku? Dahil sa kang pangagalit ipinakaun niku inda sa kanyu, ag dahil diman sa kang pangagalit bin-ul niku sida.

Husyas 13:10 Iomraidhean Croise

1 Hari 12:20

Pagka nabaritaan tanan Israilita kuntay nakauli yi si Hirubuam, ipinatawag nida siya sa usa ka tiripun ag binwat nida siya hari sa buu Israil. Kay lahi lang ni Huda ti nagpirmaminti tapat sa paghari manga linahi ni Dabid.

2 Hari 17:4

Pagka sa uryan, unman yi magbayad buhis si Husyas parihu sa kay pagbuwatun kada timpu, ag nanhagad siya awat sa kan Hari Su taga Ihiptu. Pagka naalaman ni Salmanisir kay nagdaya ni Husyas, dinakup niya siya ag pinirisu.

Kanta 10:16

Panginuun, kawu ti hari unman may katapusan. Madura ti daut pag manga nasyun sa kalibutan kanmu linalang.

Kanta 149:2

Pagbaya ti manga taga Israil dahil sa kanda Manuglalang. Pagbaya ti nasakupan Siun dahil sa kanda Hari.

Kanta 44:4

Kawu kang Diyus ag Hari magpakaun panalu sa kanmi manga linahi ni Hakub.

Kanta 74:12

Kawu, Diyus, ti kanmi hari ginan waya sa kabag-u, ag mayamu yi bisis irinibri nimu ti manga tawu sa kalibutan.

Kanta 89:18

Panginuun, Banal pag Diyus Israil, kawu ti nagpili sa kanmi hari, ag siya ti magbaliwa sa kanmi.

Isayas 33:22

Buwatun inda Panginuun dahil siya kanta talaghusay, manugbuwat batas, ag hari. Siya ti rumibri sa kanta.

Isayas 43:15

Aku ti Panginuun, kanyu Banal pag Diyus, ti naglalang sa Israil, kanyu Hari.

Hirimyas 2:28

Hayga? Naan yi ti manga diyus binuwat niyu para sa kanyu sadili? Tawagun niyu sida nu kaya nida kamu iribri sa kakurian niyu. Pagkayamu kanyu manga diyus, parihu kay kayamu sa manga banwa sa Huda.

Hirimyas 8:19

Patingihi niyu ti lulumian manga kasimanwa niku kuntay mag-adnugan inda sa buu daga. Magkun sida, “Unman yi aw lugud ti Panginuun sa Hirusalim? Unman yi aw lugud ati ti Diyus, ti Hari sa Hirusalim?” Sinmagut ti Panginuun, “Hayga niyu aku ginalit sa panab-anan niyu pagsamba sa manga diyus-diyusan unman may pulus?”

Karukuan 4:20

Nadakup nida kanmi hari ti pinili Panginuun, ti pagsarigan nimi mangalaga sa kanmi laban sa manga kalaban pag nasyun.

Husyas 10:3

Pihu aban sumabi sida, ‘Unman kami may hari dahil unman kami naggalang sa Panginuun. Dapat una may hari kami, unman diman siya may mabuwat mayad para sa kanmi.’

Husyas 13:4

“Aku ti Panginuun niyu Diyus ti nagpalwas sa kanyu sa Ihiptu. Unman yi kamu may iba kilalan-un Diyus ag Manugribri nu unman aku lang.

Husyas 3:4

Dahil kay ibug sabihun, maduraan hari hanggan takinan ti nasakupan Israil sa kadugayun pag panahun. Maduraan diman manga handug hanggan aramirawan pag batu, katunda diman ti ipud garamitun sa panhula hanggan ti manga diyus-diyusan.

Husyas 7:7

Sida tanan maglabdab gid sa pangagalit parihu sa mainit pag hurnu, nakan minatay nida kanda manga takinan. Nidamhak ti tanan nida manga hari, dapat unman gid una di usa sa kanda ti nanhagad awat sa kangku.

Husyas 8:4

Nagpili sida manga hari hanggan manga manugpamahala balaw niku pinili. Nagbuwat sida manga diyus-diyusan ginan sa kanda manga pilak ag gintu. Ag inda pag manga diyus-diyusan imaw ti nagdara kadamhakan sa kanda.

Sakaryas 14:9

Ti Panginuun ti humari sa buu kalibutan. Siya lang ti kilalan-un Diyus ag udyi may iba waya.

Huwan 1:49

Magkun si Natanail, “Maisturu, kawu yi duy ti Anak Diyus, kawu yi ti Hari nasyun Israil.”

1 Samwil 8:7

Magkun ti Panginuun sa kanya, “Buwata ti pagsabihun manga tawu sa kanmu, balaw kawu kanda pagdayuun nu unman aku ngap.