Huswi 6:4 - Hanunuu

⁴ Paunahun nimu sa Kaban Kasunduan ti pitu ka manughandug ti kada usa sa kanda may dara budyung. Sa ikapitu pag sirang, pagpalibut kamu sa banwa pitu ka bisis, kaibahan ti manga manughandug magpatunug kanda manga budyung.

Huswi 6:4 Iomraidhean Croise

Gimpuunan 2:3

Pinapaladan niya ti ikapitu pag sirang ag binwat banal, dahil sa tunda pag sirang nagpahari siya igu namhan niya ti tanan.

1 Hari 18:43

Pagkatapus, magkun siya sa kay suruguun, “Pagtukad kawu ag pagbantay sa dagat.” Ag sinunud inda suruguun. Pagbalik niya sa kan Ilyas, magkun siya, “Unman duy aku may mag-akitan.” Pitu ka bisis sinabi ni Ilyas kuntay pagbalik siya pagbantay.

2 Hari 5:10

Namasugu si Ilisyu manugbarita hampay sabihun sa kan Naaman kuntay pag-atag siya sa Sapa Hurdan ag pagpatalgub siya ati makapitu ka bisis, bag-u maayadan yi siya.

2 Hari 5:14

Nakan linmakaw ngani si Naaman tabug sa Sapa Hurdan ag napatalgub kay sadili makapitu ka bisis, angay sa pagsabihun suruguun Diyus. Tunda ginan mayad yi kay sakit ag malumpiyu yi kay lukub parihu sa lukub lapsag.

2 Krunika 13:12

Ti Diyus kaibahan nimi; siya ti takinan nimi. Patunugun niya manga manughandug ti manga budyung nida sa pagpanguna sa kanmi sa paglaban sa kanyu. Manga nasakupan Israil, danga kamu magsalumpang laban sa Panginuun, ti Diyus niyu manga ginurang, dahil balaw gid kamu manalu.”

2 Krunika 20:17

Balaw yi kailangan manlaban waya kamu. Pag-alistu lang kamu ag pagpakarig-un, bantayi niyu ti panalu buwatun Panginuun para sa kanyu. Kamu pag manga taga Huda ag taga Hirusalim, danga kamu magkadala ngatay magpanlubay. Atubanga niyu sida aldaw ag ti Panginuun manguyug sa kanyu.’ ”

2 Krunika 20:19

Pagkatapus, tinmindug ti iba manga Libita ginan sa manga magtal-anakan nida ni Kuhat ni Kura ag nagdayaw sa Panginuun, ti Diyus Israil, sa mabaskug gid pag busis.

2 Krunika 20:21

Pagkalawuy niya nahampang ti manga tawu, nagpili siya manga manugkanta umuna sa kanda ag manganta sa Panginuun hampay dayawun siya sa kay banal pag nabubut-un. Inda kanda pag kantahun: “Pasalamatan ti Panginuun dahil kay pagmahal unman may katapusan.”

Hub 42:8

Nakan kainda pagbuul kamu pitu ka tudu baka ag pitu ka karanidu lalaki bag-u pag-atag kamu sa kan Hub, ihandug niyu inda bilang handug pagsunugun para sa kanyu sadili. Mandarangin si Hub para sa kanyu ag dungugun niku kay darangin; balaw niku kamu parusahan angay sa kanyu balaw may namuangan. Unman bay kamu nagbagaw kang-ud tungkul sa kangku parihu sa binuwat ni Hub, kang manugsirbi.”

Isayas 27:13

Nu tumunug ti budyung mabisug, magbinalik sa Hirusalim ti magkakurian pag manga Israilita nabihag Asirya ag Ihiptu. Sambahun nida ti Panginuun sa banal pag bantud Hirusalim.

Libitiku 14:16

ag kay usa niya ka ituturu sa sikun pag kamang isaw-saw sa lana ag iwidwisik makapitu ka ulit sa atubangan Panginuun.

Libitiku 4:6

Isawsaw niya sa dugu kay ituturu ag iwidwisik makapitu ka ulit sa may atubangan limbun matakipan sa Banal pag Sulud-sulud ati sa atubangan Panginuun.

Sakaryas 4:2

Pinaingana niya aku, “Unu ti nakitan nimu?” Nagsagut aku, “Nakitan niku ti usa ka gintu pag paraulian sulu may malukung sa tungud kay paraulian lana. Sa kay palibut malukung may pitu ka sulul-an ti kada usa may pitu ka tubu lakawan lana.

Sakaryas 4:6

Sinabi niya sa kangku, “Bag-u niku sagtun kanmu paingana, patingihi inda ti pagsabihun Panginuun Makamaskihan tultulan nimu kan Surubabil: “Surubabil, matapus nimu ti pagpatindug sa Balay Diyus bukun sa panab-anan kabisugan ngatay kakayahan tawu nu unman sa panab-anan niku Ispiritu.

Bilang 23:1

Magkumun si Balaam sa kan Balak, “Pabwati aku sitay pitu ka harandugan, ag alistuhi aku pitu ka turiti baka ag pitu ka tudu karanidu.”

Huswi 6:13

ti pitu sa kanda inmuna maan sa Kaban Panginuun magpatunug kanda manga budyung. Ag katunda diman ti binwat manga sundalu — ti iba sa kanda sa unahan Kaban Panginuun ag ti iba sa uryan, habang parargu pagpatunugun ti manga budyung.

Huswi 6:3

Kawu hanggan ti tanan nimu sundalu manpalibut sa banwa usa ka bisis kada sirang, sa sulud unum ka sirang.

Huswi 6:5

Nu madnugan yi niyu ti aba pag tunug nida budyung, pagringgit mabaskug kamu tanan. Bag-u matumpag ti alad batu banwa ag makasulud kamu tanan unman may ampara.”

Ipinakakit 1:20

Inda kay kahulugan ti pitu ka pamgasan sa kang sikun pag kamang ag ti pitu ka sulu. Ti pitu ka pamgasan imaw ti manga anghil pitu ka iglisya ag ti pitu ka sulu gintu imaw ti pitu ka iglisya.”

Ipinakakit 1:4

Aku si Huwan ti may surat sa pitu ka iglisya sa Asya. Pagsa kanyu ti papalad hanggan ti kahusayan ginan sa Diyus. Siya ti Diyus kaybi ginan hanggan kainda hanggan waya aban. Pagsa kanyu ti papalad ginan sa pitu ka Ispiritu sa arani tukawan Diyus.

Ipinakakit 10:3

Nanawag siya daka, kay tawag ga ungal liyun kay kadaka. Pagka siya nanawag daka nagbagaw ti pitu ka kurarug linti.

Ipinakakit 15:1

Nakitan niku ti usa waya ka makadululaw ag makamaskihan pag tanda sa langit. May pitu ka anghil pasay may dara kahigpitan. Tunda yi ti pangatapusan pag kahigpitan dahil siti aban pag matabu kay pangagalit Diyus.

Ipinakakit 15:7

Ti usa sa upat ka linalang may buhi may ipinakaun sa kanda pitu, ayaw-ayaw usa ka pinggan malukung pasay gintu. Tunda pag manga pinggan malukung kay sukad punu pangagalit Diyus imaw ti may buhi hanggan waya aban.

Ipinakakit 16:1

Nadnugan niku ti daka pag bagaw ginan sa sulud Balay Diyus magsugu sa pitu ka anghil magkun, “Pag-ati yi kamu, buhusan niyu sa daga ti pangagalit Diyus ginan sa basad pitu ka pinggan malukung.”

Ipinakakit 5:1

Bag-u may nakitan aku sa sikun pag kamang Hari sa kay tukawan ti usa ka kasuratan malulunan may surat sa sulud hanggan sa luwas, siniradu pitu ka kula.

Ipinakakit 5:6

Bag-u may nakitan aku usa ka Anak Karanidu sa karaw-an tukawan hari, sa kay sangput ti upat ka linalang may buhi hanggan ti manga gurangun. Ti Anak Karanidu ga anyu minatay. May pitu ka sungay siya may pitu waydi ka mata, imaw ti pitu ka Ispiritu Diyus kay sinugu tag sa bilug kalibutan.

Ipinakakit 8:2

Bag-u nakitan niku may pitu ka anghil matindugan sa atubangan Diyus, pinakan-an sida budyung ayaw-ayaw.

Ipinakakit 8:6

Nag-alistu ti pitu ka anghil hampay uypun kanda manga budyung.