Hirimyas 6:19 - Hanunuu

¹⁹ Buu kalibutan, pagpatingi kamu! Mamadara aku kadamhakan sa manga tawu sitay bilang parusa sa kanda manga daut paggayakun. Dahil balaw nida pinatingihan kang manga bagaw, dinayu nida ti manga kasuguan niku.

Hirimyas 6:19 Iomraidhean Croise

Kabagawan 15:26

Pagkadat-an Panginuun ti manga pag-isipun manga daut pag tawu, dapat pag-ikabaya niya ti pag-isipun manga malumpiyu kay tagipusuun.

Kabagawan 28:9

Una si unu ti unman tumupad sa Kasuguan, pagkadat-an Diyus una kay darangin.

Isayas 1:2

Patingihi niyu langit ag daga, dahil magkun ti Panginuun, “Inalagaan niku ag pinadaka ti manga Israilita kang manga anak, dapat naglaban sida sa kangku.

Isayas 5:24

Nakan miparihu kamu sa dayami ngatay sa layung ilamnun mairub apuy. Miparihu diman kamu sa tanum kay manga gamut magkaluu ngatay busang pag-ipayag durus ga taypuk, dahil ipinurya niyu ti Kasuguan Panginuun Makamaskihan, ti Banal pag Diyus Israil.

Isayas 59:7

Magdaldali kamu bumwat kadautan ag maliksi kanyu kamang sa pagmatay manga unman may kasalanan. Pirmi daut kanyu pag-isipun, una naan tag kamu unman may pagbuwatun nu ud kadamhakan ag kadautan.

Isayas 66:18

Alam niku kanda pagbuwatun ag pag-isipun. Nakan rumas-ug aku tipunun niku kang manga nasakupan sa tanan nasyun, bag-u makitan nida kang kadayawan.

Hirimyas 11:11

Nakan aku, ti Panginuun magsabi, mamadara aku sa kanda kaparusahan kuntay unman nida makapaiwas. Una manhagad sida awat sa kangku, balaw niku sida patingihan.

Hirimyas 15:6

Dinayu niyu aku; pirmi niyu aku pagpatlikudan. Nakan aku, ti Panginuun, magkun ihunat yi niku kang manga kamang hampay rurisun kamu. Pagsawaan yi aku kaawaan kamu.

Hirimyas 17:10

Aku, ti Panginuun, mag-usisa sa tagipusuun ag isip tawu. Balusan niku ti kada usa angay sa kay pag-ugaliun ag manga buwat.

Hirimyas 19:15

“Pagpatingi kamu, dahil inda ti pagsabihun Panginuun Makamaskihan, ti Diyus Israil: Ipadara niku sa inda pag banwa hanggan sa manga baryu sa kay kalibut ti pagsabihun niku pag parusa dahil maganit kanda ulu ag dayu sida mamatingi sa manga pagsabihun niku.”

Hirimyas 19:3

Sumabi kawu, ‘Manga hari sa Huda ag nasakupan Hirusalim, patingihi niyu ti tultulanun Panginuun Makamaskihan, ti Diyus Israil. Inda ti pagsabihun niya: Mamadara aku kadamhakan sa inda pag rugar, una si unu ti makadnug inda dalaun gid.

Hirimyas 21:14

Dapat parusahan niku kamu angay sa manga pagbuwatun niyu. Irubun niku kanyu manga katalunan tugka ti tanan sa kanyu sangput mairub. Aku, ti Panginuun, ti magsabi inda.”

Hirimyas 22:29

Daga Huda, patingihi nimu ti bagaw Panginuun.

Hirimyas 29:19

Dahil balaw nida pinatingihan kang manga bagaw ti pirmi niku pagsabihun sa kanda sa panab-anan niku manga manugsirbi pag manga purupita. Ag hanggan kamu pag manga binihag balaw diman naniwala.” Aku, ti Panginuun, ti magsabi inda.

Hirimyas 4:14

“Manga taga Hirusalim, lumpiyuha niyu ti kadautan sa kanyu tagipusuun hampay maribri kamu. Tugka kapira kamu mag-isip sa daut?

Hirimyas 4:16

Sinugu sida kuntay paandami ti manga nasyun hanggan ti Hirusalim kuntay may maggira manga sundalu ginan sa arayu pag rugar mag-akat girahan laban sa manga banwa Huda.

Hirimyas 4:4

Lumpiyuha niyu kanyu manga tagipusuun sa atubangan Panginuun, kamu pag manga taga Huda ag taga Hirusalim, dahil nu balaw katida malakawan niyu ti isug niku ga apuy unman magkapsa dahil sa binwat niyu pag kadautan.

Hirimyas 49:37

Rurisun niku sida sa panab-anan manga kalaban nida magkaibug mumatay sa kanda. Ungud paras-ugun niku sa kanda ti kadamhakan dahil sa masyadu niku pag galit sa kanda. Aku, ti Panginuun, magsabi ipagira niku sida sa kanda manga kalaban tugka sa madura sida tanan.

Hirimyas 6:10

Namaingana aku, “Dapat Panginuun, si unu duy kang pakan-an pasandam? Si unu duy nguna ti mamatingi sa kangku? Pinut-an duy nida kanda manga tuli hampay balaw sida makadnug. Pagkadat-an duy nida ti bagaw Panginuun, nakan dayu sida mamatingi.

Hirimyas 6:18

“Nakan kamu pag manga nasyun, pagpatingi kamu. Bantayi niyu kaayad nu hintay ti mangyari sa kanda.

Hirimyas 8:5

Dapat kamu pag manga taga Hirusalim, hayga parargu kamu magpakarayu sa kangku? Hayga dayu tayakan niyu ti manga diyus-diyusan magpaumang sa kanyu ag pagbalik sa kangku?

Hirimyas 8:9

Mangay-a ti manga mag-isip madunung sida. Madala gid sida dahil pamihagun sida. Dinayu nida kang manga bagaw — buwatun aw nida inda nu ungud gid madunung sida?

Danyil 9:11

Naglabag ti tanan Israilita sa kanmu Kasuguan; balaw nida gustu sumunud sa kanmu pagsabihun. Ag dahil sa kanmi kasalanan, rinmas-ug sa kanmi ti saad, ti nakasurat sa Kasuguan ni Muysis, kanmu manugsirbi.

Husyas 10:13

“Dapat nagtanum kamu kadautan, nakan umani diman kamu kadautan. Nagpudil kamu, ag tunda ti burak niyu kadautan. Dahil sa magsarig kamu sa kanyu sadili kabisugan, parihu sa kanyu mayamu sundalu,

Husyas 4:6

“Nag-iridamhak kang manga nasakupan dahil kurang sida sa kaalaman. Dahil kamu gid ngap dinayu niyu ti kaalaman tungkul sa kangku, nakan dayuun diman niku kamu bilang manga manughandug niku. Kinalimtan niyu kang Kasuguan, nakan kalimtan diman niku kanyu manga anak.

Amus 2:4

Inda ti pagsabihun Panginuun tungkul sa Huda: “Dahil sa parargu pagbuwat kasalanan ti manga taga Huda, parusahan gid niku sida. Dahil binugyahan nida kang kasuguan ag unman nida sinunud kang manga surundanun. Pinatalang sida nida pagsirbi sa manga diyus-diyusan imaw diman ti sinirbihan nida manga ginurang.

Mikas 1:2

“Pagpatingi kamu kaayad, kamu tanan pag manga tawu mag-uli sa babaw daga. Dahil kumastigus ti Panginuun Diyus laban sa kanyu ginan sa kay banal pag Balay.”

Mikas 6:2

Ag kamu pag manga bantud, mapag-un pag manga patakinan kalibutan, patingihi niyu ti bangdan Panginuun laban sa manga Israilita kay manga nasakupan.”

Huwan 12:48

Dapat may sumintinsiya sa tawu nu siya magdayu sa kangku ag nu unman siya magpaniwala sa kang pagbagawun. Kang ngap manga binagaw imaw ti sumintinsiya sa kanya sa katapusan panahun aban.

Binwat 8:22

Nakan ngani kailangan iampu nimu inda pag kadautan. Pagdarangin duy kawu sa Panginuun hampay patawadun niya kawu sa inda pag daut kagustuhan nimu naisipan.

Diyuturunumiyu 30:19

“Taynguna pag sirang, nagtawag aku sa langit ag daga hampay kumastigus nu naan sitaay kanyu piliun: buhi ngatay kamatayan, papalad ngatay saad. Pilia mana niyu ti buhi hampay mabuhi kamu dugay hanggan kanyu manga anak.

Diyuturunumiyu 32:1

Langit, pagpatingi dahil mamagaw aku! Daga, patingihi kang manga bagaw.

Diyuturunumiyu 4:26

“Kainda pag sirang, saksi niku ti langit ag ti daga laban sa kanyu nu balaw niyu sundun aku, unman kamu dumugay sa kanyu manahun pag daga ati sa baliw dipay Hurdan. Mangulian kamu ati ngalay lang pag panahun, bag-u maruris kamu lubus.

1 Samwil 15:23

Ti paglapastangan sa Panginuun ga maghiri kay ka daut ag ti kaganitan ulu ga magsamba sa diyus-diyusan kay ka daut. Dahil sa kanmu pagbugya sa bagaw Panginuun, binugyahan diman niya kawu bilang hari.”

1 Samwil 15:26

Dapat magkun si Samwil, “Balaw aku mangiba sa kanmu. Dahil sa kanmu paglapastangan sa Panginuun, pagbugyahan yi niya kawu bilang hari Israil.”