Hirimyas 5:1 - Hanunuu

¹ Magkun ti Panginuun, “Manga taga Hirusalim, pag-atag kamu sa kanyu manga baklayan! Bantayi niyu kanyu manga buruybuyahan! Nu may mag-akitan kamu matadlung hanggan matinupadun, balaw niku wayakun ti banwa.

Hirimyas 5:1 Iomraidhean Croise

1 Hari 19:10

Sinmagut si Ilyas, “Panginuun, Diyus Makamaskihan, matinupadun duy aku magsirbi sa kanmu. Dapat dinayu manga Israilita ti kasunduan nida sa kanmu, winayak nida kanmu manga harandugan ag pinanmatay kanmu manga purupita. Aku wadi duy ti nasawad, ag paghingabtun diman nida aku matyun.”

2 Krunika 16:9

Dahil magbantay gid ti Panginuun sa buu kalibutan hampay pabaskugun ti manga tawu matinupadun sa kanya. Kabuangan kanmu binwat! Nakan kainda ginan pirmi yi kawu manlaban.”

Kanta 12:1

Panginuun, awati aku, dahil unman yi may nasawad maka-diyus hanggan masarigan.

Kanta 14:2

Ginan sa langit magbantay ti Panginuun sa manga tawu, agud usisaun nu may nakaintindi sa katutuuhanan ag magdangup sa kanya.

Kanta 14:3

Ti tanan nagsimray sa tutuu pag dalan ag parihu nagbaliw daut kanda buhi. Unman una di usa sa kanda ti magbuwat mayad.

Kanta 94:16

Unman may tuhay mag-awat sa kangku laban sa daut pag manga tawu, nu unman kawu lang gid, Panginuun.

Kabagawan 20:6

Mayamu ti magsabi tapat sida, dapat masarigan aw nguna sida?

Kabagawan 23:23

Pagsikap kawu makatanggap katutuuhanan, kadunungan, ag mayad pag-ugali hanggan pan-intindi. Ag danga gid nimu inda pagbalyuhan sa una hintay pag bagay.

Kabagawan 8:3

sa manga puwirtahan banwa, ag sa manga lakawan. Magtudlu siya mabaskug,

Kanta ni Sulumun 3:2

Nakan binmangun aku ag pinalibut niku ti banwa, ti manga dalan hanggan ti manga buruybuyahan. Linigaw niku kang mahal dapat unman niku siya nakitan.

Isayas 59:4

Balaw niyu pag-isipun ti katadlungan; ti manga bangdan niyu sa kanyu manga kaparihu pudu kapudilan. Daut kanyu manga pag-isipun, bag-u imaw tida kanyu pagbuwatun.

Hirimyas 2:29

Hayga magriklamu kamu sa kangku? Balaw aw kamu ti naglaban sa kangku?

Hirimyas 44:15

Pagkayamu Hudiyu ti nagtiripun ag namatingi sa kan Hirimyas. Mag-uli sida sa kanaway ag salatan sa Ihiptu. Ti manga lalaki ati ag may alam kanda asawa magtuub manga kamangyan sa manga diyus-diyusan, hanggan ti tanan manga babayi magtiripun ati nanabi sa kan Hirimyas,

Hirimyas 8:6

Pinatingihan niku mayad ti manga binagaw niyu, pat-ay balaw tutuu kanyu sinabi. Una si unu sa kanyu unman gid may nag-ampu sa kanyu kadautan. Unman may nagsabi kuntay, ‘Hintay lugud ti binuwat niku?’ Bagkus ngap, ti kada usa sa kanyu maliksi sa magbuwat kasalanan ga kabayu magpalagiw tag sa girahan.

Hirimyas 9:2

Nu may maulian lang mana aku sa pangawakawaan hampay makapakarayu aku sa kang manga kasimanwa, dahil sida tanan nandaya sa Panginuun ga babayi magpanguragin.”

Hirimyas 9:7

Nakan aku, ti Panginuun Makamaskihan, magkun lunsayun niku sida ga baul ag subukun. Hintay waya kang mabuwat sa kanda?

Isikil 22:30

“Nanhanap aku usa ka tawu mamauli alad batu banwa ag makaapin sa banwa hanggan makatindug sa tab-anan niku ag sa manga tawu hampay balaw niku dautun inda pag banwa, dapat unman aku may nakitan.

Isikil 9:9

Nagsagut siya sa kangku, “Masyadu yi gid ti kasalanan nasakupan Israil ag Huda. Masyadu yi ti maratyan ag unman yi may katadlungan sa banwa. Magkun waya sida, ‘Unman magbantay ti Panginuun sa kanta; binugyahan yi niya ti Israil.’

Danyil 12:4

Dapat Danyil, siraduha lang dap inda pag ribru ag danga dapu pagsabihan sa manga tawu inda pag barita tugka sa ud rumas-ug ti katapusan. Habang unman waya inda pag-itultul, mayamu ti manipag sa pag-intindi sa manga magpangyari.”

Huwil 2:9

Pagsalakayun nida ti banwa, pagdaykun waya ti manga alad batu. Pagdaykun waya nida ti manga balay ag maglakaw sa manga gaha ga mananakaw.

Amus 8:12

Gasaun kamu sa magpakahanap tawu makatultul kang bagaw sa kanyu, dapat unman gid niyu inda makitan una naan kamu pag umatag.

Sakaryas 2:4

ag magkun sa kanya, “Apura, sabihi ati pag kan-akan may dara panukat, ti Hirusalim bumaliw usa ka daka pag banwa unman may manga alad batu dahil sa subra mayamu kay nasakupan hanggan manga hayup.

Lukas 14:21

Nuli maan ti panawuhun itinultul sa kay amu kanda manga singyanan. Bag-u nagalit gid ti may puun balay, magkun sa kay panawuhun, ‘Pag-ati kawu kadali sa manga karsada hanggan sa manga dalan dariit sa banwa, tabana nimu sitay tag ti manga pugri, ti manga may pungkul, ti manga buta hanggan ti manga pilay.’

2 Tisalunika 2:10

Gumamit siya tanan paraan pag pamadaya hampay madaya tag sa kadautan ti manga midamhak, tunda ngani pag manga tawu miribri mana nu nangus kanda lang tinanggap ag minahal ti katutuuhanan.