Hirimyas 44:10 - Hanunuu

¹⁰ Taynguna tugka udwaya gid kamu magpakumbaba ngatay magkadala sa kangku. Unman diman kamu nagsunud sa manga kasuguan ag manga surundanun ipinakaun niku sa kanyu hanggan sa kanyu manga kaumputan.’

Hirimyas 44:10 Iomraidhean Croise

1 Hari 21:29

“Nakitan aw nimu nu kabitay nagpakumbaba si Akab sa kay sadili sa kang atubangan? Dahil sa nagpakumbaba niya, balaw niku ipadara ti kadamhakan sa kaudasan niya, nu unman ipadara niku inda sa magtal-anakan niya anak nu maghari yi inda.”

2 Hari 22:19

Pinatingihan niku kanmu darangin, dahil nagsisi kawu ag nagpakumbaba kanmu sadili pagka nadnugan nimu kang sinabi laban sa inda pag rugar hanggan sa manga nasakupan inda, kuntay saadan ag rurisun inda pag rugar. Ginisi waya ngani nimu kanmu rutay ag nanlumi sa kang atubangan. Nakan aku, ti Panginuun, magsabi

2 Krunika 32:26

Pagkatapus, nag-ampu si Isikyas sa kay pagpadayaw, ag katida diman ti nasakupan Hirusalim. Nakan unman pinadayun Panginuun kay pangagalit sa kanda habang magkabuhi waya si Isikyas.

2 Krunika 33:12

Sa kay kakurian, nagpakumbaba gid siya kay sadili ag nagpaawa-awa sa Panginuun niya Diyus, kuntay siya diman ti Diyus niya manga ginurang.

2 Krunika 33:19

Kay darangin hanggan ti sagut Panginuun sa kanya, hanggan ti tanan niya kasalanan ag paglabag sa Panginuun, nakasurat sa ribru manga Purupita. Nakalista diman sitay ti manga rugar pinatindugan niya manga simbahan, manga tulduk tanda diyusa si Asira, ag iba waya pag manga diyus-diyusan, bag-u waya siya nagpakumbaba sa Diyus.

2 Krunika 34:27

Pinatingihan niku kanmu darangin, dahil nag-ampu kawu ag nagpakumbaba sa atubangan niku pagka nadnugan nimu ti sinabi niku laban sa inda pag rugar ag sa manga mag-uli sitay. Ginisi nimu waya kanmu rutay ag nanlumi sa kang atubangan bilang pagpakakit karukuan nimu. Nakan aku, ti Panginuun, magsabi

Kanta 34:18

Arani ti Panginuun sa manga may karukuan kay tagipusuun. Pag-iribri niya ti manga nabul-an pag-asa.

Kanta 51:17

Diyus, ti handug makapasulung sa kanmu, imaw ti buhi mapinakumbabaun ag mag-ampu sa kay manga kasalanan. Inda pag kalasi handug balaw nimu pagbugyahan.

Kanta 78:10

Balaw nida sinunud kanda kasunduan sa Diyus; balaw nida sinunud kay kasuguan.

Pag-ighit 10:3

Nakan nag-atag sida ni Muysis ni Aarun sa hari Ihiptu bag-u sinabi sa kanya, “Inda ti pagsabihun Panginuun, ti Diyus manga Hibriyu, ‘Tugka kapira kawu magpalabaw-labaw sa kangku? Paighita yi nimu kang nasakupan hampay makasamba sida sa kangku.

Pag-ighit 9:17

Dapat magpalabaw diman kawu sa kang nasakupan, ag unman waya nimu sida pagpasnuan umighit.

Pag-ighit 9:30

Dapat alam niku kawu ag ti manga may kangaranan nimu unman waya magkadala sa Panginuun Diyus.”

Kabagawan 14:16

Ti madunung pag tawu magdahan sa kay sadili ag mag-aman sa gulu, dapat ti unman may intindi pag tawu balaw magdahan bagkus ngap harus-harus.

Kabagawan 16:6

Nu pagmahalun nita tapat ti Panginuun, patawadun niya kanta manga kasalanan. Nu paggalangun nita siya, makaaman kita sa kadautan.

Kabagawan 28:14

Mapalad ti tawu pirmi maggalang sa Panginuun, dapat ti tawu maganit kay tagipusuun midamhak.

Kabagawan 8:13

Ti maggalang sa Panginuun magkadaut sa daut. Pagkadat-an niku ti marapadayaw-dayaw, ti marapalabilabihun, ti daut pag-ugali, hanggan ti marapudil.

Isayas 42:24

Si unu ti nagpakaun pahintulut takawan ag agawan kasiyunan ti Israil? Unman aw ti Panginuun, siya ti pinagkasaraan nita? Dahil balaw nita sinunud kay manga palakaw hanggan kasuguan.

Isayas 57:15

Inda waya ti pagsabihun Kaabwat-abwatan pag Diyus, ti Banal pag Diyus buhi hanggan aban: “Mag-uli aku sa abwat ag banal pag rugar, dapat mag-uli diman aku kaibahan manga tawu mapinakumbabaun ag mapinatawadun, hampay sida kang pabisugun.

Isayas 66:2

Unman aw aku ti nagbuwat sa tanan bagay. Aku ti Panginuun ti magsabi inda. “Pagpahalgaan niku ti manga tawu mapinakumbabaun, marapatawad, ag magkadala sa kang manga bagaw.

Hirimyas 10:7

Si unu duy ti unman madala sa kanmu, Hari manga nasyun? Dapat lang galangun kawu. Unman duy kawu may kaparihu sa tanan matinudukun ginan sa tuhay-tuhay pag nasyun, aw ngatay sa tanan hari.

Hirimyas 26:4

Sabihun nimu sa kanda inda kang pagsabihun: Nu dayu kamu magpatingi sa kangku ag dayu magsunud sa kang ipinakaun pag sugu sa kanyu,

Hirimyas 32:23

Nagbaliw kanda inda dapat unman sida nagsunud sa kanmu ngatay sa kanmu manga kasuguan, bag-u balaw nida binuwat ti pag-ipabuwat nimu sa kanda. Nakan pinadaran-an nimu sida kadamhakan.

Hirimyas 36:24

Balaw gid nadala ti hari hanggan ti tanan niya takinan sa nadnugan nida sa pagkumnun kasuratan. Balaw nida ginitas kanda rutay palatandaan sa karukuan nida.

Hirimyas 44:23

Nangyari inda pag kadamhakan sa kanyu dahil nagsunug kamu manga kamangyan sa manga diyus-diyusan ag nagkasala sa Panginuun. Unman kamu nagsunud sa manga kasuguan, manga surundanun ag manga pag-itudlu niya.”

Hirimyas 5:3

Bag-u magkun aku, “Panginuun, magligaw duy kawu tawu matinupadun. Pinakurian nimu duy kanmu manga nasakupan dapat balaw mahalaga inda sa kanda. Pinarusahan nimu sida dapat dayu sida magpatudlu. Pinaganit nida kanda manga tagipusuun, dayu sida mag-ampu.

Hirimyas 6:15

Pag-ikay-a aw lugud nida kanda manga ugali mayagting? Unman! Dahil unman yi sida may kauyaan! Unman ngani magkalayhum kanda uyahun. Nakan midamhak sida parihu sa iba. Maruris sida sa udas parusahan niku sida. Aku, ti Panginuun, ti magsabi inda.”

Hirimyas 8:12

Pag-ikay-a aw lugud nida kanda manga ugali mayagting? Unman! Dahil unman yi sida may kauyaan! Unman ngani magkalayhum kanda uyahun. Nakan midamhak sida parihu sa iba. Maruris sida sa udas parusahan niku sida. Aku, ti Panginuun, ti magsabi inda.

Isikil 9:4

ag sinabihan, “Palibuta ti Hirusalim ag markahi ti bangas manga magpanruku dahil sa tanan mayagting pag pagbuwatun sa banwa.”

Malakyas 4:2

Dapat kamu pag manga maggalang sa kangku, malakawan niyu ti karibrihan ginan sa kangku. Parihu inda sa magsinggit init kay rayaw magpakaun kaayadan. Ag mangutbaw-utbaw kamu sa kabayaan parihu sa manga dumaraga baka ipinalwas ginan sa tudiran.

Matiyu 27:54

Pagka nadnugan nida ti linug ag pagka nakitan nida ti nangyari, nadala masyadu ti kapitan hanggan ti manga sundalu kaibahan niya magbantay sa kan Hisus. Magkun sida, “Tutuu ungud Anak Diyus inda.”

Lukas 23:40

Dapat sinmungyaw kay usa ka tulisan magkun, “Unman aw waya lugud kawu maggalang sa Diyus? Parihu kita nasintinsiyahan.

Ruma 11:20

Tutuu gid tunda. Pinlud sida dahil unman sida magsarig sa Diyus. Dapat kawu isinugdung dahil magsarig kawu sa Diyus. Nakan ngani, danga kawu magpalabi-labi, bagkus ngap pag-aman kawu.

1 Pidru 5:6

Nakan ngani pagpasakup kamu sa kamaskihan Diyus, hampay ipaabwat niya kamu nu rumas-ug kay taning pag udas.

Ipinakakit 15:4

Si unu nguna, Panginuun, ti unman magkadala sa kanmu? Si unu nguna ti dayu manultul sa kanmu kamaskihan? Kawu lang ti banal. Tanan pag manga nasyun pumakarani, sumamba sa kanmu. Dahil nakitan tanan tawu matadlung kanmu manga buwat.”