Hirimyas 2:6 - Hanunuu

⁶ Udyi nida aku hinanap una aku yi ti nagpalwas sa kanda sa Ihiptu hanggan ti nag-una sa kanda sa pangawakawaan unman may tanum — tigangan pag daga, may manga tuyungan, mahawag ag unman may mag-uli ngatay maglakaw.

Hirimyas 2:6 Iomraidhean Croise

2 Hari 2:14

Ihinampak niya sa danum ti kulimpay ni Ilyas ag nagsabi, “Naan yi taynguna ti Panginuun, ti Diyus ni Ilyas?” Pagka binuwat niya tunda, natunga rargu ti danum ag nagdipay siya.

Hub 3:5

Pirmaminti yi lang mana inda madlum aw ngatay natakluban madamul pag rurum, ag mana sinaput yi lang kadudulman ti rayaw sirang.

Hub 35:10

Dapat unman sida magpaawat sa Diyus, ti naglalang sa kanda ag magpakaun kabisugan sa udas kakurian.

Kanta 23:4

Una waya maglakaw aku sa kadudulman, balaw aku magkadala, dahil kaibahan niku kawu. Kanmu pamakul mag-alaga sa kangku; ag kanmu sugkud maggiya ag magpabisug sa kangku.

Kanta 77:5

Pag-isip-isipun niku ti manga sirang nakalawuy ag ti dugay yi pag manga timpu.

Pag-ighit 20:2

“Aku ti Panginuun niyu Diyus ti nagpalwas sa kanyu sa Ihiptu nu naan kamu pag binwat panawuhun.

Isayas 63:9

Sa tanan nida karukuan, magkaruku diman siya, ag irinibri niya sida sa panab-anan anghil nagpaburayhaw sa kay uyahun. Dahil sa kay pagmahal ag pangaawa irinibri niya sida. Kaybi di waya ginan, inalagaan niya sida sa tanan pag sirang.

Isayas 64:7

Unman una di usa sa kanmi ti maghagad ag maghingbut makahiyaput sa kanmu. Dahil napakarayu kawu sa kanmi, ag pinabay-anan nimu kami sa kanmi manga kasalanan.

Hirimyas 13:16

Dayawa niyu ti Panginuun niyu Diyus habang udwaya niya pag-ipadara ti kadudulman, ag habang udwaya kamu mag-italakpa sa madlum pag manga bantud. Ti rayaw pagsarigan niyu buwatun niya pingit pag kadudulman.

Hirimyas 2:2

“Pag-ati kawu sa manga taga Hirusalim, sabihun nimu inda sa kanda: ‘Magkatandaan niku kanyu pagkamatinupadun ag pagmahal sa kangku kaybi parihu sa babayi bag-u ipinaasawa. Inusig niyu aku una sa pangawakawaan unman may magtubu manga tanum.

Hirimyas 2:8

Una manga manughandug unman naghanap sa kangku. Ti manga manugtudlu Kasuguan unman magkilala sa kangku. Ti manga takinan nagalit laban sa kangku. Ti manga purupita nagpadakit sa ngaran ni Baal ag nagsunud sa manga diyus-diyusan unman may pulus.

Hirimyas 5:12

Unman sida magbagaw tutuu tungkul sa kangku. Magkun sida, ‘Balaw kita pakurianan Panginuun! Unman may madala rumas-ug sa kanta. Unman diman may gira ngatay lun-us rumas-ug.’

Hirimyas 5:2

Una paggamitun niyu kang ngaran sa kanyu magtaratu, magpudil diman kamu.”

Hirimyas 51:43

Bumaliw maruku ti manga banwa niya ga pangawakawaan yi unman may mag-uli ngatay udyi may lumawuy siyun.

Husyas 12:13

Sa panab-anan ni purupita Muysis, ipinalwas niku kamu pag manga Israilita sa Ihiptu ag inalagaan.

Husyas 13:4

“Aku ti Panginuun niyu Diyus ti nagpalwas sa kanyu sa Ihiptu. Unman yi kamu may iba kilalan-un Diyus ag Manugribri nu unman aku lang.

Amus 2:10

Ipinalwas diman niku sa Ihiptu ti manga ginurang manga taga Israil, ag sa sulud upatpulu ka timpu giniyahan niku sida sa pangawakawaan hampay apuun nida ti daga manga Amuriyu.

Matiyu 4:16

Ti manga tawu nitukmud sa basad kaduluman may makitan aban daka pag rayaw. Ti manga tawu sa sirung kapangyarihan kamatayan pakan-an ngap karayawan.”

Diyuturunumiyu 1:19

“Angay sa pag-isugu Panginuun nita Diyus, nighit kita ginan sa Bantud Sinai, bag-u naglakaw sa maluang ag madala pag pangawakawaan kanyu gid nakitan, bag-u inmatag kita sa kabantudan manga Amuriyu. Pagras-ug nita sa Kadis Barnia,

Diyuturunumiyu 32:10

Nakitan niya sida sa tigangan daga, sa rugar harus unman may magtubu tanum. Inalagaan niya sida ag binantayan parihu sa pag-alaga tawu sa kay alintawu mata.

Diyuturunumiyu 8:2

Isipa niyu nu kabitay kamu inibahan Panginuun niyu Diyus sa kanyu maglakaw sa pangawakawaan sa sulud upatpulu ka timpu. Binwat niya inda hampay kamu pumakumbaba ag sinubukan kamu hampay maalaman nu hintay gid ti basad niyu tagipusuun, nu tupadun niyu kay manga sugu ngatay unman.

Talaghusay 6:13

Nagsagut si Gidyun, “Nu kaibahan nimi ti Panginuun, hayga unman siya magbuwat manga makadululaw parihu sa kay binwat kaybi pagka ipinalwas niya sa Ihiptu kanmi manga ginurang, angay sa kanda sinabi sa kanmi? Dapat taynguna pinabay-anan yi kami Panginuun ag ipinahintulut sa manga Midyanita.”