Hibriyu 9:12 - Hanunuu

¹² Kas-a lang gid pag nagsaka si Kiristu ati sa Pinakabanal pag Sulud-sulud, udyi kailangan ulitun. Sa kay nagsaka may dara diman siya dugu hampay siya makaatubang sa Diyus, dapat balaw dugu kambing, balaw diman dugu ibun baka nu unman kay ngap sadili pag dugu. Nakan unman may katapusan kay kinamhan ati pag karibrihan sa kanta manga kasalanan.

Hibriyu 9:12 Iomraidhean Croise

Danyil 9:24

“Itinagka yi Diyus ti 490 ka timpu sa banal pag banwa hanggan sa kanmu kasimanwa hampay umapas kanda paglaban ag pagbuwat daut sa Diyus, para malukat sida sa kanda manga kasalanan, hampay maiparargu Diyus ti katadlungan tugka aban, hampay matupad ti pangakakitun hanggan ti hula, ag hampay maitalaga maan ti Balay Diyus.

Libitiku 16:15

Iyawun diman niya ti kambing bilang handug sa paglumpiyu kasalanan manga tawu. Daran-un niya inda kay dugu sa Pinakabanal pag Sulud-sulud bag-u iwidwisik inda sa taklub Kaban Kasunduan, parihu sa kay binwat sa dugu tudu baka.

Libitiku 4:3

Nu pangulu manughandug ti nagkasala balaw tikis, ag dahil siyun nadamay ti manga tawu, manhandug siya sa Panginuun turiti baka unman may alangan bilang handug sa paglumpiyu kasalanan.

Libitiku 8:2

“Paatiha si Aarun hanggan kay manga anak lalaki sa may sabian Turda Taragbuan, ag tipuna ti buu nasakupan ati. Padaran-an ti manga rutay panmanughandug, ti lana ulibu panhaplas, ti tudu baka handug sa paglumpiyu kasalanan, ti duwa ka karanidu lalaki hanggan ti alat may sukad tinapay unman may pamadaka.”

Libitiku 9:15

Pagkatapus dinara niya sa karaw-an ti manga handug para sa manga tawu. Iniyaw niya ti kambing bilang handug sa paglumpiyu kasalanan manga tawu parihu sa kay binwat sa kabag-u pag handug hampay malumpiyu siya.

Sakaryas 3:9

Huswi, bantayi nimu ti batu ipinauli niku sa kanmu atubangan, may pitu inda ka mata. Paukitan niku inda, ag pamul-un niku ti kasalanan daga Israil sa sulud lang usa ka sirang.

Markus 3:29

Nu bay pagmuransahun tawu ti Ispiritu Banal, unman gid patawadun siya hanggan aban. Tunda pag kasalanan niya unman mab-ul hanggan aban.”

Lukas 1:68

“Dayawun nita ti Panginuun ti Diyus Israil, dahil kay inawatan ag linkat niya kay nasyun.

Binwat 20:28

Ingatan duy niyu kanyu sadili hanggan ti iglisya dahil sida iinintirga Ispiritu Banal sa kanyu. Pangalagaan niyu ti iglisya Diyus kay sinakup niya pagka ibinuhus ti dugu niya Anak sa kay kamatayan.

Ipisu 1:7

Irinibri kita ni Kiristu sa panab-anan niya dugu, ag pinatawad yi kanta manga kasalanan. Ungud gid makadululaw kay mayad pag nabubut-un Diyus,

Kulusas 1:14

Dahil sa Anak, ipinatawad yi kanta manga kasalanan ag irinibri kita.

1 Tisalunika 1:10

ag hampay alagdun niyu kay Anak si Hisus ginan sa langit. Binuhi uman Diyus si Hisus ginan sa kamatayan. Siya diman ti rumibri sa kanta sa kay kaudasan sintinsiya Diyus aban.

Titu 2:14

Ipinakaun niya kay sadili hampay lukatun niya kita sa tanan nita kasalanan, agud kita kay yi nasakupan, malumpiyu ag magkaibug magbuwat mayad.

Hibriyu 1:3

Ti Anak ti duag kadayawan Diyus. Parihu siya sa Diyus sa tanan bagay. Ti Anak diman ti mag-alaga sa tanan bagay sa kamaskihan niya bagaw. Pagka ihinanda niya kay kapatawadan sa manga tawu kasalanan bag-u tinmukaw siya ati sa langit baliwa sa sikun Diyus, minsan sa karampatan Diyus makamaskihan sa tanan.

Hibriyu 10:19

Nakan ngani manga patar-ari, unman yi gid may ampara sa kanta magsaka sa Banal pag Sulud-sulud, dahil sa kay dugu ni Hisus.

Hibriyu 10:4

Dahil ti dugu manga tudu baka manga kambing dayu gid makab-ul sa kasalanan manga tawu.

Hibriyu 13:12

Nakan una si Hisus nag-agwanta namatay sa luwas diman puwirtahan alad batu, hampay paglumpiyuhun ti manga tawu sa kanda manga kasalanan dahil sa kay dugu.

Hibriyu 5:9

Natupad yi niya ti buu kagustuhan Diyus. Nakan ginan sa kanya pag makatanggap karibrihan unman may katapusan ti manga tawu nu magpaniwala sa kanya;

Hibriyu 7:27

Balaw siya parihu sa iba pangulu manughandug kailangan maghandug sirang-sirang, un-an para sa kanda sadili kasalanan, bag-u di sa kasalanan manga tawu. Kas-a lang ihinandug siya sa Diyus, pagka ipinakaun niya kay sadili bilug hampay mamatay. Balaw yi niya binwat waya uman.

Hibriyu 9:13

Dahil ti dugu manga kambing manga tudu baka hanggan kay ayum tarnida baka iwinidwisik sa manga tawu, naglumpiyu diman sa kanda nu sida nagkasala sa manga ibinilin sa Kasuguan.

Hibriyu 9:14

Lalu gid waya daka kay namhan dahil sa dugu ni Kiristu. Dahil sa kamaskihan Ispiritu unman may katapusan ipinakaun niya kay sadili sa Diyus unman may huput kasalanan. Kay dugu ni Kiristu tiglumpiyu sa kanta tagipusuun hanggan naisipan sa manga buwat unman may kabuluhan hampay kita magsirbi sa Diyus buhi.

Hibriyu 9:15

Sa kay pagkamatay linukat ni Kiristu ti manga tawu ginan sa manga kasalanan kanda binwat sa kanda di waya sakup sa un-an pag taratu. Nakan si Kiristu ngani tigpamahala sa bag-u pag taratu hampay ti manga pinili Diyus makatanggap sa kay itinaratu pag papalad unman may katapusan.

Hibriyu 9:19

Ipinaliwanag dapu ni Muysis sa manga tawu ti tanan buruwatun angay sa Kasuguan. Bag-u bin-ul niya ti dugu baka manga kambing, linakayan danum ti dugu, bag-u isinawsaw niya sa dugu ti marara pag bulbul karanidu hanggan ti sanga isupu bag-u kay winidwisikan ti ribru Kasuguan hanggan ti tanan tawu.

Hibriyu 9:28

Katunda diman waydi si Kiristu kas-a lang namatay, ipinakaun niya kay buhi sa Diyus ag inaku niya ti kasalanan kalibutan. Bumalik siya aban, balaw yi hampay mamatay maan tungkul sa manga kasalanan tawu, nu unman hampay iribri niya ti manga magpatigagad sa kanya.

Hibriyu 9:7

Dapat nu sa kay Pinakabanal pag Sulud-sulud ti pangulu lang manughandug sa Balay Diyus tigsaka kas-a lang sulud usa ka timpu. Kailangan siya may dara dugu hampay kay pag-isagda sa Diyus, panlukat sa kay sadili manga kasalanan hanggan sa manga iba kanda binwat balaw tikis pag kasalanan.

Ipinakakit 1:5

Pagsa kanyu diman ti papalad ginan sa kan Hisu-Kiristu, imaw ti tutuu masarigan pag manugpadakit, ti un-an nabuhi uman ginan sa kamatayan, ti Hari tanan manga hari sa babaw daga. Pagmahalun niya kita ag dahil sa kay dugu pag irinibri niya kita sa kanta manga kasalanan.

Ipinakakit 5:9

Nagkanta sida inda pag bag-u kanta magkun, “Kawu ti may karampatan magbuul sa kasuratan malulunan ag magbukas kay manga kula, dahil kawu ti minatay ag dahil sa kanmu dugu may linukat kawu manga tawu ginan sa kada linahi, pamagaw, banwa ag nasyun hampay sida manga sakup yi Diyus.