Hibriyu 5:9 - Hanunuu

⁹ Natupad yi niya ti buu kagustuhan Diyus. Nakan ginan sa kanya pag makatanggap karibrihan unman may katapusan ti manga tawu nu magpaniwala sa kanya;

Hibriyu 5:9 Iomraidhean Croise

Kanta 45:17

Ipaalaala niku kawu sa tanan pag sinulput. Nakan dayawun kawu manga nasyun tugka aban.

Kanta 51:6

Ti matinupadun pag tagipusuun imaw kanmu gustu; tudlui aku sa dumunung.

Kanta 51:8

Pasulunga aku may kabayaan; una waya pagrunutun nimu kang manga but-ul mana makabaya maan aku.

Isayas 45:22

“Pagpakarani kamu sa kangku hampay maribri, kamu tanan sa buu kalibutan. Dahil aku ti Diyus, purya sa kangku udyi may iba waya.

Isayas 49:6

Magkun siya, “Kawu kang manugsirbi, mayamu waya pag manga buruwatun ti ipabuwat niku sa kanmu, purya sa pagpabalik nimu sa kang pag-alagaan pag manga Israilita. Buwatun waya niku kawu sulu manga nasyun, hampay maribri ti buu kalibutan.”

Isayas 50:10

Si unu sa kanyu ti may dala sa Panginuun ag magsunud sa pag-itudlu niya manugsirbi? Kailangan pagpaniwala siya sa Panginuun Diyus una sa dalan madulum unman may rayaw.

Isayas 55:3

Pagpakarani kamu sa kangku, pagpatingi hampay mabuhi kamu. Mamuwat aku unman may katapusan pag kasunduan sa kanyu. Ipadamdam niku sa kanyu kang pagmahal hanggan pangaawa ti itinaratu niku sa kan Dabid.

Danyil 9:24

“Itinagka yi Diyus ti 490 ka timpu sa banal pag banwa hanggan sa kanmu kasimanwa hampay umapas kanda paglaban ag pagbuwat daut sa Diyus, para malukat sida sa kanda manga kasalanan, hampay maiparargu Diyus ti katadlungan tugka aban, hampay matupad ti pangakakitun hanggan ti hula, ag hampay maitalaga maan ti Balay Diyus.

Sakaryas 6:15

May manga tawu rumas-ug sa Israil ginan sa arayu pag rugar mangawat sa pagpatindug sa Balay Diyus Panginuun. Nu mangyari yi inda, maalaman niyu ti Panginuun Makamaskihan imaw ti nagpadara sa kangku tag sa kanyu. Ag mangyari gid inda nu sundun niyu mayad ti Panginuun niyu Diyus.

Matiyu 17:5

Sa kay di waya magbagaw hinamuyan sida masinay pag rurum. May nagbagaw ati ginan sa rurum magkun, “Inda kang pagmahalun pag Anak, siya lubus kang pagbayaun. Patingihi gid niyu siya.”

Lukas 13:32

Sinabi ni Hisus magkun, “Si Hirudis katna ga simarun idu kay ugali. Pag-ati kamu sa kanya sabihun niyu, magpaluwas aku manga labang, magpaayad aku taynguna hanggan aldaw sa may manga sakit, makadwa bay tapusun yi niku kang tarabahu.

Huwan 19:30

Pagka sinupsup ni Hisus ti maaslum pag intus, sinabi niya magkun, “Taynguna tapus yi.” Bag-u nisug-uk yi kay ulu, naugtasan yi arup.

Binwat 3:15

Kanyu minatay si Hisus ti gimpuunan buhi. Dapat binuhi maan siya Diyus ginan sa kamatayan. Nakitan gid nimi tunda.

Binwat 4:12

“Udyi may iba hanapan karibrihan nu unman si Hisus lang. Dahil unman may iba ngaran sa sirung langit ipinakaun sa manga tawu hampay magribri sa kanta.”

Binwat 5:32

Kami yi ngani ti manga saksi tungkul sa manga nangyari. Magtudlu diman hanggan ti Ispiritu Banal ti ipinakaun Diyus sa manga tawu masurundun sa kanya.”

Ruma 1:5

Tinanggap nimi ginan sa kanya ti karampatan hampay kami apustul agud ti tanan nasyun butungun nimi sa pagsarig hanggan pagsunud sa kanya. Pagbuwatun nimi inda para sa kanya.

Ruma 10:16

Dapat unman tanan nagsunud sa Mayad pag Barita. Kainda kay sabi ni Isayas magkun, “Panginuun, si unu ti naniwala sa kanmi sinabi?”

Ruma 15:18

Dahil pinanghasan niku itinultul kay binwat lang ni Kiristu, ginamit niya aku hampay makabutung sa manga balaw Hudiyu tabug sa pagsunud sa Diyus dahil sa kang manga pagbagawun hanggan pagbuwatun,

Ruma 2:8

Dapat mahigpit pag galit kay ganti Diyus sa manga magbuwat kaguluhan, sa manga dayu magpaniwala sa katutuuhanan, bagkus naniwala di ngap sa kadautan.

Ruma 6:17

Dapat ay salamat sa Diyus, dahil kaybi kamu manga panawuhun kasalanan, taynguna bay masurundun yi kanyu tagipusuun sa iinadal pag katutuuhanan kanyu yi tinanggap.

2 Kurintu 10:5

Dahil kanmi pagdautun ti salan pag manga baragawun, pagbinsilun nimi ti tanan magpalabaw laban sa kadunungan Diyus. Pagbihagun nimi ti kada pag-iisip hampay pasakup yi sa kan Kiristu.

Pilipus 2:12

Nakan ngani manga patar-ari, kailangan pagmasurundun kamu, lalu taynguna aku unman asan sa kanyu. Paggalang yi gid kamu sa Diyus, pagparargu hanggan sa ud mamhan kanyu karibrihan.

2 Tisalunika 1:8

Rumas-ug siya sa karaw-an maglalabdaban pag apuy. Bag-u parusahan niya ti tanan tawu dayu magpaniwala sa Diyus ag ti manga dayu magsunud sa Mayad pag Barita tungkul sa kanta Panginuun Hisus.

2 Tisalunika 2:16

Kanmi pag-idarangin kamu hampay pasayahun nita Panginuun Hisu-Kiristu hanggan nita Diyus Ama, imaw ti nagmahal sa kanta. Kinaawaan gid niya kita, pinakan-an niya kita unman magkauman pag matutum naisipan hanggan marig-un pagsarig.

2 Timutiyu 2:10

Nakan pag-agwantahun niku ti tanan bagay alang-alang sa manga pinili Diyus, hampay makatanggap diman sida karibrihan tunda ti mayad gid pag buhi unman may katapusan kay pakaun ni Kiristu Hisus.

Hibriyu 1:14

Ti tanan manga anghil manga ispiritu magsirbi sa Diyus, kay manga suruguun hampay mag-alaga sa manga tawu mumana karibrihan.

Hibriyu 11:40

Inalistu Diyus ti lalu mayad pag bagay para sa kanta, nakan unman waya kinamhan Diyus kay turunu sa kanda hanggan sa udwaya miusa kita sa kanda.

Hibriyu 11:8

Dahil sa kay pagsarig naniwala si Abraham, pagka siya tinawag. Diyus hampay atabug sa usa ka rugar imaw kay tanggapun aban pag maranahun. Linmakaw si Abraham madi unman niya alam nu naan tag.

Hibriyu 12:2

Bantayan nita kanta manuggiya si Hisus. Siya diman ti turunu nita sarig. Dahil kabayaan kay patabgan, nakan inagwanta yi lang niya madi ipinurya siya sa kay pagkamatay sa kurus. Bag-u tinmukaw siya ati sa langit baliwa sa sikun Diyus, minsan sa karampatan Diyus.

Hibriyu 2:10

Linalang Diyus ti tanan bagay angay sa kay gayak niya kagustuhan. Nakan ngani ipinalakaw niya si Hisus sa kakurian kay inagwanta hampay lubus tupadun niya ti kagustuhan Diyus, ag hampay mayamu tawu kay mataban sa kadayawan.

Hibriyu 2:3

Kabitay kita dayu parusahan gid nu unman intindihun nita ti barita tungkul sa inda pag mahalaga pag karibrihan. Pagka sa kabag-u, Panginuun gid ti nagpaalam bag-u ti manga nakadnug sa kanya nagtultul maan sa kanta, pinatutuuhanan nida ti karibrihan.

Hibriyu 9:12

Kas-a lang gid pag nagsaka si Kiristu ati sa Pinakabanal pag Sulud-sulud, udyi kailangan ulitun. Sa kay nagsaka may dara diman siya dugu hampay siya makaatubang sa Diyus, dapat balaw dugu kambing, balaw diman dugu ibun baka nu unman kay ngap sadili pag dugu. Nakan unman may katapusan kay kinamhan ati pag karibrihan sa kanta manga kasalanan.

Hibriyu 9:15

Sa kay pagkamatay linukat ni Kiristu ti manga tawu ginan sa manga kasalanan kanda binwat sa kanda di waya sakup sa un-an pag taratu. Nakan si Kiristu ngani tigpamahala sa bag-u pag taratu hampay ti manga pinili Diyus makatanggap sa kay itinaratu pag papalad unman may katapusan.

Hibriyu 9:28

Katunda diman waydi si Kiristu kas-a lang namatay, ipinakaun niya kay buhi sa Diyus ag inaku niya ti kasalanan kalibutan. Bumalik siya aban, balaw yi hampay mamatay maan tungkul sa manga kasalanan tawu, nu unman hampay iribri niya ti manga magpatigagad sa kanya.

1 Pidru 1:22

Taynguna kamu manga malumpiyu yi dahil kamu manga masurundun yi sa katutuuhanan, ag dahil kamu may pagmalahalan sa usa kag sa usa balaw sa magpabalhinguun. Pagmaimbung gid kanyu buu tagipusuun kanyu pagmalahalan sa usa kag sa usa.

1 Huwan 5:20

Magkaalaman diman nita nagsitay ti Anak Diyus, bag-u pinakan-an niya kita intindi hampay makilala nita ti Diyus tutuu. Kita magpakiusa sa Diyus tutuu, dahil sa kanta magpakiusa sa kay Anak, sa kan Hisu-Kiristu. Inda yi gid ti Diyus tutuu, ag ti tutuu pag buhi unman may katapusan.

Hudas 1:21

Danga magpablag kamu sa kay pagmahal Diyus; pag-alagad kamu sa kay pangaawa nita Panginuun Hisu-Kiristu, imaw ti makapakaun sa kanta tutuu pag buhi unman may katapusan.