Hibriyu 3:5 - Hanunuu

⁵ Masarigan ngani si Muysis sa tanan niya buruwatun sa magtal-anakan Diyus dahil siya suruguun Diyus, hampay ipasandam niya ti manga katutuuhanan kay ipaburayhaw Diyus aban.

Hibriyu 3:5 Iomraidhean Croise

Nihimyas 9:14

Itinudlu nimu sa kanda ti kailangan buwatun tungkul sa Sirang Pamahari. Ag sinugu nimu sida sa panab-anan nimu manugsirbi sa kan Muysis, kuntay tupada kanmu manga sugu, manga surundanun, hanggan manga pag-itudlu.

Kanta 105:26

Dahil ipinadara niya si Muysis kay manugsirbi ag si Aarun kay pinili.

Pag-ighit 14:31

Nakitan manga Israilita ti masyadu pag kamaskihan Panginuun kay ginamit laban sa manga Ihipsiyu. Ag dahil siyun, nagkaimaw sida dala sa Panginuun ag nagsarig sida sa kanya hanggan sa kay suruguun sa kan Muysis.

Pag-ighit 40:16

Binuwat ni Muysis ti tanan isinugu Panginuun sa kanya.

Bilang 12:7

Dapat balaw katida aku nu maghampang sa kan Muysis sa kang suruguun, masarigan pag takinan niku tanan nasakupan.

Matiyu 24:45

Sinabi ni Hisus magkun, “Ti panawuhun nu matinupadun ag mapininsarun imaw ti pagpiyaran niya amu hampay pakan-an niya karan-unun kay kaparihu manga panawuhun, may bahaw, may yabas, may yapun.

Matiyu 25:21

Magkun kay amu, ‘Bali duy, matinupadun ag mayad kawu pag panawuhun. Dahil kawu matinupadun sa diit pag halaga, piyaran niku kawu daka pag halaga. Abala kawu, miusa sa kang kabayaan.’

Lukas 12:42

Sinmagut ti Panginuun magkun, “Ti panawuhun nu matinupadun ag mapininsaran imaw ti pagpiyaran niya amu hampay pakan-an niya karan-unun kay kaparihu manga panawuhun may bahaw may yabas may yapun.

Lukas 24:27

Bag-u ipinaliwanag ni Hisus sa kanda ti manga bagaw tungkul sa kanya sa tanan Banal Kasuratan ginan sa kan Muysis hanggan waya sa manga Purupita.

Lukas 24:44

Sinabi niya sa kanda, “Inda imaw yi kang pagsabihun sa kanyu kaybi kang di waya sa kanyu. Sinabi kabay niku kailangan tupadun ti tanan nakasurat tungkul sa kangku sa Kasuratan ni Muysis hanggan sa Surat manga Purupita hanggan sa Ribru Manga Kanta.”

Huwan 5:39

Pirmi diman pag-adalun niyu ti manga Banal Kasuratan dahil kanyu pag-isipun siyun kamu pag makakit buhi unman may katapusan. Tunda pag manga Banal Kasuratan tigpakilala nu si unu aku.

Binwat 28:23

Nakan nagtararatuhan sida sa iba sirang. Pagka ati katpung pag sirang, lalu waya mayamu tawu ti naglinuwang tag sa kan Pablu pagdayunan pag balay. Ginan surip hanggan yabi malinaw gid kay itinultul niya sa kanda tungkul sa kay paghari Diyus. Ginamit niya ti Kasuguan ni Muysis hanggan ti Kasuratan manga Purupita hampay maintindihan nida ti katutuuhanan tungkul sa kan Hisus.

Binwat 7:37

“Si Muysis diman waydi ti nagsabi sa manga Israilita magkun, ‘Aban ipakaun Panginuun Diyus sa kanyu ti usa ka purupita kanyu diman kalahi, parihu diman ga kangku sinugu Panginuun.’

Ruma 3:21

Taynguna bay niburayhaw yi nu kabitay pagkilalan-un Diyus ti manga tawu kuntay sida manga matadlung bukud sa Kasuguan, ag balaw sa pagtupad nida sa Kasuguan ni Muysis. Pinatutuuhanan diman gid tunda sa manga ribru Kasuguan hanggan manga Purupita.

1 Kurintu 4:2

Ti piniyaran kailangan pagtupad sa kay buruwatun niya amu.

Diyuturunumiyu 3:24

‘Panginuun Diyus, inumpisahan yi nimu ipinakakit sa kanmu manugsirbi kanmu kamaskihan, dahil unman may diyus sa langit ngatay sa daga ti makabuwat manga makadululaw pag binwat nimu.

Diyuturunumiyu 34:5

Nakan namatay ngani si Muysis, ti manugsirbi Panginuun ati sa Muab, angay gid sa sinabi Panginuun.

1 Timutiyu 1:12

Magpasalamat aku sa kanta Panginuun Kiristu Hisus, dahil siya tigpabisug sa kangku hampay mabuwat niku inda pag buruwatun ag kinilala niya aku kuntay aku matinupadun, nakan pinili niya aku hampay magsirbi sa inda pag katungkulan.

Hibriyu 1:1

Kaybi waya ginan ipinadakit manga purupita ti manga binagaw Diyus sa kanta manga ginurang sa tuhay-tuhay pag udas ag sa tuhay-tuhay pag paraan.

Hibriyu 3:2

Matinupadun siya sa Diyus sa nagpili sa kanya sa inda pag buruwatun, parihu ga kan Muysis matinupadun diman sa tanan niya buruwatun tungkul sa kay magtal-anakan Diyus.

Hibriyu 3:4

Dahil sa kada balay may nagpatindug. Dapat Diyus ti naglalang sa tanan manga bagay.

Hibriyu 8:5

Sida magsirbi ga sa anyu aninu Balay Diyus sa langit. Dahil pagka buwatun yi ni Muysis ti Turda, binilinan siya Diyus magkun, “Pag-ingat kawu, buwata nimu ti tanan manga bagay angay gid sa kay tutuu pag mustara ga kang ipinakakit sa kanmu sa bantud.”

Hibriyu 9:24

Dahil si Kiristu nagsaka sa banal pag rugar balaw binwat tawu kamang ag unman hinuwad ginan sa kay tutuu. Siyun ngap siya sa langit gid sa atubangan Diyus hampay magpamahala sa kanta.

Huswi 1:15

tugka sa matanggap nida ti kaariwayahan ginan sa Panginuun parihu sa natanggap niyu, ag masakup nida ti daga pag-ipakaun sa kanda Panginuun nita Diyus. Bag-u mahimu yi kamu makabalik sitay sa butlakan baliwa Hurdan, hampay apuun ti daga ipinakaun sa kanyu ni Muysis ti suruguun Panginuun.”

Huswi 1:2

“Namatay yi si Muysis kang suruguun. Nakan taynguna pag-alistu yi kamu, kawu hanggan ti tanan Israilita, sa pagdipay sa Sapa Hurdan atabug sa daga kang ipakaun sa kanyu.

Huswi 1:7

Basta pagpakarig-un lang kawu hanggan pagmatutum gid kanmu naisipan. Sunda gid nimu kaayad ti tanan kasuguan ipinakaun sa kanmu ni Muysis kang suruguun. Danga gid nimu inda pagkalimti, hampay marapanalu kawu sa tanan nimu pagbuwatun.

Huswi 8:31

Ipinabwat niya inda angay sa sugu ni Muysis, ti suruguun Panginuun, tabug sa manga Israilita. Inda pag sugu nakasurat sa Ribru Kasuguan ni Muysis, ag inda kay pagsabihun ati: “Pagbuwat kawu harandugan batu balaw inandasan sa panab-anan baul.” Sa kay babaw harandugan nanhandug sida sa Panginuun manga handug pagsunugun hanggan manga handug para sa mayad pag pakiusa.

Huswi 8:33

Ti tanan Israilita, kaibahan kanda manga takinan, manga manugpamahala, ag manga manughusay, hanggan ti manga balaw Israilita mag-uli kaibahan nida, tinmindug sa duwa ka gurupu magkaatubang. Kay usa ka gurupu matlikudan sa Bantud Girisim ag kay usa waya gid matlikudan sa Bantud Ibal. Sa kanda karaw-an matindugan ti manga manughandug manga lahi ni Libi magtabyang sa Kaban Kasunduan Panginuun. Nagsugu sa kanda kaybi si Muysis ti suruguun Panginuun kuntay buwata inda sa udas tanggapun nida ti basbas.

Ipinakakit 15:3

Bag-u kinanta nida ti kanta ni Muysis kay suruguun Diyus hanggan ti kanta Anak Karanidu magkun, “Kawu ti Panginuun Diyus ti makamaskihan sa tanan. Makapangyarihan ag makadululaw kanmu manga buwat. Kawu ti Hari manga nasyun tawu. Matadlung ag tutuu ti turunu nimu manga buwat.