Diyuturunumiyu 32:4 - Hanunuu

⁴ Siya kang palalan-iban pag batu; kang-ud gid kay manga binuwat, ag matadlung ti tanan niya manga palakaw. Matinupadun siya pag Diyus ag balaw magsalan; matadlung siya ag hustu kay manga pagbuwatun.

Diyuturunumiyu 32:4 Iomraidhean Croise

Gimpuunan 1:31

Nakitan Diyus ti tanan niya linalang ag nakabaya gid siya. Linmawuy ti yabi ag rinmas-ug ti surip. Tunda ti ikan-um pag sirang.

Gimpuunan 18:25

Bilang ga unman nimu mahimu mabwat tunda rurisun ti manga matadlung kaibahan manga makasalanan. Balaw mahimu parihu kanmu magpakiusa sa kanda. Kawu ti magsintinsiya sa buu kalibutan, kabay mana buwatun nimu nu hintay ti mayad?”

2 Samwil 22:47

Buhi kawu, Panginuun! Dayawun kawu kang palalan-iban pag batu! Pag-ipaabwat niku kawu dahil kawu ti Diyus kang Manugribri.

2 Samwil 23:3

Magkun sa kangku ti Diyus, ti batu palalan-iban Israil, ‘Ti magpangulu matadlung ag may dala sa Diyus

2 Krunika 19:7

Paggalang kamu sa Panginuun, ag pagpihu kamu matadlung dahil balaw pagpasnuan Panginuun nita Diyus ti unman may katadlungan, ti maghusay may pagkilingan, ag ti magtanggap suhul.”

Nihimyas 9:8

Nakitan nimu matinupadun siya sa kanmu, ag nagbuwat kawu kasunduan sa kanya ipakaun nimu sa kay manga linahi ti daga manga Kananiyu, Hitiyu, Amuriyu, Pirisiyu, Hibusiyu, hanggan manga Girgisiyu. Ag tinupad nimu kanmu taratu sa kanda, dahil matadlung kawu.

Hub 34:10

Nakan pagpatingi kamu sa kangku, kamu ti magsabi nakaintindi kamu. Ti Makamaskihan pag Diyus unman magbuwat daut.

Hub 35:14

Hub, lalu yi gid balaw niya patingihan kanmu hagad-awat, nu sumabi kawu kuntay unman nimu mag-akitan kay awat niya sa kanmu dinara kasaba sa kanya ag ipinaalagad lang niya kawu sa unman.

Hub 36:23

Unman may tumudlu sa kanya nu unu kay buwatun, ag unman may makasabi sa kanya kuntay nagsalan siya.

Hub 8:3

Balaw mahimu pihitun Diyus Makamaskihan ti katutuuhanan aw ngatay likuun ti katadlungan.

Kanta 100:5

dahil mayad ti Panginuun. Kay pagmahal balaw may katugkaan, matinupadun siya hanggan aban.

Kanta 138:8

Panginuun, pagtupadun nimu kanmu manga turunu sa buhi niku. Kanmu pagmahal unman may katapusan. Tupada kanmu inumpisahan binwat.

Kanta 145:17

Panginuun, matadlung kawu sa tanan nimu paraan, ag matinupadun kawu sa tanan nimu pagbuwatun.

Kanta 146:6

imaw ti naglalang sa kalangitan ag sa kalibutan, sa dagat ag sa tanan atay. Masarigan gid ti Panginuun hanggan aban.

Kanta 18:2

Panginuun, kawu kang palalan-iban pag batu, kang matibay pag paratag-an ag manugribri. Bilang palalan-iban pag batu, makapatagu aku sa kanmu. Kawu kang panangga, makamaskihan pag manugribri, ag darangpan.

Kanta 18:46

Buhi kawu, Panginuun! Dayawun kawu kang palalan-iban pag batu! Pag-ipaabwat niku kawu dahil kawu ti Diyus kang Manugribri.

Kanta 19:7

Ti kasuguan Panginuun balaw may salan. Magpakaun inda kabisugan nita buhi. Ti manga pag-itudlu Panginuun masarigan, magpakaun kadunungan sa manga balaw may alam.

Kanta 31:5

Pag-iintirga niku sa kanmu kang buhi. Ribrihan aku, Panginuun, Diyus masarigan.

Kanta 33:4

Dahil matadlung ti bagaw Panginuun, masarigan ti tanan niya buwat.

Kanta 78:35

Naalaala nida ti Kaabwat-abwatan pag Diyus imaw kanda palalan-iban pag batu ag manugribri.

Kanta 9:16

Napaburayhaw ti Panginuun nu si unu gid siya sa panab-anan pagsintinsiya niya matadlung, ag ti daut ngap pag manga tawu ti nidamhak sa kanda daut pag manga pagbuwatun.

Kanta 90:16

Pakakitan nimu sa kanmi sa kanmu manga manugsirbi, hanggan sa kanmi manga linahi, kanmu makadululaw pag buwat ag kanmu pagkamakapangyarihan.

Kanta 92:15

Pag-ipakakit lang inda matadlung ti Panginuun kang palalan-iban pag batu; unman gid may kadautan sa kanya.

Kanta 97:2

Pagsangputun siya madamul pag rurum, ag maghari siya may katuwiran ag katadlungan.

Kanta 98:3

Balaw niya kinalimtan kay pagmahal ag pagkamatinupadun sa kanta, sa nasakupan Israil. Nakitan tanan tawu sa buu kalibutan nu kabitay kita ipinanalu nita Diyus.

Kanta 99:4

Makamaskihan siya pag Hari ag magkaibug sa katadlungan. Matadlung kay maghari; kang-ud kay pagbuwatun sa Israil.

Pag-ighit 34:6

Linmawuy ti Panginuun sa kay atubangan ni Muysis magkun, “Aku ti Panginuun, ti maawaun ag mainawatun pag Diyus. Mapagmahal ag matinupadun aku, ag balaw madali magkagalit.

Manugtudlu 3:14

Naalaman niku ti tanan manga pagbuwatun Diyus pumarargu tugka aban, ag balaw inda mauman. Pagbuwatun inda Diyus hampay gumalang ti tawu sa kanya.

Isayas 17:10

Kinalimtan niyu ti Diyus kanyu Manugribri ag batu palalan-iban. Nakan una magtanum kamu manga mararinu pag kalasi tanum, parihu sa ubas ginan sa iba rugar,

Isayas 25:1

Panginuun, kawu kang Diyus! Dayawun niku kawu ag kilalahun dahil makadululaw kanmu manga binwat. Tinupad nimu kanmu manga gayak ginan waya kaybi pag panahun.

Isayas 26:4

Pagsarig kamu pirmi sa Panginuun, dahil siya kanta palalan-iban pag batu hanggan aban.

Isayas 28:16

Nakan inda ti pagsabihun Panginuun Diyus, “Bantayi niyu! Ipakana niku sa banwa Siun ti batu pag pundasyun, batu masarigan, mapag-un ag mahalaga. Ti manga magsarig sa kanya balaw harus-harus sa kanda manga pagbuwatun.

Isayas 30:18

Dapat mag-alagad ti Panginuun kamu pumakarani sa kanya hampay kaawaan niya. Alistu di siya iparanas sa kanyu kay pasunaid. Dahil ti Panginuun imaw ti Diyus matadlung, mapalad ti magsarig sa kanya.

Isayas 32:2

Ti kada usa sa kanda parihu sa palalan-iban sa mabisug pag durus ag bagyu. Parihu diman sida sa sapa magbulus sa tigangan pag daga, hanggan sa hamuy daka pag batu sa mainit ag sa mamara pag daga.

Hirimyas 10:10

Dapat ti Panginuun imaw ti tutuu pag Diyus. Siya ti buhi pag Diyus ag Hari unman may katapusan. Nu magkagalit siya magkatandug ti kalibutan, unman may nasyun makapadugay sa masyadu gid pag galit niya.

Hirimyas 9:24

Una si unu nu magkaibug magpadayaw, kailangan lang niya ipadayaw kuntay nakilala niya ag magkaintindihan kuntay aku ti Panginuun maawaun ti magbuwat kang-ud ag matadlung sitay sa babaw daga, dahil imaw tida ti pagbayaun niku. Aku, ti Panginuun, ti magsabi inda.”

Danyil 4:34

“Pagkalawuy pitu ka timpu, aku, si Nabukudunusur, nagdangup sa Diyus, ag nagbalik kang daan pagkaisipan. Nakan dinayaw niku ag kinilala ti Kaabwat-abwatan pag Diyus buhi sa unman may katapusan. Nagkumun aku, ‘Kay paghari unman may katapusan.

Danyil 4:37

Nakan taynguna pagdayawun niku ag pagkilalan-un ti Hari langit, dahil hustu ag matadlung ti tanan niya pagbuwatun, ag pag-ipaababa niya ti una si unu ti magpadayaw-dayaw.”

Habakuk 1:12

Magkun si Habakuk, “Panginuun, kawu ti Diyus ginan sa kabag-u. Kawu kang banal pag Diyus ag unman kawu may kamatayan. Panginuun, palalan-iban pag batu, pinili nimu ti manga taga Babilunya hampay pumarusa sa kanmi.

Habakuk 1:13

Dahil matadlung kawu, unman kawu makaagwanta bumantay sa kadautan ag kaguluhan. Dapat hayga pinabay-anan lang nimu ti manga maradaya pag taga Babilunya? Hayga nimu pagpahintulutan pakurianan ti manga tawu balaw ga kanda kay ka daut?

Sipanyas 3:5

Dapat asan di ti kadayawan Panginuun sa karaw-an nida banwa. Pagbuwatun Panginuun ti mayad ag balaw ti daut. Sirang-sirang pag-ipakakit niya kay kaayadan, ag unman niya inda pag-apasan. Dapat ti daut parargu sa pagbuwat daut ag unman sida magkay-a.

Matiyu 5:48

Nakan ngani kailangan ilubus niyu kanyu kaayadan parihu sa kanyu Ama sa langit.”

Huwan 1:14

Nagpakatawu ti Bagaw, ag nangulian siya sitay sa kanta. Mayad gid kay nabubut-un ag lubus ipinakilala niya ti katutuuhanan tungkul sa Diyus. Nakitan nimi kay kadayawan kay tinanggap ginan sa Ama dahil siya ti Bugtung Anak.

Huwan 1:17

Ti Kasuguan ipinadakit ni Muysis sa kanta. Dapat ginan sa kan Hisu-Kiristu pag naalaman nita ti mayad nabubut-un Diyus hanggan ti katutuuhanan tungkul sa kanya.

Huwan 14:6

Sinmagut si Hisus sa kanya magkun, “Aku ti dalan, ti katutuuhanan, ti buhi. Ginan lang sa kangku pag makaati ti tawu sa Ama.”

Huwan 5:22

Unman magpihu ti Ama sa una hintay pag tawu nu daut nu mayad. Iinintirga niya sa Anak ti karampatan hampay makapihu sa manga tawu nu daut nu mayad,

Ruma 1:32

Naalaman diman nida ti ibinilin Diyus magkun, kailangan matyun ti magbuwat katunda. Dapat ay magparargu di ngap sida sa pagbuwat daut. Magbaya waya sida nu maghiling sida sa manga iba magbuwat katunda waydi.

Ruma 2:2

Alam diman nita kay sintinsiya Diyus balaw magsalan laban sa manga tawu magbuwat katida.

Ruma 2:5

Dapat ay sa kaganitan nimu tagipusuun ud waydi mag-ampu sa kanmu kasalanan, pagpakadugangan nimu ti parusa kay ganti Diyus sa kanmu nu ipaburayhaw kay galit Diyus aban sa kaudasan niya matadlung pag sintinsiya.

Ruma 3:5

Dapat nu kanta kadautan tigpakilala ngap sa kay katadlungan Diyus, unman aw lugud masabi nita ti Diyus salan kay sintinsiya nu kita pagparusahan niya? Katunda ngani ti tawu kay pamagawan.

1 Kurintu 10:4

Sida tanan nag-inum waydi danum ipinakaun Diyus, dahil nag-inum sida danum ginan sa batu ipinapalad Diyus. Pagka sida nakatapus inum nagkuyug sa kanda ti batu. Inda pag batu si Kiristu yi ngapu.

Diyuturunumiyu 10:18

Pag-apinan niya ti karampatan manga ilu hanggan manga buranday pag babayi. Pagmahalun niya ti manga day-uhan mag-ulian sa Israil ag pagpakan-an niya sida karan-unun hanggan manga rutay.

Diyuturunumiyu 32:15

Nagmaalwan ti manga Israilita dapat naglaban sida. Nagtabul sida ag nagbisug, dapat pinatlikudan nida ti Diyus, ti naglalang sa kanda, ag binugyahan nida ti palalan-iban nida pag batu imaw ti kanda Manugribri.

Diyuturunumiyu 32:18

Linimtan nida ti Diyus ti palalan-iban nida pag batu imaw ti naglalang sa kanda.

Diyuturunumiyu 7:9

Alalahana niyu ti Panginuun niyu Diyus imaw lang ti Diyus. Masarigan siya pag Diyus, ag pagtupadun niya kay kasunduan tugka sa manga sinulput manga magmahal sa kanya ag magsunud sa kay manga sugu.

Santiyagu 1:17

Kada mayad hanggan kang-ud pag pakaun pasay ginan sa langit, ginan sa Ama, sa naglalang sa manga init, bulan hanggan pamgasan sa langit. Balaw siya magkauman. Kay karayawan dayu bumaliw kadudulman.

Santiyagu 4:12

Usa lang ti nagpakaun Kasuguan, siya diman ngapu ti makapihu sa daut sa mayad. Siya lang ti may kamaskihan hampay makaparibri sa tawu ag makapapas sa tawu. Dapat si unu lugud kawu nakan kawu magpihu sa kanmu kaparihu tawu nu daut nu mayad?

1 Pidru 2:6

Dahil magkun sa Banal Kasuratan, “Bantayi niyu, ipinakana niku sa banwa Siun ti usa ka batu pag kalap binuwat niku patakinan, imaw yi ti mahalaga. Balaw mibuyu una hintay pag tawu nu sumarig sa kanya.”

1 Samwil 2:2

Unman gid may iba banal nu unman ti Panginuun. Unman gid may pumarihu sa kanya. Unman gid may palalan-iban pag batu ti pumarihu sa kanta Diyus.