Binwat 11:3 - Hanunuu

³ “Nagdayun maaw kawu sa balay manga balaw Hudiyu, nagsaru paman kawu sa kanda.”

Binwat 11:3 Iomraidhean Croise

Matiyu 9:11

Pagka nakitan manga Parisiyu kanda magsararuhan, pinaingana nida kay manga tuludluan ni Hisus magkun, “Hayga magsaru kanyu maisturu sa manga manunukut buhis hanggan sa manga makasalanan?”

Lukas 15:2

Ti manga Parisiyu hanggan manga manugtudlu Kasuguan nanrayansan magkun, “Inda pag tawu maaw matinanggapun sa manga makasalanan ag magsaru sa kanda.”

Huwan 18:28

Pagka surip yi dinara nida si Hisus ginan sa kan Kaipas balay tag sa balay gubirnadur. Ti manga pinunu Hudiyu unman nagsaka, dahil daut sa kanda tun-anun nu sumaka sa balay balaw Hudiyu, barang unman sida mahimu makakaun sa karan-an sa Pag-alaala sa Karibrihan.

Binwat 10:23

Bag-u kan Pidru pinasaka sida sa balay magkun, “Pag-igya waya kamu sitay.” Pagka surip nag-alistu si Pidru bag-u kinmuyug siya sa kanda. May kaibahan waya siya manga patar-ari taga Hupi.

Binwat 10:28

Bag-u sinabi ni Pidru sa kanda magkun, “Magkaalaman diman waydi niyu nu angay sa surundanun manga Hudiyu bawal gid ti usa ka Hudiyu magsabang una magpaminsan sa manga balaw Hudiyu. Dapat ipinakilala Diyus sa kangku danga yi kunu pagsabiha niku may turun-anun waya aku una sa kantapu pag tawu.

Binwat 10:32

Nakan ngani pagpasugu kawu atag sa banwa Hupi hampay bul-un nida ti usa ka tawu kay buu ngaran si Simun Pidru. Magdayun siya sa balay ni Simun manugtimpala sa paknul, ati sa baybay dagat.’

Binwat 10:48

Nakan sinabi ni Pidru, “Kailangan itulbaw yi sida ipasakup sa ngaran ni Hisu-Kiristu.” Pagka sida itinulbaw yi, tinawidan waya nida si Pidru may manga pira waya ka sirang.

1 Kurintu 5:11

Dapat inda kang surat sa kanyu, danga kamu magpakiusa una sa kantapu pag-ingarnan patar-ari, nu siya magpanguragin, maramuun, magsamba sa diyus-diyusan, aw ngatay magmuransa, maglangu, magtakaw. Nu katunda kay ugali, danga yi lang magsaru sa kanya.

Galasya 2:12

Dahil pagka udwaya rinmas-ug ti manga tawu kay ipinadara ni Santiyagu, nagsaru di si Pidru sa manga patar-ari balaw Hudiyu. Dapat pagka rinmas-ug yi ngani kay manga ipinadara ni Santiyagu, nagpakarayu yi siya nagpatuhay sa lamak dahil nadala siya sa manga magtudlu sa pagturi.

2 Huwan 1:10

Una gid hintay ti rumas-ug sa kanyu nu bukun inda kay pag-itudlu, danga gid niyu tanggapun siya sa kanyu balay, danga gid niyu pagbatia.