2 Timutiyu 1:8 - Hanunuu

⁸ Nakan ngani danga magkay-a magtultul tungkul sa Panginuun. Danga waydi ikakay-a nimu kang mapirisuhan dahil sa kanya. Bagkus ngap pagdamay sa kakurian dahil sa magtudlu Mayad pag Barita, pagsarig sa kamaskihan Diyus.

2 Timutiyu 1:8 Iomraidhean Croise

Kanta 119:46

Unman aku mangay-a mamagaw kanmu manga tultulanun una waya sa manga hari.

Kanta 19:7

Ti kasuguan Panginuun balaw may salan. Magpakaun inda kabisugan nita buhi. Ti manga pag-itudlu Panginuun masarigan, magpakaun kadunungan sa manga balaw may alam.

Isayas 51:7

Pagpatingi kamu sa kangku, kamu ti manga may alam nu hintay ti kang-ud ag magsunud sa kang kasuguan! Danga kamu magkadala sa manga magpakay-a ag magpuya pag manga tawu sa kanyu.

Isayas 8:20

Ti kasuguan ag ti itinudlu Panginuun ti kailangan niyu patingihan. Nu may magsabi manga bagay salumpang sa manga pag-itudlu Panginuun, magkadluman waya kay naisipan tunda pag tawu.

Markus 8:38

Dahil una hintay pag tawu sa manga uragin ag manga makasalanan pag tawu sa babaw daga nu ipaulam kay nagkilala sa kangku hanggan sa kang bagaw, ipaulam diman waydi Anak Tawu kay nagkilala sa kanya nu rumas-ug siya aban may mamaski pag kapangyarihan niya Ama, kaibahan niya ti manga banal pag anghil Diyus.”

Lukas 9:26

Una hintay pag tawu tigpaulam kay nakakilala sa kangku hanggan sa kang manga bagaw, ipaulam waydi diman siya aban Anak Tawu sa kay pagbalik niya sitay aban may kadayawan hanggan kadayawan Ama, kaibahan niya ti manga anghil ginan langit.

Huwan 15:27

Bag-u kamu tumultul diman tungkul sa kangku sa manga tawu, dahil kamu manga kaibahan niku ginan waya sa kabag-u kang nanudlu.

Huwan 19:35

Ti nakakit gid sa tunda pag nangyari imaw diman ti nagtultul hampay kamu hanggan sumarig. Dahil tutuu gid kay itinultul, alam niya balaw pudil kay pagsabihun.

Binwat 5:41

Pagka ginan sa atubangan Katipunan manga Pinunu, nuli maan ti manga apustul. Nakabaya gid ungud sida, dahil pinakan-an sida karampatan hampay mag-agwanta parusa dahil ngani sa kan Hisus.

Ruma 1:16

Balaw gid niku pag-ikakay-a ti Mayad pag Barita, dahil imaw yi ti kapangyarihan Diyus sa ikaribri kada tawu nu sumarig, una sa tanan sa manga Hudiyu, bag-u hanggan sa manga balaw Hudiyu.

Ruma 16:25

Dayawun nita ti Diyus. Siya ti makaparig-un sa kanyu pagsarig angay sa Mayad pag Barita tungkul sa kan Hisu-Kiristu kang pag-itudlu sa kanyu. Maalaman diman waydi nita tunda sa katutuuhanan udwaya maburayhawan kaybi ginan sa sulud kadugayun pag timpu.

Ruma 8:36

Angay sa isinurat sa Banal Kasuratan magkun, “Alang alang sa kanmu, madala yi lang kami matyun ginan sa surip hanggan sa malambung. Inunu-unu kami ga manga karanidu maratyun.”

Ruma 9:33

imaw ti nisurat sa Banal Kasuratan magkun, “Nagpauli aku sa banwa Siun usa ka batu karadayaanun, laun pag batu kanda matalakpahan. Dapat balaw mibuyu una si unu pag tawu nu sumarig sa kanya.”

1 Kurintu 1:6

Mag-akitan yi waydi sa kanyu ti usa ka puruyba tungkul sa katutuuhanan sa kan Kiristu Hisus kanmi itinudlu.

2 Kurintu 6:7

sa magbagaw katutuuhanan hanggan sa kamaskihan Diyus. Kanmi matadlung pag ugali buhi imaw kanmi armas panlaban hanggan panangga.

Ipisu 3:1

Nakan magdarangin ngani aku sa kanyu, aku si Pablu ti napirisu dahil sa kan Kiristu Hisus tungkul sa kanyu sa manga balaw Hudiyu.

Ipisu 3:13

Nakan ngani kang pagsabihun sa kanyu, danga malubay kanyu naisipan dahil sa kakurian kang pag-agwantahun tungkul sa kanyu. Inda nakan sa ikadayaw ngap niyu.

Ipisu 4:1

Nakan aku, ti usa ka napirisu dahil sa kang magsirbi sa Panginuun, magsabi sa kanyu, pag-ugali kamu angay sa mayad pag ugali manga pinili Diyus.

Ipisu 4:17

Inda kang pagsabihun kang gid pag-ipalugus sa kanyu sa ngaran Panginuun magkun, danga yi kamu mag-ugali parihu sa manga tawu unman magsarig sa kan Kiristu, ud may pulus kanda pag-isipun.

Pilipus 1:7

Magbaya aku sa kanyu, pirmi diman kang pag-isipun sa kang tagipusuun. Nakan balaw salan kang pag-isipun katida sa kanyu tanan, kabay kamu tanan minsan sa kangku may kabahagi sa inda pag marinu pag katungkulan kay ipinakaun Diyus sa kangku una taynguna kang sa pirisuhan hanggan sa kang magtultul sa Mayad pag Barita sa atubangan husgadu.

Pilipus 3:10

Kang gustu lang gid makilala si Kiristu, maungdan ti kamaskihan niya pagkabuhi uman ag masaydan niku kay kakurian ag miparihu aku sa kanya hanggan sa kay kamatayan.

Pilipus 4:13

Kaya niku mabuwat inda tanan dahil si Kiristu tigpabisug sa kangku.

Kulusas 1:11

Pag-idarangin diman nimi kamu hampay kay daka gid pag kamaskihan Diyus ti pumarig-un sa kanyu, hampay masulung di gid kamu mag-agwanta sa tanan kakurian,

Kulusas 1:24

Magbaya aku sa kang mag-agwanta sa kang bilug taynguna alang-alang sa kanyu, dahil sa panab-anan niku kakurian inda pag-iparargu niku ti pag-agwantahun parihu ga kay inagwanta ni Kiristu para sa iglisya, sa kay pinagkabilug.

1 Tisalunika 3:4

Dahil pagka kami asan waya, ipinaalam yi nimi daan sa kanyu pihu kita may malakawan kakurian, ag nangyari ngap ngani kainda.

1 Timutiyu 2:6

Ipinakaun niya kay sadili bilug naglukat sa tanan tawu. Sa taning pag kaudasan pag ipinakilala niya kay ginayak Diyus pag karibrihan.

2 Timutiyu 1:10

Dapat niburayhaw lang inda pagka rinmas-ug si Kiristu Hisus kanta Manugribri. Tinalu niya ti kamatayan ag ipinakilala ti buhi unman may katapusan sa panab-anan Mayad pag Barita.

2 Timutiyu 1:12

Tida ngani kay dahilan nakan aku mag-agwanta inda pag kakurian. Dapat ay una katida unman aku mag-alinlangan. Dahil lubus niku magkakilala kang Panginuun kang pagsarigan. Pihu gid kaya niya maingatan ti kang inintirga sa kanya hanggan sa ud rumas-ug ti kaudasan Panginuun.

2 Timutiyu 1:16

Pag-idarangin niku ti magtal-anakan ni Unisipuru hampay kaawaan sida Diyus. Balaw di kas-a sinaya niya aku. Balaw aku kinay-ahan niya madi aku pirisu.

2 Timutiyu 2:3

Pagdamay kawu sa kakurian parihu sa usa ka mayad pag sundalu ni Kiristu Hisus.

2 Timutiyu 2:8

Alalahana nimu si Hisu-Kiristu ti nabuhi uman, imaw ti linahi ni Dabid angay sa Mayad pag Barita kang pag-itudlu.

2 Timutiyu 2:9

Dahil sa kang magtudlu Mayad pag Barita nakan aku mag-agwanta sa kakurian hanggan sa pirisuhan parihu sa may kasalanan. Dapat balaw magkagapus ti Bagaw Diyus.

2 Timutiyu 4:17

Dapat balaw aku pinabay-anan Panginuun. Pinakan-an aku kabisugan hampay lubus mipaliwanag niku ti Mayad pag Barita sa tanan manga balaw Hudiyu. Naribri di aku madi kanda mana ibahug sa manga liyun.

2 Timutiyu 4:5

Nakan ngani pagmapinigilun kawu sa tanan udas. Pag-agwantaha nimu ti kakurian magras-ug sa kanmu. Tupada nimu ti katungkulan manugpadakit Mayad pag Barita. Asikasuha gid nimu inda pag buruwatun.

1 Pidru 1:5

Sinmarig kamu, nakan kay kamaskihan Diyus tig-ingat sa kanyu hanggan sa udwaya matanggap niyu ti karibrihan kay itinigana Diyus hampay ipaburayhaw nu katapusan yi panahun aban.

1 Huwan 4:14

Nakitan nimi ag kanmi pagpatutuuhanan kuntay sinugu Ama kay Anak hampay siya yi ngani ti Manugribri sa tanan manga tawu sa babaw daga.

Hudas 1:24

Diyus lang ti makaingat sa kanyu hampay kamu balaw malagpak sa kasalanan. Mipaatubang diman niya kamu tabug sa kay kadayawan unman yi may daut kamu una di, nu ud lubus yi ngap sa kabayaan.

Ipinakakit 1:2

Bag-u isinurat ni Huwan ti tanan niya nakitan tungkul sa kay sinabi Diyus hanggan tungkul sa kay ipinaalam ni Hisu-Kiristu.

Ipinakakit 1:9

Aku si Huwan, kanyu patar-ari. Magpakiusa kita sa kan Hisus, nakan parihu kita makalakaw sa kakurian, kanta gid pag agwantahun dahil sa kanta magpasakup sa kay paghari Diyus. Tinulak aku atag sa puru Patmus sa karaw-an dagat dahil sa kang magtudlu Bagaw Diyus imaw yi ti katutuuhanan kay ipinakilala ni Hisus.

Ipinakakit 12:11

Kanta manga patar-ari nanalu laban sa diyablu, dahil sa dugu Anak Karanidu, dahil diman sa kanda magpadakit sa Bagaw Diyus. Balaw sida naghinayang sa kanda buhi una hanggan waya tugka sa kamatayan.

Ipinakakit 19:10

Napadapa aku sa atubangan anghil hampay magsamba sa kanya. Dapat sinabi niya sa kangku, “Danga duy, aku kabay suruguun diman ga kanmu, parihu diman gid ga kanmu manga patar-ari manga magpadakit tungkul sa kan Hisus. Diyus ti sambahun nimu.” Dahil ti katutuuhanan tungkul sa kan Hisus imaw yi ti pinakabusul sa tanan sinabi ag isinurat manga purupita.