2 Pidru 2:14 - Hanunuu

¹⁴ Unman sida may paghanapun nu ud pararauragan lang. Ud magsuku sida sa magbuwat kasalanan. Pagtaban-tabanun nida ti manga malumuy tag sa kasalanan. Anad gid sida sa maramuun. Sida manga sinaadan yi Diyus.

2 Pidru 2:14 Iomraidhean Croise

Hub 31:7

Nu unman aku magsunud sa hustu pag dalan ag pagsundun niku ti alangan isip mag-akitan niku manga mata, ag inuringan niku kang sadili,

Hub 31:9

Nu nagarya aku manga babayi ngatay naibug aku sa asawa niku kaparihu,

Kabagawan 5:6

Unman niya pagbatiun ti dalan atabug sa buhi. Balaw matadlung kay paglakawan ag unman ngani niya inda alam.

Kabagawan 6:25

Danga kawu magkawili sa kay karinuan. Danga kawu magkadara sa kay panggarya.

Isayas 1:16

Lumpiyuha niyu kanyu sadili. Apasi yi niyu kanyu magbuwat kadautan sa kang atubangan.

Isayas 34:5

Pagka natapus gamitun Panginuun kay baladaw sa langit, mitama maan inda sa Idum hampay parusahan ag rurisun.

Isayas 65:20

Ati unman may mamatay lapsag ngatay anak waya. Una si unu ti mamatay sa idad 100 ka timpu kilalan-un anak waya, ag ti mamatay udwaya aput sa 100 ka timpu kilalan-un sinintinsiyahan niku.

Hirimyas 13:23

Mailisan aw tawu mabiru kay kulay niya lukub? Mab-ul aw liyupardu kay riruk sa kay bilug? Unman gid! Katunda diman kamu pag manga taga Hirusalim, balaw kamu makabuwat mayad dahil ugali yi niyu ti magbuwat daut.

Isikil 13:18

Sabihi sida aku, ti Panginuun Diyus, magbagaw magkun: Kaawaawa kamu pag manga babayi magpandaya sa kang nasakupan, anak man ngatay gurangun, sa panab-anan manga anting-anting. Pagpaulian niyu sida bugkus sa kanda manga kamang ag taung sa kanda manga ulu bilang manga anting-anting. Gustu niyu dayaun ti buhi niku nasakupan para sa kanyu sadili pag kaayadan.

Matiyu 12:34

Kamu ga linahi manga udtu adlaw. Kabitay pag masabi niyu ti mayad pag manga baragawun nu kamu ngap daut. Dahil nu hintay ti hinamnu tawu sa kay tagipusuun imaw diman kay pagbagawun.

Matiyu 23:14

“Kaawaawa kamu pag manga manugtudlu Kasuguan hanggan manga Parisiyu, magpabalhinguun lang kamu! Pagtabuhun niyu ti kasiyunan manga buranday dapat magpadayaw-dayaw diman kamu sa kanyu magdarangin araba. Dahil sa katida lalu waya mabuyat aban pag parusa sa kanyu!

Matiyu 25:41

“Kumumun maan ti Hari sa manga tawu sa wala baliwa, ‘Pagpakarayu kamu sa kangku ginan, kamu ti manga sinaadan, pag-ati kamu sa apuy unman magkapsa inalistu para sa diyablu hanggan sa kay manga anghil.

Matiyu 5:28

Dapat pagsabihun niku sa kanyu, ti kada magsinuk sa usa ka babayi may tapil yi ibug, nagkasala yi ngap siya nag-uragin yi sa kay tagipusuun.

Markus 13:22

Dahil may manga pumabalhinguun aban kuntay siya yi ngani ti Pinili Diyus Manugribri pag Hari ag may lumuwang manga pudilun pag purupita. Pumakakit sida manga makadululaw ag lilingutan pag tanda hampay nu mahimu lang patalangun nida hanggan ti manga pinili Diyus.

Huwan 5:44

Magbaya kamu nu kamu magdarayawan sa usa kag sa usa, dapat unman kamu magmasigasid hampay makadayaw sa kanyu ti tutuu Diyus. Nu katunda kamu, kabitay lugud kamu pag pumaniwala sa kangku?

Ruma 16:18

Ti katunda pag manga tawu unman magsirbi sa kan Kiristu sa kanta Panginuun, bagkus ngap pag-intindihun lang nida kanda sadili kailangan. Pagdayaun nida ti manga kurang sa kinaalman sa panab-anan marahusay ag mararinu nida pamagaw.

1 Kurintu 11:19

Siguru pihu balaw parihu kamu tanan sa kanyu pagsarig, hampay burayhaw ngap sa kanyu ti manga ungud magsarig sa Panginuun.

Ipisu 2:3

Kaybi kami pag manga Hudiyu minsan diman waydi sa manga maglaban sa Diyus, nag-ugali kami angay sa kagustuhan sadili pagkatawu, sinunud nimi ti daut pagkawilyan nimi bilug hanggan naisipan. Nakan angay sa kahamtangan nimi pagkatawu minsan kami sa tanan manga tawu pagkagalitan Diyus.

Ipisu 4:14

Bukun yi kita parihu ga manga anak di waya daradarahan sa una hintay ti pag-itudlu. Balaw kita parihu sa manga sarakyan sa dagat paglangkiangun humbak, pag-ipadpad durus. Udyi kita madaya manga tawu kay ibug daran-un kita tag sa kadautan.

Kulusas 2:18

Danga kamu maniwala hampay kanyu pirimyu unman madura sa kanyu. Dahil may manga tawu gustu nida pilitan kamu sa lagat-lagat unman maghandum karan-unun hanggan sa magsamba sa manga anghil. Magpalabi-labi sida sa kanyu dahil sa kanda nakitan ginan kunu sa Diyus. Dapat unman sida may ipadayaw-dayaw dahil kanda ugali naisipan parihu lang ga tanan tawu.

Santiyagu 1:8

nu magkauman-uman kay naisipan, ag nu unman malinaw ti turunu niya kagustuhan.

2 Pidru 2:18

Palabi-labihun sida nu magbagaw dapat unman diman may kahulugan ti kanda pagsabihun. Kanda garamitun kanda daut pag kagustuhan naisipan hampay maudyukan bumalik maan sa kadautan ti manga bag-u lang magpakarayu sa manga tawu daut kay ugali.

2 Pidru 2:3

Manga maramuun sida, nakan magpabalhinguun sida sa kanda tudlu hampay sida pakan-an niyu kuwarta. Ginan waya sa kabag-u ihinanda yi ti sintinsiya sa kanda, alistu yi sumintinsiya.

2 Pidru 3:16

Sa tanan niya pag manga surat kainda diman kay pirmi pag-ipaalaala tungkul sa inda pag katutuuhanan. Kay iba niya pag manga isinurat makuri masalman kay ibug sabihun, nakan ti manga malumuy kay intindi magsalan sa kanda magpakahulugan. Katunda diman waydi kanda pagbuwatun sa iba pag manga bahagi Banal Kasuratan sa ikadamhak ngap nida sadili bilug.

1 Huwan 2:16

Dahil ti tanan bagay sa kalibutan, ti manga daut pag kagustuhan naisipan, ti manga daut pag kagustuhan mata ag ti magpadayaw-dayaw sa kay kahamtangan, balaw ginan sa Ama nu unman ginan ngap sa kalibutan.

Hudas 1:11

Madala gid kanda patabgan dahil naghuwad sida sa kay ugali ni Kain. Parihu sa kan Balaam sinukmahan nida ti kadautan basta may matanggap sida kuwarta. Parihu ga kan Kura, sa kanda maglaban sida midamhak aban.

Ipinakakit 12:9

Ti laun pag daragun imaw yi ti pagkumnun gurangun pag ulay, kay ngaran diyablu, imaw ti pagkumnun si Satanas, imaw tigdaya sa bilug kalibutan. Ayinmut siya atag sa daga hanggan kay manga kakampi pag manga anghil ayinmut waydi.