1 Samwil 13:13 - Hanunuu

¹³ Sinabi ni Samwil sa kan Saul magkun, “Balaw mayad kanmu binwat! Unman inisip nimu mayad sa kanmu sadili nakan ngani kawu sinmalan. Unman nimu tinupad ti pagsabihun Panginuun nimu Diyus sa kanmu. Nu abi kawu nagsunud lang mana, parig-unun di Panginuun kanmu maghari sa Israil hanggan kanmu manga lahi hanggan waya aban.

1 Samwil 13:13 Iomraidhean Croise

Gimpuunan 31:28

Udyi lang waydi nimu aku pinakan-an rugar hampay maarkan niku kang manga laki hanggan manga anak bag-u sida ginminan. Balaw gid mayad inda kanmu binwat.

2 Samwil 24:10

Nagruku si Dabid igu naipasinsus niya ti manga tawu. Nakan magkun siya sa Panginuun, “Nagkasala duy aku dahil sa kang binwat. Nakan magpakihampang aku sa kanmu, Panginuun, patawada duy aku, kanmu suruguun sa kang kasalanan, dahil unman may pulus kang binwat.”

1 Hari 18:18

Sinmagut si Ilyas, “Balaw aku ti magpan-gulu sa Israil, nu unman kawu hanggan ti magtal-anakan nimu ama. Dahil dinayu niyu ti manga sugu Panginuun ag sinamba niyu ti manga histuda diyus-diyusan Baal.

1 Hari 21:20

Pagka nakitan ni Akab si Ilyas, magkun siya, “Nasampakan diman aku niku kalaban!” Sinmagut si Ilyas, “Hu, inmataytag aku sa kanmu dahil ipinabili nimu kanmu sadili sa pagbuwat daut sa magbantay Panginuun!

1 Krunika 10:13

Namatay si Saul dahil balaw siya matinupadun sa Panginuun. Unman niya tinupad ti sugu Panginuun, ag nandangup waya ngani siya sa manga pandaniwan

2 Krunika 16:9

Dahil magbantay gid ti Panginuun sa buu kalibutan hampay pabaskugun ti manga tawu matinupadun sa kanya. Kabuangan kanmu binwat! Nakan kainda ginan pirmi yi kawu manlaban.”

2 Krunika 19:2

sinulang siya ni Hihu kay anak ni Hanani ag magkun, “Hayga inawatan nimu ti daut ag kinaibgan ti maglaban sa Panginuun? Dahil sitay, nagalit ti Panginuun sa kanmu.

Hub 34:18

Unman aw siya ti magsungyaw sa daut pag hari ag sa takinan unman may pulus?

Kabagawan 12:8

Pagdayawun ti madunung pag tawu, dapat pagpuyaan ti tawu liku kay naisipan.

Kabagawan 19:3

May manga tawu pag-ipadamhak nida kanda sadili dahil unman may intindi, bag-u ti Panginuun waya kanda pagsisihun.

Isayas 39:5

Bag-u magkun si Isayas kan Isikyas, “Patingihi nimu inda ti pagsabihun Panginuun Makamaskihan:

Hirimyas 18:10

bag-u tunda pag nasyun ngatay kaharian bumuwat kadautan ag balaw sinmunud sa kangku, balaw yi lang niku iparargu kang gayak kaayadan sa kanda.

1 Samwil 1:22

Dapat unman kinmuyug si Hana. Magkun siya sa kay asawa, “Nu bumul-iw yi ti lapsag sa pagsusu sa kangku darahun niku siya sa Turda Taragbuan Panginuun hampay ihandug sa kanya. Ati yi siya pag muli sa buu niya buhi.”

1 Samwil 13:12

Nakan ngani magkun aku, barang labanan kami manga Pilistiyu sitay sa Gilgal ag udwaya paman hinagad niku ti panalu ginan sa Panginuun. Nakan napilitan yi lang aku nansagda manga handug pagsunugun.”

1 Samwil 15:11

“Magsisi gid aku binwat niku hari si Saul, dahil nagpatlikud siya sa kangku ag balaw nagsunud sa kang sugu.” Pagka nasaydan inda ni Samwil, nangisug gid siya, ag nandarangin siya buu yabi sa Panginuun.

1 Samwil 15:22

Dapat nagsagut si Samwil, “Magbaya aw lugud ti Panginuun sa manga handug niyu kaysa pagsunud sa kanya? Ti pagsunud sa Panginuun mas mayad man kaysa manga handug. Ti pagpatingi sa kanya mas mayad man kaysa paghandug manga taba karanidu.

1 Samwil 15:28

Magkun si Samwil sa kanya, “Kainda diman ti mangyari sa kanmu: Bul-un yi Panginuun taynguna pag sirang ginan sa kanmu ti kaharian Israil, bag-u ipakaun sa kanmu kaparihu Israilita mas mayad man kaysa kanmu.

1 Samwil 16:1

Ati katpung, magkun ti Panginuun sa kan Samwil, “Tugka kapira kawu pag manrukuan para sa kan Saul? Binugyahan yi niku siya bilang hari Israil. Taynguna, pun-a lana ulibu kanmu sungay pag sukadan, bag-u pag ati kawu sa kan Isai sa Bitlihim. Pinili niku ti usa sa kay manga anak hampay humari.”

1 Samwil 26:21

Magkun si Saul, “Nagkasala aku. Pagbalik yi kawu Dabid, anak niku, ag balaw yi niku umanun saktan kawu dahil unman nimu aku minatay taynguna pag sirang. Nagbaliw aku usa ka buang dahil sa kang binwat. Daka gid kang kasalanan.”