1 Pidru 2:12 - Hanunuu

¹² Kailangan pag may kaayusan kanyu ugali sa karaw-an manga unman magsarig sa Panginuun. Una abi kamu kanda pagbangdanan sa buwat daut, makitan di nida kanyu mayad pag buwat hampay dumayaw di aban sida sa Diyus nu kaudasan yi karas-ugan ni Kiristu.

1 Pidru 2:12 Iomraidhean Croise

Kanta 37:14

Ginabut yi manga daut kanda manga baladaw ag linabtung nida kanda manga pamana hampay matyun ti manga makuri hanggan ti manga pugri magpangabuhi sa hustu.

Kanta 50:23

Maggalang sa kangku ti maghandug may pasalamat, ag ti magdahan sa kay pag-ugaliun iribri niku.”

Isayas 10:3

Hintay ti buwatun niyu sa sirang pagsintinsiya sa kanyu? Hintay ti buwatun niyu nu rumas-ug ti kadamhakan ginan sa arayu? Sa kantapu kamu pag manhagad awat? Ag naan niyu pag-itagu kanyu kayamanan?

Danyil 6:4

Nakan ngani, ti duwa niya ka kaibahan manugpaanyu ag ti manga gubirnadur nanhanap salan sa pagdumara ni Danyil agud may ibangdan sida laban sa kanya. Dapat unman gid sida may nakitan salan dahil masarigan gid si Danyil ag mayad kay magdumara.

Matiyu 10:25

Makabaya ti tuludluan nu pumarihu sa kay maisturu, makabaya diman ti panawuhun nu pumarihu siya sa kay amu. Nu ti puun magtal-anakan pag-ingarnan Biilsibul, lalu waya pagmuransahun kay manga kaibahan.”

Matiyu 5:11

“Papaladan kamu Diyus nu pagmuransahun una hanggan pag-unuunuhun, una pagbagawan kamu una lang hintay pag daut pasay kapudilan dahil sa kanyu magpasakup sa kangku.

Matiyu 5:16

Katunda diman waydi iparayaw niyu kanyu sulu sa atubangan tanan tawu hampay makitan nida kanyu manga mayad buwat bag-u kanda dayawun kanyu Ama sa langit.”

Matiyu 9:8

Pagka nakitan manga tawu tunda, nadala sida ag nagdayaw sa Diyus sa nagpakaun katunda pag karampatan sa manga tawu.

Lukas 1:68

“Dayawun nita ti Panginuun ti Diyus Israil, dahil kay inawatan ag linkat niya kay nasyun.

Lukas 19:44

Wasakun gid nida kawu ag lipulun nida ti manga tawu mag-uli sulud nimu alad batu. Unman nida sawadan una di usa ka batu sa kaparihu babaw batu, dahil unman nimu nakilala kay kaudasan pagka nagluwang ti Diyus hampay kawu mana kay iribri.”

Lukas 6:22

Papaladan Diyus kamu nu pagkagalitan manga tawu, nu pagdayuun ag pagmuransahun, nu pag-ikadaut kamu dahil sa kanyu pakiusa sa Anak Tawu.

Huwan 13:31

Pagka napalwas yi si Hudas, sinabi ni Hisus magkun, “Taynguna ipaburayhaw yi ti kadayawan Anak Tawu. Ag ginan sa kanya pag ipaburayhaw diman ti kadayawan Diyus.

Binwat 15:14

Kis-ab itinultul ni Simun kay pangaawa Diyus sa manga balaw Hudiyu, nakan sa kabag-u kay pinili sida hampay sida hanggan kay yi waydi nasyun.

Binwat 24:13

Unman diman sida may puruyba tungkul sa kanda manga dimanda laban sa kangku.

Binwat 25:7

Pagka rinmas-ug ngani si Pablu, susun linibutan siya manga Hudiyu ginan sa Hirusalim. Mayamu pag manga sumbung mabuyat kanda binulwat laban sa kanya, dapat unman sida may puruyba kuntay tutuu kanda sumbung.

Binwat 28:22

Dapat gustu diman gid nimi pakidnugan nu kabitay kanmu manga sarabihun, dahil magkaalaman yi waydi nimi inda pag surundanun niyu paglabanan manga tawu una naan pag rugar.”

Ruma 12:17

Nu may magbuwat daut laban sa kanyu, danga pagbalusi daut. Pangungud kamu sa kanyu ugali mayad sa magbantay tanan tawu.

Ruma 13:13

Pag-ugali sa mayad dahil sa karayawan yi kita, danga pag-abalaha ti udas sa maglangu, sa magulu pag kasulungan, danga pagpasibut-i ti sadili daut kagustuhan pagkatawu, una sa kahalayan, una sa irisgan, una sa hirirakan.

Ruma 14:18

Nu katunda kay magsirbi tawu sa kan Kiristu, pagbayaun siya Diyus ag paggalangun manga tawu.

Ruma 15:9

ag hampay ti manga balaw Hudiyu magdayaw waydi sa Diyus dahil sa kay pangaawa, angay sa isinurat sa Banal Kasuratan magkun, “Nakan ngani pumasalamat aku sa kanmu sa atubangan manga balaw Hudiyu. Kantahun niku ti kadayawan nimu ngaran.”

1 Kurintu 14:25

Bag-u ipaburayhaw Ispiritu ti manga ilinihim pag kasalanan sa kay tagipusuun, nakan ngani lumuhud siya sumamba sa Diyus ag rargu sumabi siya, “Tutuu maaw ti Diyus sa kanyu karaw-an.”

2 Kurintu 1:12

Inda kanmi ipagdayaw sa Diyus, pagpatutuuhanan nimi naisipan unman may pabalhinguun kanmi magpakiusa sa tanan tawu ag lalu ngap sa kanyu angay sa kanmi magpasakup sa kay kabanalan hanggan katutuuhanan Diyus, dahil lang sa kay pakaun kaayadan Diyus, bukun yi sa kadunungan angay lang sa pagkatawu.

2 Kurintu 13:7

Kanmi diman pag-idarangin kamu sa Diyus hampay danga gid mana kamu magbuwat daut, balaw diman hampay makitan manga iba kami ti mayad, bagkus ngap hampay kamu bumuwat yi gid sa mayad una abi nangus nakitan kami ti ga unman may pulus.

2 Kurintu 8:21

Pag-isipan nimi hampay mabuwat inda sa ikamayad sa kay magbantay Panginuun hanggan sa paghilingan manga tawu.

Ipisu 2:3

Kaybi kami pag manga Hudiyu minsan diman waydi sa manga maglaban sa Diyus, nag-ugali kami angay sa kagustuhan sadili pagkatawu, sinunud nimi ti daut pagkawilyan nimi bilug hanggan naisipan. Nakan angay sa kahamtangan nimi pagkatawu minsan kami sa tanan manga tawu pagkagalitan Diyus.

Ipisu 4:22

Tayaki yi niyu kanyu daan pag ugali. Bul-a yi niyu kanyu daan pagkatawu mag-idamhak dahil sa daut pag kagustuhan naisipan.

Pilipus 1:27

Nakan ngani kailangan gid kamu pag-ugali angay sa Mayad pag Barita tungkul sa kan Kiristu. Nu katunda una aku makaasan ag makitan niku kamu, una unman, maalaman diman niku mirinsan di kanyu turunu ag mag-arawatan kamu hampay maingatan ti kanta pagsarigan Mayad pag Barita una may manga kalaban.

Pilipus 4:8

Inda waya manga patar-ari, kang pagsabihun sa kanyu. Ilubus niyu kanyu naisipan sa una hintay pag manga kaayadan sa ikadayaw manga iba. Nakan ngani pag-ugali yi kanyu naisipan sa manga lunsay tutuu, sa manga pagbayaun manga tawu, sa mahal, sa balaw may ikasabi, sa maalumanay pag-iisip, sa manga pagmahalun manga iba.

1 Tisalunika 4:12

Nu katunda, galangun kamu manga tawu udwaya magkilala sa Panginuun. Usa sa siti, danga niyu isarig sa iba kanyu pangabuhi.

1 Timutiyu 2:2

Kailangan idarangin niyu ti manga hari hanggan ti tanan tawu may kangaranan hampay kita may kaayusan ag may kahusayan sa kanta magpasakup sa Diyus ag may mayad pag ugali.

1 Timutiyu 4:12

Danga pasnuan nimu nu magpuya diman sida sa kanmu dahil anak waya kawu baliwa. Bagkus pagpakasipag kawu hampay kawu ti mustara sa manga magsarig sa kan Kiristu, sa kanmu pamagawan, sa kanmu ugali, sa kanmu pagmahal, sa kanmu pagsarig hanggan sa kanmu unman may huput daut una di.

1 Timutiyu 5:10

kailangan pagpatutuuhanan manga iba kuntay mayad kay buwat, mayad kay nagpadaka sa kay manga anak, mahusay kay nagtanggap sa manga nagsabang sa kay balay. Nagsirbi diman siya sa manga patar-ari sa Panginuun, nangawat sa manga may kakurian, ihinanda niya kay sadili sa tanan mayad pag buwat.

Hibriyu 13:18

Daranginan niyu kami, dahil tutuu kami unman may pag-isipun daut sa kanmi tagipusuun una sa kanmi naisipan. Gustu lang nimi pagmarinu kanmi ugali sa tanan nimi buruwatun.

Hibriyu 13:5

Danga kamu mag-ugali maraibgun sa kuwarta. Pagmasulung yi lang kanyu naisipan sa kanyu kahamtangan. Dahil Diyus diman ti may sabi magkun, “Una sa hintay ngarana balaw pakurangan niku kawu, una sa hintay ngarana unman gid pabay-anan niku kawu.”

Santiyagu 3:13

Hintay nguna sa kanyu ti madunung hanggan mapininsarun? Pakitan niya tunda sa kay mayad pag ugali, angay sa mapinakumbabaun pag kadunungan.

1 Pidru 2:15

Dahil katida gid kay kagustuhan Diyus, kamu pagbuwat mayad hampay imaw kanyu panalu sa pagbagawun manga tawu unman nakaintindi.

1 Pidru 3:16

Dapat pagmaalumanay kamu paggalang nu kamu magpaliwanag. Pag-ugali kamu sa malumpiyu kanyu tagipusuun hanggan naisipan hampay mangay-a ti manga magmuransa sa kanyu hanggan ti manga mag-away sa kanyu mayad ugali, dahil ngani kamu kay suruguun ni Kiristu.

1 Pidru 4:11

Nu kawu magpaliwanag, pagginan sa Diyus kam paliwanag. Nu kawu manugsirbi waydi, gamitun nimu ti kabisugan ipinakaun Diyus sa kanmu magsirbi, hampay sa tanan bagay dayawun ti Diyus dahil sa kan Hisu-Kiristu. Sa kanya ti kadayawan hanggan kamaskihan hanggan di aban. Amin.

2 Pidru 3:11

Katunda ngani aban ti pangatapusan tanan bagay, nakan ilubus niyu ipasakup kanyu sadili sa Diyus, kanyu ugali buhi pag-angay yi sa kay kagustuhan,

Rut 3:14

Nakan naturug si Rut sa aluludan ni Buus tugka surip, dapat madulum-dulum waya binmangun yi si Rut hampay balaw siya makilala, dahil dayu si Buus may makaalam kuntay nag-atag si Rut sa kay giriukan.