1 Pidru 1:12 - Hanunuu

¹² Pagka ipinaalam manga purupita inda pag manga katutuuhanan itinudlu waydi Diyus sa kanda, kuntay kanda pagbagawun balaw may pakinabang sa kanda nu unman sa kanyu ngap. Inda pag manga katutuuhanan nadnugan yi niyu ginan sa manugpadakit Mayad pag Barita Diyus. Pagka sinugu Diyus ti Ispiritu Banal ginan sa langit tabug sa manga manugbarita, nanudlu sida sa kanyu angay sa udyuk Ispiritu Banal. Una ti manga anghil sa langit daka mana kanda gustu masalman nida inda pag manga katutuuhanan.

1 Pidru 1:12 Iomraidhean Croise

Pag-ighit 25:20

Kailangan mabukladan patungud kay manga pakpak kirubin hampay mahamuyan nida manga pakpak ti taklub, ag kailangan mag-aratubangan sida duwa magbantay sa taklub.

Kabagawan 1:23

Pagpatingi kamu sa kang magtamyaw sa kanyu. Taynguna, sabihun niku sa kanyu kang pag-isipun. Ipaalam niku sa kanyu kang sarabihun laban sa kanyu:

Isayas 32:15

Mangyari inda tugka sa ipadara sa kanta ti Ispiritu ginan sa langit. Nu katida, ti pangawakawaan bumaliw maabunu pag daga ag ti maabunu pag daga bumaliw kapuruan.

Isayas 53:1

Si unu ti nagpaniwala sa kanmi ibinarita? Ag sa kantapu pag ipinaburayhaw Panginuun kay kamaskihan?

Danyil 10:1

Sa ikatlu pag timpu paghari ni Sayrus sa Pirsiya, may ipinasandam tultulanun sa kan Danyil pag-ingarnan diman Biltisasar. Tutuu ti tultulanun, tungkul inda sa laun pag girahan. Nasalman ni Danyil ti tultulanun dahil ipinaliwanag inda sa kanya sa panab-anan usa ka pangakakitun.

Danyil 12:13

“Ag kawu Danyil, pararguhan kanmu pagbuwatun. Mamatay kawu, dapat buhiun di maan kawu sa uryan pag sirang hampay matanggap nimu ti pirimyu inalistu para sa kanmu.”

Danyil 12:9

Nagsagut siya, “Danyil, paglakaw yi kawu, dahil kay sagut sa kanmu paingana lihim lang ag balaw kailangan itultul tugka sa ud rumas-ug ti katapusan.

Danyil 2:19

Sa ati pag yabi, ipinaalam Diyus sa kan Danyil ti tagin-up hari hanggan kay ibug sabihun sa panab-anan pangakakitun. Ag dinayaw ni Danyil ti Diyus sa langit.

Danyil 2:22

Pag-ipaliwanag niya ti ibug sabihun madalum pag manga bagay makuri masalman. Sa kanya ti karayawan, alam niya nu hintay ti ati sa kadudulman.

Danyil 2:47

Magkun siya sa kan Danyil, “Dahil sa kanmu pagtultul sa kang tagin-up ag pagtultul kay ibug sabihun, tutuu gid kanmu Diyus imaw ti higit makapangyarihan sa tanan pag diyus. Siya ti kailangan kilalan-un pag Panginuun manga hari. Ag siya lang gid ti makatultul manga madalum pag manga katutuuhanan.”

Danyil 8:13

Nasaydan niku ti duwa ka anghil magharampangan. Nagpaingana ti usa ka anghil sa usa, “Kabitay nguna kadugay matapus inda pag pangakakitun tungkul sa pag-ampara sa sirang-sirang pag handug hanggan ti pag-uring sa Balay Diyus imaw ti kadahilanan agud mapabay-anan inda, ag ti pagtatatata sa Balay Diyus hanggan sa manga taga langit pag sundalu?”

Danyil 9:24

“Itinagka yi Diyus ti 490 ka timpu sa banal pag banwa hanggan sa kanmu kasimanwa hampay umapas kanda paglaban ag pagbuwat daut sa Diyus, para malukat sida sa kanda manga kasalanan, hampay maiparargu Diyus ti katadlungan tugka aban, hampay matupad ti pangakakitun hanggan ti hula, ag hampay maitalaga maan ti Balay Diyus.

Huwil 2:28

“Bag-u ipakaun niku kang Ispiritu sa tanan tawu. Kanyu manga anak lalaki hanggan babayi manpadakit kang manga bagaw. Kanyu manga gurangun lalaki managin-up, ag kanyu manga kan-akan makakit manga pangakakitun.

Amus 3:7

Sa tutuu, unman magbuwat ti Panginuun Diyus una hintay nu unman niya inda ipinasandam sa kay manga manugsirbi pag manga purupita.

Sakaryas 12:10

“Pakan-an niku ispiritu maawaun ag maradarangin ti manga linahi ni Dabid hanggan ti manga taga Hirusalim. Bantayan nida aku kanda binunu, ag manlumi sida parihu sa gurang maglumi sa pagkamatay nida bugtung anak ngatay anak panganay.

Matiyu 11:25

Sa ati katpung magkun si Hisus, “Magpasalamat aku sa kanmu, Amang, kawu ti Panginuun sa langit hanggan sa daga. Magpasalamat aku dahil unman ipinaalam nimu inda pag manga bagay sa manga madunung ag sa manga mapininsarun, ipinakilala ngapu nimu sa manga tawu ga anak kay tagipusuun.

Matiyu 11:27

Pagkatapus, magkun si Hisus sa manga tawu, “Ti tanan bagay ipinabahala niku Ama sa kangku. Unman may nakakilala sa Anak nu unman ti Ama. Ag unman may nakakilala sa Ama nu unman ti Anak ag ti manga tawu gustu Anak makakilala sa Ama.

Matiyu 16:17

Nagsabi si Hisus sa kanya, “Pinapaladan kawu duy, Simun anak ni Hunas, dahil inda pag katutuuhanan unman tawu ti nagpakilala sa kanmu nu unman kang Ama sa langit.

Markus 16:15

Sinabi ni Hisus sa kanda magkun, “Pag-ati kamu sa tanan rugar sitay sa babaw daga, itudlu niyu ti Mayad pag Barita sa tanan manga tawu.

Lukas 15:10

Magkun si Hisus, “Kang sabi sa kanyu katunda diman waydi magbaya ti manga anghil Diyus nu may usa ka tawu nag-ampu kay kasalanan bag-u naghagad kapatawadan sa Diyus.”

Lukas 2:26

Pinaalman siya Ispiritu Banal magkun, unman makitan niya kay kamatayun hanggan sa udwaya nakitan niya ti Pinili Diyus Manugribri pag Hari.

Lukas 9:6

Pagka nakatapus yi kan Hisus bilin sa kay manga tuludluan, linmakaw yi sida. Nag-ati sida sa manga rugar, itinudlu nida ti Mayad pag Barita ag nagpaayad sida sa may manga sakit.

Huwan 15:26

“Sumitay ti Manug-awat ginan sa Ama tag sa kanyu, ti Ispiritu ngani imaw tigtudlu katutuuhanan tungkul sa Diyus. Suguun niku siya ginan sa Ama bag-u itultul niya sa kanyu ti tungkul sa kangku.

Binwat 10:44

Udwaya magkatapus kan Pidru paliwanag, kadaka lubus sinuldan ngap Ispiritu Banal ti tanan manga tawu siyun magpatingi sa Mayad pag Barita.

Binwat 16:10

Pagka naalaman ni Pablu ti ipinakakit Panginuun sa kanya, susun naghiwat yi kami hampay magdipay atag sa Masidunya, dahil nasalman nimi kami yi ngani kay pagsuguun Diyus hampay itudlu nimi ti Mayad pag Barita sa Masidunya.

Binwat 2:33

Dinara siya tabug sa langit ipinatukaw siya Diyus sa kay sikun baliwa minsan sa kay karampatan maghari. Tinanggap niya angay sa itinaratu Diyus ti Ispiritu Banal ginan sa Ama. Bag-u ilinubus niya ipinakaun ti Ispiritu Banal sa kanmi ga kanyu nakitan ag nadnugan taynguna.

Binwat 4:31

Pagka nakadarangin yi sida nauyug ti balay kanda tinipunan, sida tanan lubus sinuldan Ispiritu Banal ag matutum kanda naisipan nanudlu sida Bagaw Diyus.

Binwat 4:8

Bag-u si Pidru, lubus sinuldan Ispiritu Banal, nagsagut sa kanda magkun, “Kamu duy pag manga pangulu ag manga paggurangunun manga Hudiyu,

Binwat 8:25

Pinaanyuan waya nida ni Pidru ti manga patar-ari ati sa banwa, itinudlu waya nida ti bagaw Panginuun sa kanda. Bag-u sida nighit, nuli maan tabug sa Hirusalim. Sa kanda maglakaw, itinultul waya nida ti Mayad pag Barita sa manga tawu sa mayamu pag manga baryu sa daga Samarya.

Ruma 1:15

Nakan ngani masyadu yi gid gustu niku itultul ti Mayad pag Barita asan diman sa kanyu sa banwa Ruma.

Ruma 1:17

Dahil pagsabihun sa Mayad pag Barita nu kabitay pagkilalan-un Diyus ti tawu kuntay matadlung, tunda sa panab-anan lang pagsarig. Angay sa nisurat sa Banal Kasuratan magkun, “May buhi ti tawu pagkilalan-un Diyus kuntay matadlung dahil sa kay pagsarig sa Diyus.”

Ruma 10:15

Kabitay pag makatudlu una si unu nu unman siya pagsuguun? Angay sa nisurat magkun, “Anung, pag mangarinu pag lulud ti magdara Mayad pag Barita.”

Ruma 15:19

may mamaski waya pag manga makadululaw ag lilingutan pag manga tanda buwat kapangyarihan Ispiritu Banal. Nakan ngani sa tanan rugar ginan sa Hirusalim hanggan tugka Iliriku pag daga itinudlu yi niku ti tanan Mayad pag Barita tungkul sa kan Kiristu.

1 Kurintu 2:10

Tunda pag manga ihinanda Diyus, imaw ti ipinakilala Ispiritu sa kanta. Dahil suyasid di Ispiritu ti tanan manga bagay una madalum pag katutuuhanan Diyus.

2 Kurintu 1:22

Tinandaan niya kita kuntay kita kanya. Ipinakaun niya sa kanta ti Ispiritu mag-uli sa kanta tagipusuun, imaw kay puruyba matanggap nita kay manga itinaratu.

2 Kurintu 6:6

Kanmi diman ipinakilala kuntay kami kay suruguun Diyus sa mayad nimi pag ugali, sa kaalaman, sa maalumanay, sa mayad pag nabubut-un hanggan sa panab-anan Ispiritu Banal, sa may lubus pagmahal,

Galasya 1:12

Balaw nakan niku tinanggap ginan sa tawu, unman diman tawu ti nagtudlu sa kangku. Si Hisu-Kiristu yi ngapu ti nagpakilala inda sa kangku.

Galasya 1:16

Angay sa kay ginayak, ipinakilala niya sa kangku kay Anak hampay ti Mayad pag Barita tungkul sa kanya kang itudlu sa manga balaw Hudiyu. Pagka naalaman niku kay kagustuhan Diyus, unman gid aku nagpaingana waya una sa kantapu pag tawu.

Ipisu 3:10

Taynguna bay sa panab-anan iglisya gustu Diyus pagmipakilala sa manga pinunu ati sa langit ag sa manga may kapangyarihan ti unman may katabuhan pag kadunungan Diyus.

1 Tisalunika 2:9

Pihu udwaya nalimtan niyu, manga patar-ari, nu kabitay kami nagbudlay sa tarabahu sirang yabi hampay kami unman magpakuri sa una hintay sa kanyu, sa kanmi magtudlu Mayad pag Barita Diyus sa kanyu.

1 Timutiyu 3:16

Tutuu gid madalum ag makadululaw pag katutuuhanan nita surundanun magkun, “Napakilala siya Diyus sa kay nabilug tawu, pinatutuuhanan siya Ispiritu Banal, nakitan siya manga anghil, itinudlu siya sa manga nasyun tawu, una naan pag rugar may nagpaniwala sa kanya, tinanggap siya ati sa langit may kadayawan.”

Hibriyu 11:13

Sida tanan ti manga sinmarig tugka sa kamatayan, unman nakamtan nida ti itinaratu, dapat bilang ga kanda di nabantay ginan sa arayu, sida nakabaya di. Naisipan nida sida pasay manga nanday-u lang, ag balaw may kapunduhan sitay sa babaw daga.

Hibriyu 2:4

Ipinakakit diman waydi Diyus bilang puruyba ti manga makadululaw ag lilingutan pag manga tanda ag ti tuhay-tuhay pag mamaski buwat hanggan ti may manga pakaun Ispiritu Banal kay ihinuray sa iglisya angay sa kay sadili kagustuhan.

Hibriyu 4:2

Dahil ti Mayad pag Barita itinultul diman sa kanta parihu ga sa kanda kaybi. Dapat unman nida napakinabangan tunda pag barita kanda nadnugan, dahil pagka nadnugan nida, unman sida nagsarig sa kanda tagipusuun.

1 Pidru 1:25

Dapat ti bagaw Panginuun unman may kaduraan hanggan waya aban.” Inda yi ngani pag Bagaw imaw ti Mayad pag Barita ti itinudlu sa kanyu.

1 Pidru 4:6

Itinudlu diman ti Mayad pag Barita sa manga namatay hampay mabuhi diman waydi sida sa Ispiritu angay sa Diyus, madi natakdan yi sida kamatayan bilang sintinsiya sa kanda.

Ipinakakit 5:11

Nagbantay maan aku bag-u nadnugan niku ti bagaw linibu-libu kagadhan anghil matindugan sa sangput tukawan hari hanggan upat ka linalang may buhi hanggan manga gurangun.