1 Kurintu 8:1 - Hanunuu

¹ Ipaliwanag maan niku tungkul sa manga karan-unun ihinandug sa diyus-diyusan. Alam nita kita tanan may kadunungan. Ti katunda pag kaalaman magpadara sa tawu hampay magpalabi-labi, dapat ti tawu nu may pagmahal, makaparig-un siya sa iglisya.

1 Kurintu 8:1 Iomraidhean Croise

Isayas 47:10

Magpaniwala kawu balaw midamhak sa kanmu magbuwat kadautan, dahil pag-isipun nimu balaw may maghiling sa kanmu. Pag-ipatalang kawu nimu kadunungan hanggan kaalaman, tunda diman kay dahilan nu hayga pagsabihun nimu kawu ti diyus udyi may iba waya.

Isayas 5:21

Kaawaawa kamu, kamu pag manga mag-isip madunung ag matinudukun.

Bilang 25:2

Ginarya sida manga babayi manhandug sa kanda manga diyus-diyusan, nangaun sida sa tunda pag manga handug ag nansamba sa tunda pag manga diyus-diyusan.

Binwat 15:10

Hayga kanyu pagsubukan ti Diyus? Hayga kanyu pagpakan-an ti manga patar-ari kakurian ga baba mabuyat, unman diman nakaya nita una nita manga ginurang.

Binwat 15:29

danga kamu kumaun una hintay pag karan-unun ihinandug sa manga diyus-diyusan, danga kamu kumaun dugu, una taguban hayup in-gut unman nakaluwang kay dugu ag danga kamu magpanlalaki magpamabayi. Inda pag manga bagay kailangan niyu iwasan hampay kamu mas lalu waya rumig-un. Imaw lang tugka kanmi surat.”

Binwat 21:25

Nu bay tungkul sa manga balaw Hudiyu manga nagsarig sa kan Hisus, pinasuratan yi nimi sida tungkul sa kanmi pag-isipun, kailangan sida danga kumaun manga karan-unun ihinandug sa diyus-diyusan, danga sida kumaun dugu, danga sida kumaun taguban hayup nu in-gut unman nakaluwang kay dugu, ag danga sida magpamabayi, magpanlalaki.”

Ruma 11:25

Manga patar-ari, gustu niku maalaman niyu ti usa ka katutuuhanan udwaya maburayhawan, hampay balaw mag-isip kamu palabi-labi sa kanyu sadili. Ti kaganitan nasyun Israil balaw padayun-dayun, balaw hanggan aban. Inda magkadugay lang hanggan sa udwaya makapakarani sa Diyus ti tanan manga ginayak niya pag manga balaw Hudiyu.

Ruma 12:16

Pagkarausa kanyu nalub-anan. Danga kamu magpalabi-labi, bagkus ngap pagpakiusa kamu sa manga makuri kay kahamtangan. Danga pag-isipa niyu kanyu sadili kuntay kamu lang ti madunung.

Ruma 14:10

Kawu duy hayga pag-unuunuhun ngatay pagpihuun nimu ti daut ti mayad sa kanmu patar-ari? Kita tanan umatubang sa Diyus bag-u pihuun niya ti daut ti mayad sa kanta.

Ruma 14:14

Angay sa kang magpakiusa sa Panginuun Hisus naintindihan niku pihu ud may turun-anun pag karan-unun. Dapat nu may tawu mag-isip kuntay may kalasi karan-unun pag-irangan, danga yi lang siya magkaun.

Ruma 14:19

Nakan hingabtun gid nita buwatun ti manga bagay makaparig-un sa kada usa.

Ruma 14:22

Kawu lang ag Diyus ti dapat makatau sa kanmu intindi tungkul siti. Masulung ti tawu nu pagbuwatun niya ti pag-isipun niya mayad bag-u nu unman pagtamyawun siya niya tagipusuun.

Ruma 14:3

Ti tawu magkaun una hintay pag karan-unun danga mag-away sa tawu unman magkaun taguban. Ti tawu unman magkaun taguban danga waydi pagpihua niya kuntay daut ti magkaun una hintay pag karan-unun, dahil sida duwa parihu tinanggap Diyus.

Ruma 15:14

Manga patar-ari, lubus aku magpaniwala ud may kurang kanyu kaayadan, may kang-ud kanyu kaalaman ag madunung kamu magparaalalahanan sa usa kag sa usa.

1 Kurintu 1:5

Dahil sa kanyu pakiusa sa kan Kiristu, abunda yi ngap kamu sa tanan bagay hanggan sa tanan pamagaw ag sa tanan kaalaman.

1 Kurintu 10:15

Magbagaw aku sa kanyu parihu sa manga but-anin, kamu bahala yi magkilala sa kang sinabi nu ngatay tama.

1 Kurintu 10:28

Dapat nu may magsabi sa kanyu, “Inda pag karan-unun ihinandug sa diyus-diyusan,” danga maggaraw duy magkaun, barang ngap patalangun nita ti nagban-aw, hampay balaw maghantup bagay kasalanan.

1 Kurintu 14:20

Manga patar-ari, danga yi ga anak kanyu naisipan. Nu tungkul sa kadautan bay, pagga anak lapsag kamu. Dapat pagginurangun yi kanyu naisipan.

1 Kurintu 15:34

Pagbalik kamu sa mayad pag naisipan ag danga magkasala. Dahil ti iba unman magkilala sa Diyus. Kang pagkumnun inda sa kanyu sa ikakay-a niyu.

1 Kurintu 4:10

Alang-alang sa kan Kiristu kami bilang ga unman may kadunungan, dapat kamu madunung di ngap maaw tungkul sa kan Kiristu. Kami bilang ga manga malumuy, kamu bay manga mabisug. Kamu pagdayawun manga tawu, kami bay pagpuyaan ngap manga tawu.

1 Kurintu 4:18

Ti manga iba asan magpalabi-labi, kanda hantup aku dayu makaasan sa kanyu.

1 Kurintu 4:6

Manga patar-ari, kami ni Apulus ti binwat niku halimbawa agud masalman niyu kay ibug sabihun magkun, “Danga magpasubra sa isinurat sa Banal Kasuratan.” Danga ti usa lang ti pagmayadun bag-u ti usa pagdautun.

1 Kurintu 5:2

Bag-u kamu manga palabi-labihun di, ag unman kamu magruku nu nagkasala ti usa ka patar-ari, hampay mipalwas mana ginan sa kanyu ti nagbuwat katunda pag kasalanan.

1 Kurintu 5:6

Unman mayad kanyu magpadayaw-dayaw. Unman aw niyu alam una diit lang pag pamadaka, magpahabuk sa pinkul arina.

1 Kurintu 8:2

Tighantup sa kay sadili siya madunung, udwaya nataw-an niya ti dapat niya maalaman.

1 Kurintu 8:4

Tungkul ngani sa manga karan-unun ihinandug sa diyus-diyusan, alam nita ti manga diyus-diyusan unman may kahulugan, ag alam diman nita usa lang ka Diyus.

1 Kurintu 8:7

Dapat ti iba unman nida alam kuntay usa lang ti Diyus. Ti iba nararum yi sa pagsamba sa diyus-diyusan nakan ngani hanggan kainda nu magkaun sida tunda pag manga karan-unun pag-alaalahun waya nida kanda pagkan-un ihinandug waya sa diyus-diyusan. Dahil kurang kanda kaalaman, nakan aburidu kanda tagipusuun sa kanda hantup sida magkasala.

Ipisu 4:16

Sa panab-anan niya magkaminsan ti bilug may manga gamit sinugdung-sugdung manga kaluas-luasan. Si Kiristu tigpakaun kabisugan sa kada gamit hampay makatupad sa kay katungkulan bag-u ti buu bilug dumaka ag bumisug sa pagmahal.

Kulusas 2:18

Danga kamu maniwala hampay kanyu pirimyu unman madura sa kanyu. Dahil may manga tawu gustu nida pilitan kamu sa lagat-lagat unman maghandum karan-unun hanggan sa magsamba sa manga anghil. Magpalabi-labi sida sa kanyu dahil sa kanda nakitan ginan kunu sa Diyus. Dapat unman sida may ipadayaw-dayaw dahil kanda ugali naisipan parihu lang ga tanan tawu.

Ipinakakit 2:14

Dapat aku may pagsabihun inda laban sa kanmu: Ti iba sa kanmu magsunud sa tudlu ni Balaam. Si Balaam kabay ti nagtudlu kaybi sa kan Balak hampay patalangun niya ti manga Israilita tag sa kasalanan. Nakan nagkaun ngani sida manga ihinandug sa manga diyus-diyusan ag nagpanguragin sida.

Ipinakakit 2:20

Dapat aku may pagsabihun inda laban sa kanmu: kanmu lang pinabay-anan si Hisibil, tunda ngani pag babayi tigpabalhinguun kuntay siya purupita Diyus dapat maaw unman. Magpatalang ngap siya sa kang manga panawuhun, siya ti suluhan sa panguragin, siya diman waydi ti magtaban hampay mangaun sa ihinandug sa manga diyus-diyusan.