JOSUA 14:12 - Pathien Lekhabu Inthieng (BSI)

¹² Chuongchun, hi tlâng Lalpain kha nia a lo hril ta kha mi pe el ta la, khânga Anakim mihai an um a, an khawpuihai khawm a ropuiin kula inhuon khup a nih ti kha nia khan i hriet kha, Lalpa chun mi umpuiin, anni chu ka hnawt suok thei rawi mawh, Lalpain a lo hril ta ang khan,” a ta.

JOSUA 14:12 Iomraidhean Croise

2 LALHAI 19:4

A pu Assuria lalin Pathien hring hming hrilse dinga a tir Rabsake thuhrilhai po po chu, Lalpa i Pathien chun hrieng a ta, a thuhril, Lalpa i Pathienin a thu hriet chu a la kâwk rawi mawh; chu chu lei chun a la um sunhai chu ṭawngṭaipêk rawh,’ a ti che,” an ta.

2 CHANCHIN SUINA 14:11

Asa chu a Pathien Lalpa kuoma chun a khêk a, “Lalpa chau naw chu, hrâtna nei lo mihai ta dinga, mi thilthawtheia inthawka ṭhangpui ding mi dang tukhawm an um naw a; Aw Lalpa kan Pathien, mi ṭhangpui la; nangmaah kan innghat si a, hi mipui hi i hming leiin kan hung do a ni hi. Aw Lalpa nang chu kan Pathien i na, nangma chu tukhawma hne naw raw se che,” tiin.

INPÂKNA HLABU 44:3

Ram chu hluo dinga anni kâwlhnâma an lâk a ni naw a, Anni bâna insandam an ni bawk nawh; An chunga i lâwm leiin, I kut changtieng le, i bân le i hmêl varin a ni lem.

INPÂKNA HLABU 60:12

Pathien zârah huoitakin thawng ei ta, Ama chu a mi dotuhai sirdetu ding a ni si a.

NAMBAR 13:28

Amiruokchu, a rama mi umhai chu mi hrâttak tak el an na, khuohai khawm kul nei, ropuitak tak an nih; chun, Anak thlahai khawm kan hmu bawk a.

NAMBAR 13:33

chutaka chun Anak thlahai, mi lienhai, âwmkhautak tak el kan hmu a, keini chu khâu ang chauin kan inhmu el a nih; anni khawma khâu ang chauin an mi hmu hrim a,” tiin a ṭha naw tiengin an hril a.

NAMBAR 21:34

Chun, Lalpain Mosie kuomah, “Ama chu ṭi naw, ama khawm, a mi po pohai khawm, a ram khawm i kutah ka pêk ta a nih; Hesbona um Amor mihai lal Sihon chunga i thaw angin i thaw ding a nih,” a ta.

ROM MIHAI KUOMA TIRKO PAULA LEKHATHAWN (THE LETTER OF PAUL TO THE ROMANS) 8:31

Chuong thua chun ieng am hril tâng ei ta? Pathien eini tieng a ṭhang chun tuin am mi do thei a ta?

DÂN PAHNINA 1:28

Iengdingin am chu chun hang fêng ei ta? Ei unauhai chun, Mihriem chu eini nêkin an lien a, an insâng lem bawk a; khuohai chu a lien tâwl hle a, vân tawngin kulhai a nei a; chun, Anakim thlahai khawm chu kan hang hmu bawk a, tiin kan lungril an sukzawp a,’ in ti a.

DÂN PAHNINA 9:1

“Aw Israel mihai, ngai ta u, in nêka ropui le thilthawthei lem hnam, khawpui vân tawnga kul nei le ropuitakhai chu va hluo dingin tuhin Jordan chu in kai ding a ni ta a,

DÂN PAHNINA 9:3

Chuleiin, Lalpa in Pathien chu mi kângbohmang mei anga in hmaa fe hlak chu a nih ti tuhin hre ro; ama chun anni chu sukbohmang a ta, suktlâwmpêk a ti cheu; chuongchun, Lalpain in kuoma a hril ta ang khan, anni chu hnawt suok in ta, sukbohmang vak el in tih.

PHILIPPI 4:13

A mi sukhrâttu Krista zâra chun iengkim ka thaw thei a nih.

HEBRAIHAI 11:33

Chuonghai chun ringnain ramhai an lâk a, thil fel an thaw a, thutiemhai an chang a, sakeibaknei khâkhai an sukchîp a, mei thilthawtheina an sukmit a, kâwlhnâm ngei chenin an pumpel a.

JOSUA 15:14

Kaleb chun chu khuoa inthawk chun Anak naupasalhai pathum Sesai hai, Ahiman hai, Talmai hai, Anak nauhai chu a hnawt suok a.

RORELTUHAI 1:20

Chun, Mosiein a lo hril ta angin, Kaleb chu Hebron pêk a ni a; chutaka chun Anak naupasalhai pathum chu a hnawt suok a.

1 SAMUEL 14:6

Chun, Jonathan chun, a râlthuom chawitu tlangvâl kuoma chun, “Hung rawh, sertan lo sipaihai umnaa sawn va fêng ei tih; Lalpa chun thil a mi thawpêk khiet rawi mawh; Lalpa ta ding chun a tam amanih, a tlâwm amania sandam chu iengkhawm a thei nawna a um chuong si naw a,” a ta.