NUMERA 18:1 - Buka Helaga (Hiri Motu) 1993

¹ Lohiabada ese Arona dekenai ia hereva, ia gwau, “Bema kerere ia vara lauegu Palai Dubu ena gaukara lalonai neganai, oi bona oiemu natuna tau bona oiemu tamana ena bese, Levi taudia ese inai kerere do umui huaia. To bema oi, o oiemu natuna tau ese emui dagi, hahelagaia taudia edia gaukara, umui karaia kerere neganai, umui sibona ese inai kerere ena metau do umui huaia.

NUMERA 18:1 Iomraidhean Croise

ESODO 28:38

Inai kwara gauna mai ena medolo be Arona ena kwarana dekenai do ia noho. Badina inai dekena amo Israela taudia edia boubou gaudia be lau Lohiabada ese do lau abia dae. Bona bema Israela taudia ese edia boubou idia henia kerere neganai, Arona ese edia kerere ena davana do ia karaia.

ISAIA 53:11

Momokani iena mauri lalonai hisihisi ia abia, to unai murinai moale bada do ia davaria, badina be do ia diba, iena hisihisi be hisihisi kava lasi, to mai anina. Lauegu Hesiai Tauna, lau ura henia bada Tauna ese, taunimanima momo edia kerere davana do ia karaia, bona ia dainai, lau ese edia dika do lau gwauatao.

ISAIA 53:6

Ita ibounai ita raka boio vadaeni, idia boio mamoe bamona. Ita ta ta ibounai ese, sibona iseda dala ita raka vadaeni, bona unai dika davana, ita sibona ita karaia be maoro. To Lohiabada ese, ita ibounai iseda kara dika be, iena Hesiai Tauna ena latanai, ia atoa vadaeni.

ESEKIELA 4:4

“Unai neganai oiemu ohena laurina dekenai do oi hekure, bona lau ese Israela besena ena dika davana be oiemu latanai do lau atoa. Dina 390 lalonai oi be unai bamona do oi hekure, mai hisihisi danu, Israela taudia edia kerere dainai.

LEVITIKO 10:17

“Badina dahaka gabu helagana ta dekenai inai kara dika totona boubouna umui ania lasi? Ia be boubou helaga herea, bona Lohiabada ese umui dekenai ia henia vadaeni, Israela taudia edia kara dika do ia gwauatao totona.

LEVITIKO 22:16

Hahelagaia taudia ese unai aniani do idia naria namonamo, vadaeni helaga lasi taudia ese do idia ania lasi. Bema helaga lasi taudia idia ania neganai, idia ese edia kerere davana do idia karaia. Lau be Lohiabada, bona lau ese inai boubou gaudia lau hahelagaia noho.”

LEVITIKO 22:9

“Hahelagaia taudia ibounai ese lauegu oda do idia kamonai henia. Bema inai oda idia utua neganai, idia be kerere, bona edia kerere lalonai do idia mase, badina taravatu helagadia idia badinaia lasi dainai. Lau be Lohiabada, bona lau ese idia lau hahelagaia vadaeni.

NUMERA 14:34

Lagani 40 lalonai, emui kara dika dainai, hisihisi do umui abia. Inai lagani 40 ena badina be, umui hasinadoa dinadia be 40 dainai. Oibe, umui dekenai do lau tuari henia, bona inai lauegu tuari ena mamina do umui abia momokani.

NUMERA 16:10

“Lohiabada ese umui, bona Levi taudia ibounai dekenai inai dagi badana ia henia vadaeni, to hari umui ura hahelagaia taudia edia dagi danu do umui abia, a?

NUMERA 17:13

Lohiabada ena Palai Dubu dekenai idia raka kahirakahira taudia idia mase noho, a? Ai ibounai be do ai mase ore, momokani!”

NUMERA 17:3

Bona Levi iduhu taudia edia itotohi dekenai Arona ena ladana do oi torea. Iduhu gunalaia taudia ta ta edia itotohi ta ta do oi abia.

NUMERA 17:7

Vadaeni Mose ese itotohi ibounai Lohiabada ena vairanai ia atodia, Palai Dubu lalonai.

NUMERA 18:11

“Ma inai danu do umui ania diba: Israela taudia ese idia henia harihari gaudia idauidau, hahelagaia taudia ese lauegu vairanai idia davea gaudia. Lau ese umui dekenai lau henidia, oiemu natuna tau, oiemu natuna hahine danu ela bona nega ibounai. Emui bese taudia ibounai, bema egu taravatu dekenai idia goeva neganai, inai aniani bouboudia idia ania diba.

NUMERA 3:6

“Levi taudia do oi hakaua mai, hahelagaia tauna Arona ena vairana dekenai do idia gini, bona iena hesiai gaukara do idia karaia.

DEUTERONOMI 10:8

Unai neganai Lohiabada ese Levi iduhuna ia abia hidi. Levi taudia ese Lohiabada ena Taravatu Maua do idia huaia, bona Lohiabada ena vairana dekenai do idia gini, iena gaukara do idia karaia, bona Lohiabada ena ladana do idia hanamoa, ia mai bona hari dina.

HEBERU 13:17

Umui idia hakaua taudia do umui kamonai henia, bona edia hereva do umui badinaia. Badina be idia ese umui emui lauma idia naria noho, nega ibounai. Gabeai idia ese Dirava ena vairanai, edia gaukara ibounai ena anina do idia gwauraia hedinarai. Unai dainai edia hereva do umui kamonai henia, bona idia edia henunai do umui noho. Bema inai bamona umui karaia neganai, edia gaukara be mai moale danu do idia karaia, lalohisihisi ta lasi. To bema mai lalohisihisi danu umui idia naria neganai, umui ese anina namona ta do umui davaria lasi.

HEBERU 4:15

Ita be manoka dainai karadika ese nega momo ita ia hamorua. To iseda Hahelagaia Tauna Badana ese ita ia bogahisihisi henia diba. Badina be ia danu ese dibagani ena mamina ia abia, ita ese ena mamina ita abia hegeregerena. To Iesu ese kara dika ta ia karaia lasi.

1 PETERO 2:24

Keriso ese sibona ena tauanina dekenai, iseda kara dika ia huaia, satauro ena latanai. Unai bamona ia karaia, kara dika dekenai do ita mase totona, bona kara maoromaoro dekenai do ita mauri totona. Keriso ena bero ese ita idia hamauria vadaeni.

GUNALAIA TAUDIA 17:12

Mika ese unai Levi tauna ia abia hidi, vadaeni ia be Mika ena hahelagaia tauna ia lao, bona Levi tauna be Mika ena ruma dekenai ia noho.