IOSUA 21:43 - Buka Helaga (Hiri Motu) 1993

⁴³ Unai dainai, Lohiabada ese Israela taudia dekenai edia tano ibounai ia henia, edia sene taudia dekenai ia gwauhamata do ia henia hegeregerena. Unai tano idia abia, edia tano, bona ia dekenai idia noho.

IOSUA 21:43 Iomraidhean Croise

GENESE 12:7

Lohiabada ese Aberamo dekenai ia hedinarai, ia hereva, ia gwau, “Inai tano be oiemu tubuna dekenai do lau henia.” Vadaeni unuseni Aberamo ese boubou patana ia karaia Lohiabada dekenai, badina be Lohiabada ese ia dekenai ia hedinarai unai gabu dekenai.

GENESE 13:15

Hari oi itaia noho tano ibounai oi dekenai, bona oiemu tubuna dekenai do lau henia, ia lao bona hanaihanai.

GENESE 28:4

Dirava ese Aberahamo dekenai hanamoa ia henia, be oi dekenai do ia henia danu, oiemu natuna bona tubuna dekenai do ia henia danu. Ma inai idau gabu dekenai oi noho tanona, Dirava ese Aberahamo dekenai ia henia tanona do oi abia, oiemu tano korikori dekenai do oi halaoa.”

2 SIVARAI 20:8

Idia ese iniseni idia noho, bona oi matauraia totona oiemu Dubu Helaga ta idia haginia vadaeni, bona idia gwau,

NEHEMIA 9:24

Idia ese Kanana tano idia halusia, bona Kanana taudia dekena amo kwalimu oi henidia. Unai neganai Kanana ena king bona edia taudia ibounai, be Israela taudia edia siahu henunai idia noho, vadaeni Israela taudia ese unai bese taudia dekenai, sibodia edia ura idia karaia.

NEHEMIA 9:8

Oi ese Aberahamo oi tahua, bona oi davaria, Aberahamo ese oi dekenai ia abidadama henia, bona oi ese ia danu gwauhamata taravatuna oi karaia. Oi ese Kanana taudia, Hiti taudia, Amoro taudia, Perisi taudia, Iebusu taudia, Girigasa taudia, edia tano Aberahamo dekenai oi henia, iena tubuna taudia be unai tano dekenai do idia noho. Oi ese oiemu gwauhamata oi badinaia, badina oi be maoromaoro.

SALAMO 105:8

Lohiabada ese ia karaia gwauhamata taravatuna, be hanaihanai do ia badinaia. Iena gwauhamata danu be do ia laloa noho uru ibounai 1000.

SALAMO 44:3

Aiemai tamadia, oiemu bese ese, edia tuari kaia dekena amo tano idia abia lasi, bona sibodia edia goada dekena amo tano idia abia lasi. To oiemu siahu bona oiemu goada dekena amo idia abia, bona oiemu vairana ena diari dekena amo idia abia. Badina be unai diari dekena amo, oiemu lalokau be idia dekenai oi hedinaraia namo herea.

SALAMO 78:55

Iena bese taudia idia raka hanaia neganai, unai tano noho taudia be Dirava ese ia luludia ore, bona edia tano be Israela iduhu ta ta edia huanai ia haria. Edia ruma be Israela taudia dekenai ia henia.

ESODO 3:8

Lau diho mai inai, Aigupito taudia edia imana dekena amo do lau hamauridia totona. Unai tano dekena amo dohore lau hakaudia, ia lao bona tano namo herea dekenai. Tano badana dekenai dohore idia ginidae. Unai tano be aniani namodia gabuna, Kanana taudia edia tano unai, Hiti taudia edia, bona Amoro taudia edia, bona Perisi taudia edia, bona Hivi taudia edia, bona Iebusu taudia edia.

IEREMIA 32:23

Vadaeni edia tano dekenai idia raka vareai, idia abia. To idia ese oiemu hereva idia kamonai lasi, bona oiemu taravatu dekenai idia raka lasi. Oi ese oi oda henidia do idia karaia karadia ta idia karaia lasi. Unai dainai, inai dika bada ibounai be idia edia latanai oi atoa vadaeni.

NUMERA 33:53

“Kanana tano do umui abia, bona unai tano dekenai do umui noho, badina be unai tano umui dekenai lau henia inai, emui tano korikori.

NUMERA 34:2

“Israela taudia do oi hamaoroa, inai bamona: Kanana tano dekenai umui raka vareai neganai, inai tano be emui tano korikori ela bona nega ibounai, bona tano ena hetoa gabudia be inai bamona:

DEUTERONOMI 11:31

“Umui ese Ioridane Sinavai do umui hanaia, Lohiabada emui Dirava ese umui ia henia noho tano do umui abia, emui tano. To unai tano do umui abia, bona ia dekenai umui noho neganai,

DEUTERONOMI 12:29

“Lohiabada, emui Dirava, ese edia gabudia do umui abia besedia do ia hadikaia ore. Vadaeni umui ese edia tano do umui abia, bona unai gabudia dekenai do umui noho.

DEUTERONOMI 17:14

“Lohiabada, emui Dirava, ese umui dekenai do ia henia tano lalonai do umui ginidae, bona do umui abia, emui tano korikori, bona unuseni do umui noho. Unai neganai do umui ura emui king ta do umui haginia, umui emui tano kahirakahira idia noho besedia be mai edia king bamona.

DEUTERONOMI 34:4

Vadaeni Lohiabada ese Mose ia hereva henia, ia gwau, “Unai tano be Aberahamo bona Isako bona Iakobo dekenai lau gwauhamata henidia, lau gwau, ‘Umui emui tubudia dekenai do lau henia.’ Harihari oi dekenai lau hedinaraia. Oiemu matana dekenai oi itaia vadaeni, to ia dekenai do oi ginidae lasi.”

IOSUA 1:6

“Do oi goada, do oi gari lasi. Badina be oi ese inai bese do oi gunalaia, edia sene taudia dekenai lau gwauhamata henidia tanona do idia abia neganai.

IOSUA 21:42

Inai hanua ibounai be mai edia rei gabudia.

GUNALAIA TAUDIA 11:24

“Oiemu dirava Kemoso ese oi dekenai ia henia tano oi abia, oiemu tano, ani? Ai danu, Lohiabada, aiemai Dirava, ese aiemai vairana dekena amo ia lulua lao taudia edia tano be ai ese do ai abia, ani? Ia be aiemai tano, Lohiabada ese ai dekenai ia henia dainai.

1 SAMUELA 12:8

“Iakobo be Aigupito dekenai ia lao murinai, emui sene taudia ese Lohiabada dekenai idia taitai neganai, Lohiabada ese Mose bona Arona ia siaia. Vadaeni idia ruaosi ese emui sene taudia Aigupito dekena amo idia hakaua mai, inai gabu idia dekenai ia henia, edia noho gabuna.