IOSUA 10:25 - Buka Helaga (Hiri Motu) 1993

²⁵ Unai neganai Iosua ese iena lohia taudia ia hamaoroa, ia gwau, “Do umui gari lasi, bona emui lalona do idia manoka lasi. Do umui goada, bona do umui boga auka, badina Lohiabada ese inai bamona do ia karaia, umui idia tuari henia taudia ibounai dekenai.”

IOSUA 10:25 Iomraidhean Croise

SALAMO 63:9

Tau haida ese lau idia alaia dalana idia tahua noho. Unai taudia be mase taudia edia gabu dekenai do idia diho lao.

SALAMO 77:11

To Lohiabada e, lau ese oiemu kara do lau laloa noho. Oiemu hoa karadia gunadia do lau laloa lou.

ROMA 8:37

To inai gaudia ita laloa lasi. Badina be Keriso ese ita ia lalokau henia, bona ia dainai do ita kwalimu momokani.

2 KORINTO 1:10

Bona ia ese mase dika momokani dekena amo ai ia hamauria vadaeni, bona ai do ia hamauria noho. Ai abidadama henia noho danu, vaira neganai ia ese ai do ia hamauria lou.

EFESO 6:10

Lauegu hereva dokona be inai: Lohiabada ena siahu dekena amo do umui siahu, bona Lohiabada ena goada dekena amo do umui goada.

DEUTERONOMI 7:19

Hisihisi bona toa bona hoa karadia be emui matana ese idia itaia, bona Lohiabada, emui Dirava, ese mai goada bona siahu bada danu umui ia hamauria. Inai karadia do umui laloatao noho. Badina Lohiabada, emui Dirava, ese hari umui gari henia besedia ibounai dekenai unai bamona idia dekenai do ia karaia.

IOSUA 1:6

“Do oi goada, do oi gari lasi. Badina be oi ese inai bese do oi gunalaia, edia sene taudia dekenai lau gwauhamata henidia tanona do idia abia neganai.

IOSUA 1:9

Oi lau hamaoroa vadaeni, ani, do oi goada bona do oi boga auka. Do oi gari lasi, bona oiemu lalona do ia manoka lasi, badina be lau Lohiabada, oiemu Dirava, ese oi loaloa gabudia ibounai dekenai oi do lau bamoa noho.”

IOSUA 10:8

Lohiabada ese Iosua ia hamaoroa, ia gwau, “Idia dekenai do umui gari lasi, badina be kwalimu umui dekenai lau henia vadaeni, idia ta be umui emui vairana dekenai do ia gini diba lasi.”

1 SAMUELA 17:37

Davida ma ia gwau, “Lohiabada ese laiona bona bea dekena amo lau ia hamauria vadaeni. Lau diba momokani, Lohiabada ese inai Pilistia tauna danu, iena imana dekena amo lau do ia hamauria.” Vadaeni Saulo ese Davida ia hamaoroa, ia gwau, “Vadaeni, oi lao, bona Lohiabada ese oi dekenai do ia noho.”