FILIPI 4:1 - Buka Helaga (Hiri Motu) 1993

¹ Unai dainai, lauegu Keristani varavara taudia e, egu lalokau taudia, umui lau laloa momo, mai bogahisihisi danu. Umui lau ura henia, bona umui dainai lau moale, badina umui be lauegu dagi ena toana. Lalokau taudia e, Lohiabada danu umui hakapua dainai, do umui gini goada noho.

FILIPI 4:1 Iomraidhean Croise

IOBU 31:36

Momokani samani pepa be lau ese, egu pagana dekenai do lau huaia, bona egu kwarana dekenai do lau atoa, korona bamona.

SALAMO 125:1

Lohiabada idia abidadama henia taudia be Siona Ororo bamona. Inai Ororo be ia marere diba lasi, ia be do ia gini goada noho hanaihanai.

SALAMO 27:14

Lohiabada dekenai do umui abidadama henia. Do umui laloa goada, daradara lasi. Lohiabada dekenai do umui abidadama henia.

MATAIO 10:22

Lauegu ladana dainai taunimanima ibounai ese do idia badu henia umui dekenai. To do ia haheauka lao ela bona dokona tauna be do ia mauri.

IOANE 8:31

Vadaeni Iesu ese ia dekenai idia abidadama Iuda taudia dekenai ia hamaoroa, ia gwau, “Bema lauegu hadibaia hereva umui badinaia neganai, umui be lauegu diba tahua taudia momokani.

APOSETOLO EDIA KARA 11:23

Banaba ia ginidae neganai, Dirava ena hariharibada ia itaia, bona ia moale bada, bona ibounai dekenai ia hereva goada, idia ese mai edia kudouna ibounai Lohiabada do idia badinaia.

APOSETOLO EDIA KARA 14:22

Ruaosi ese Iesu ena diba tahua taudia edia kudouna idia hagoadaia. Idia hereva goada, idia gwau, “Abidadama umui dogoatao noho.” Bona idia gwau, “Hisihisi momo lalonai Dirava ena Basileia do ita raka vareai.”

APOSETOLO EDIA KARA 2:42

Nega ibounai idia haboua noho, aposetolo edia hadibaia herevadia idia kamonai totona, bona turana idia karaia, aniani idia ania hebou, bona idia guriguri danu.

ROMA 2:7

Taunimanima haida ese kara namo idia karaia noho nega ibounai. Idia ese Dirava ena hairai, iena hanamoa, bona iena doko diba lasi maurina idia tahua noho nega ibounai. Inai bamona taudia dekenai be Dirava ese mauri hanaihanai do ia henia.

1 KORINTO 15:58

Unai dainai, lauegu varavara taudia e, egu lalokau, do umui gini goada, do umui marere lasi. Nega ibounai Lohiabada ena gaukara do umui karaia goadagoada. Badina be umui diba Lohiabada ena gaukara lalonai, emui hekwarahi be hekwarahi kava lasi momokani.

1 KORINTO 16:13

Umui naria namonamo, abidadama dekenai umui gini goada, metau ibounai lalonai do umui haheauka, do umui goada.

2 KORINTO 1:14

Hari be ai umui diba sisina sibona. To lau daradara lasi, gabeai ai do umui diba momokani. Vadaeni Lohiabada Iesu ena Dina neganai, umui ese ai do umui heagilaia, ai ese umui do ai heagilaia hegeregerena.

GALATIA 5:1

Keriso ese Taravatu ena metau bona ena guia dekena amo ita ia ruhaia vadaeni. Ura kwalimu ita abia vadaeni. Inai ura kwalimu do umui dogoatao noho, tau haida ese umui do idia guia lou garina.

FILIPI 1:27

Gau badana be inai: Keriso ena Sivarai Namona ena dala hegeregerena do umui mauri noho. Vadaeni umui dekenai lau noho, o umui dekenai lau noho lasi neganai, do lau diba umui gini goada noho. Bona do lau diba, mai emui laloa tamona bona ura tamona, Sivarai Namona abidadama henia totona do umui tuari hebou noho.

FILIPI 1:8

Lau hereva momokani Dirava ena vairana dekenai, Keriso Iesu ena lalokau bada ese egu lalokau umui dekenai ia havaraia vadaeni.

FILIPI 2:16

Mauri sivaraina be idia dekenai do umui hedinaraia, vadaeni Keriso ena dinana dekenai lau be do lau moale. Do lau gwau, “Lau gaukara kava lasi, bona lau hekwarahi kava lasi.”

FILIPI 2:26

Badina be ia ese umui ia laloa bada, bona iena lalona ia hekwarahi bada noho, iena gorere sivaraina umui kamonai dainai.

KOLOSE 4:12

Ma emui orea tauna ta Epafra, Keriso Iesu ena hesiai tauna ese umui ia hanamoa henia inai. Nega ibounai umui dainai ia guriguri goada. Dirava ia noia, do umui gini goada, Keriso do umui abidadama henia, mai maoromaoro, bona momokani danu. Bona ia noinoi, Dirava ena ura ibounai, be do umui diba namonamo, bona kamonai henia.

1 TESALONIKA 3:13

Inai dala dekenai Dirava ese goada umui dekenai do ia henia. Vadaeni iseda Lohiabada Iesu Keriso, mai ena helaga taudia ibounai idia mai neganai, umui be do umui goeva, bona mai helaga danu do umui gini, iseda Tamana Dirava ena vairana dekenai.

2 TESALONIKA 2:15

Unai dainai, aiemai varavara taudia e, do umui gini goada, aiemai haroro bona aiemai revareva dekena amo ai hadibaia hereva do umui dogoatao momokani.

2 TIMOTEO 2:1

Lauegu natuna e, Keriso Iesu danu oi hakapua dainai, iena hariharibada lalonai do oi goada noho.

HEBERU 10:23

Ita diba momokani Dirava ese iena gwauhamata do ia badinaia. Unai dainai namona be iseda abidadama ita dogoatao goada noho. Ita gwauraia noho abidadama be unai.

HEBERU 3:14

Guna Keriso ita abidadama henia. Vadaeni namona be inai abidadama do ita badinaia noho, ela bona ita mase. Bema inai bamona ita karaia neganai, ita be Keriso ena taudia korikori.

HEBERU 4:14

Ita be mai iseda Hahelagaia Tauna Badana, bona ia be Dirava ena vairanai, guba dekenai ia noho. Ia be Iesu, Dirava ena Natuna. Unai dainai namona be iseda abidadama ita dogoatao goada noho. Ita gwauraia noho abidadama be unai.

2 PETERO 3:17

Lauegu lalokau taudia e, inai gaudia umui diba vadaeni. Unai dainai do umui naria namonamo, koikoi taudia ese umui do idia hakaua kerere garina. Oibe, umui emui gini goada gabuna dekena amo do umui moru garina, do umui naria namonamo.