DANIELA 9:16 - Buka Helaga (Hiri Motu) 1993

¹⁶ Lohiabada e, oiemu kara maoromaoro hegeregerena lau noinoi, oi ese Ierusalema do oi badu henia lou lasi. Unai be oiemu hanua, oiemu ororo helagana. Aiemai kara dika bona aiemai sene taudia edia kerere dikadia dainai, Ierusalema ena badinai idia noho idau bese taudia ese Ierusalema bona aiemai hemarai idia kirikirilaia noho.

DANIELA 9:16 Iomraidhean Croise

NEHEMIA 9:8

Oi ese Aberahamo oi tahua, bona oi davaria, Aberahamo ese oi dekenai ia abidadama henia, bona oi ese ia danu gwauhamata taravatuna oi karaia. Oi ese Kanana taudia, Hiti taudia, Amoro taudia, Perisi taudia, Iebusu taudia, Girigasa taudia, edia tano Aberahamo dekenai oi henia, iena tubuna taudia be unai tano dekenai do idia noho. Oi ese oiemu gwauhamata oi badinaia, badina oi be maoromaoro.

SALAMO 143:1

Lohiabada e, egu guriguri do oi kamonai! Oiemu kara maoromaoro dainai, egu noinoi do oi kamonai henia. Oiemu abidadama bona kara momokanidia dainai, egu noinoi do oi haere henia.

SALAMO 31:1

Lohiabada e, lau ese oi lau abidadama henia noho. Unai dainai lau do oi durua, vadaeni lau idia hadikaia gwauraia taudia, ese lau do idia hamorua lasi. Lohiabada e, oi be kara maoromaoro Diravana. Unai dainai oi ese lau do oi hamauria.

SALAMO 41:13

Lohiabada, Israela ena Dirava be do ita hanamoa! Ia do ita hanamoa, harihari ia lao bona hanaihanai. Amen bona Amen!

SALAMO 71:2

Oi be maoromaoro momokani dainai, oi ese lau do oi durua bona lau do oi hamauria. Lau dekenai do oi kamonai, bona lau do oi hamauria.

SALAMO 79:4

Ai idia hagegea noho idau bese taudia, ese ai idia hereva dika henia noho. Ai dekenai idia kirikiri, bona ai dekenai idia hevaseha noho.

SALAMO 85:4

Dirava e, aiemai Hamauria Tauna, mani emu kara ai do oi haginia lou, bona mani do oi badu lou lasi ai dekenai.

SALAMO 89:51

Lohiabada e, oi dekenai idia tuari gwauraia taudia ese, oi abia hidi king idia hereva dika henia noho. Oiemu abia hidi king ia lao gabudia ibounai dekenai, unai taudia ese ia dekenai idia hereva dika henia noho.

ESODO 20:5

Laulau o kaivakuku ta dekenai do umui tomadiho henia lasi, bona iena hesiai gaukara do umui karaia lasi. Badina be lau Lohiabada emui Dirava be lau ura umui be lau sibona egu. Idia ura henia lasi lau dekenai taudia edia kara dika ena davana, be do lau henia edia natuna bona tubuna dekenai, ia lao bona uru toi o hani.

ISAIA 5:25

Lohiabada ese iena bese taudia ia badu henia noho. Bona hari iena imana ia abia isi, do ia hadikadia totona. Ororo be do idia heudeheude, bona mase taudia edia tauanidia be ariara dekenai momoru bamona do idia noho. To inai kara ia ore neganai, Lohiabada ena badu be do ia ore lasi. Lasi, badina Lohiabada ese iena imana do ia abia isi noho.

IEREMIA 24:9

Lau ese idia edia latanai dika bada do lau havaraia dainai, tanobada basileia ibounai taudia be do idia gari bada herea. Taunimanima ese inai Iuda taudia dainai do idia kirikiri, bona do idia hevaseha henidia, do idia hereva dika henidia, bona edia bese ena ladana do idia hadikaia, do lau luludia lao gabudia ibounai edia lalonai.

IEREMIA 29:18

Io, tuari, hitolo, bona hanaia gorere dikadia dekena amo do lau hisihisi henidia noho, bona tanobada gabu idauidau dekenai do lau luludia lao. Inai lau luludia gabudia ibounai dekenai noho taudia ese idia do idia ura henia lasi momokani, do idia hereva dika henidia, bona do idia gari henidia, mai badu danu.

IEREMIA 32:31

“Inai hanua Ierusalema idia haginia dinana dekena amo ia mai bona hari dina, ena noho taudia ese egu badu bona egu laloa siahu idia havaraia vadaeni. Unai dainai lau ese egu vairana dekena amo inai hanua do lau kokia ore,

IEREMIA 32:32

Israela bona Iuda bese taudia edia kara dika ibounai dainai. Idia ese lau idia habadua karadia idia karaia, edia king bona edia lohia taudia, edia hahelagaia taudia, bona edia peroveta taudia, Iuda bona Ierusalema dekenai noho taudia ese.

ESEKIELA 22:4

Umui be umui kerere vadaeni, emui alaia kara dainai, bona umui be miro vadaeni, kaivakuku umui karaia dainai. Unai dainai emui mauri nega umui hakwadogia vadaeni, emui dokona dinana ia ginidae vadaeni. Unai dainai bese idauidau taudia ese umui idia hereva dika henia, umui dekenai idia kirikiri bona idia hevaseha noho, bona lau ese lau koudia lasi.

ESEKIELA 5:14

“Emui tano be anina lasi dika gabuna do lau halaoa, bona umui idia hagegea besedia dekena amo umui idia raka hanaia taudia ese umui do idia hereva dika henia momokani.

DANIELA 11:45

Vadaeni davara badana ena kone, bona ororo helagana, Dubu Helaga ia noho gabuna edia huanai, unai Suria king ese iena palai ruma namo herea do ia haginia. Unai neganai iena mase negana do ia ginidae, bona tau ta ese do ia durua lasi.”

DANIELA 9:20

Inai guriguri lau karaia noho, bona lauegu kara dika bona lauegu bese Israela edia kara dika lau gwauraia hedinarai noho, bona Lohiabada egu Dirava iena Dubu Helaga do ia haginia lou totona lau noinoi noho danu.

IOELA 3:17

Lohiabada ia gwau, “Unai neganai Israela taudia e, do umui diba, lau sibona be Lohiabada, emui Dirava. Lau be Siona dekenai lau noho, egu ororo helagana be unai. Ierusalema be do ia helaga, bona idau bese taudia ese, ia do idia raka hanaia lou lasi.

SEKARAIA 8:3

Lohiabada ese inai bamona ia hereva, ia gwau, “Siona dekenai do lau giroa lou, Ierusalema, egu hanua helagana, ena huana dekenai do lau noho. Unai neganai Ierusalema ena ladana do idia atoa, Abidadama Ena Hanua, bona Siahu Ibounai Lohiabada ena ororo, ma do idia gwauraia, Ororo Helagana.”

2 TESALONIKA 1:6

Dirava ese kara maoromaoro do ia karaia. Hisihisi umui dekenai idia henia taudia dekenai, be ia ese hisihisi do ia henidia.

1 IOANE 1:9

To bema iseda kara dika Dirava dekenai ita gwauraia hedinarai, ia ese ita do ia negea lasi. Lasi momokani. Ia be kara maoromaoro dainai, iena gwauhamata do ia badinaia, bona iseda dika do ia gwauatao. Bona iseda kerere ibounai be do ia huria ore momokani.

1 SAMUELA 2:7

Lohiabada ese taunimanima haida dekenai ogogami ia henia, to haida dekenai moni bona kohu momo ia henia. Ia ese haida ia hamaragia, to haida ia habadaia.