DANIELA 7:13 - Buka Helaga (Hiri Motu) 1993

¹³ “Unai hanuaboi lalonai mata hanai dekenai lau itaia, Tau ta ia noho, iena toana be taunimanima edia toana bamona. Ori lalonai ia raka mai kahirakahira, bona ia lao unai Mauri Noho Hanaihanai Tauna dekenai, iena vairana dekenai ia gini, bona Badana ese ia abia dae.

DANIELA 7:13 Iomraidhean Croise

SALAMO 110:2

Siona dekena amo Lohiabada ese, oiemu King siahuna do ia habadaia, Lohiabada ese oi ia hamaoroa, ia gwau, “Oi dekenai idia tuari henia taudia do oi biagua.”

SALAMO 2:8

Lau dekenai oi noinoi, vadaeni lau ese bese idauidau ibounai, be oi dekenai do lau henia. Tanobada ibounai oi dekenai do lau henia, oiemu.

SALAMO 47:5

Dirava be guba dekenai ia daekau lao. Lohiabada ia daekau neganai, taunimanima be mai moale bada danu idia boiboi, bona kibi idia hiriria.

IEREMIA 49:19

Kamonai, laiona ta be Ioridane Sinavai ena isena ena uda gabuna dekena amo mamoe edia magu aukana do ia hadikaia totona ia mai noho hegeregerena, lau ese do lau toreisi, bona karaharaga Edoma taudia ibounai do lau lulua lao, edia tano dekena amo. Unai neganai lau ese do lau abia hidi tauna ese edia tano do ia biagua. Badina daika be lau hegeregerena? Daika ese lau dekenai ia hepapahuahu diba? Edena tano ena king be egu vairana dekenai do ia gini diba?

ESEKIELA 1:26

Unai edia kwarana edia ataiai habubua uro badana bamona gauna ena ataiai be gau ta, helai gauna ta bamona. Iena toana be nadi namo herea ena ladana sapairo bamona. Bona unai helai gauna latanai be gau ta lau itaia, iena toana be taunimanima ta, ia helai diho.

DANIELA 2:44

“Unai basileia namba 4 ena nega lalonai, guba ena Dirava ese basileia ta do ia haginia, inai basileia be do idia hadikaia diba lasi ela bona hanaihanai. Unai basileia be Dirava ese do ia naria, vadaeni bese ta ese do ia halusia diba lasi. Bona unai basileia ese basileia ibounai do ia hamakohia, bona haorea momokani, bona ia sibona do ia noho ela bona hanaihanai.

DANIELA 7:12

“Unai boroma dagedage haida 3 edia siahu be idia kokia, to do idia mauri noho ela bona ma nega ta idia gwauraia hegeregerena.

DANIELA 7:2

Daniela ia gwau, “Hanuaboi lalonai mata hanai dekena amo lau itaia, guba ena lai 4 idia toa goada herea, vadaeni davara ia hurehure bada.

DANIELA 7:22

“Mauri Noho Hanaihanai Tauna ia mai, bona ia ese kota ia karaia, iena kota hereva ese Ataiai Momokani Dirava ena helaga taudia ia durudia. Nega ia ginidae vadaeni, Dirava ena helaga taudia ese basileia do idia abia.

DANIELA 7:9

“Lau itaia noho neganai, gabu ta ta dekenai terona idia atoa. Mauri Noho Hanaihanai Tauna ia mai, terona ta dekenai ia helai. Iena dabua be kurokuro momokani sinou bamona, bona iena huina be kurokuro momokani, mamoe huina goevana bamona. Iena terona be mai uili, bona lahi be terona ena kahana ibounai ia hururu noho.

DANIELA 8:15

Lau, Daniela, unai mata hanai ena anina lau tahua noho neganai, ta ese iena toana be taunimanima bamona, be lauegu vairana dekenai ia gini.

MATAIO 13:41

Taunimanima ena Natuna ese iena aneru do ia siaia, vadaeni taunimanima idia hakererea taudia, bona kara dika taudia ibounai, ena Basileia dekena amo do idia abia siri.

MATAIO 24:30

Vadaeni Taunimanima ena Natuna ena toana guba dekenai do ia hedinarai. Unai neganai tanobada ena bese ibounai do idia tai, badina be Taunimanima ena Natuna do idia itaia, guba ena ori latanai do ia mai, mai ena siahu bada, bona mai ena hairai danu.

MATAIO 25:31

“Taunimanima ena Natuna be mai ena hairai danu do ia mai, mai ena aneru helagadia danu, ena terona namo herea momokani latanai do ia helai.

MATAIO 26:64

Iesu ia haere ia dekenai, ia gwau, “Oi hereva unai. To umui ibounai dekenai lau hereva, Taunimanima ena Natuna do umui itaia, Siahu Ibounai Dirava ena imana idibana kahana dekenai do ia helai, bona guba ena ori edia latanai do ia mai.”

MATAIO 28:18

Vadaeni Iesu ia raka kahirakahira idia dekenai, ia hereva henia idia dekenai, ia gwau, “Siahu ibounai guba dekenai bona tanobada dekenai be lau dekenai ia henia vadaeni.

MATAIO 8:20

Iesu ia haere, ia gwau, “Uda sisia be mai edia nadi matuna, bona ataiai manudia danu mai edia ruma, to Taunimanima ena Natuna be mai ena mahuta gabuna lasi.”

MAREKO 13:26

Unai neganai Taunimanima ena Natuna do idia itaia, ori latanai do ia mai, mai siahu bada, mai hairai bada danu.

LUKA 21:27

Vadaeni tanobada taudia idia ese Taunimanima ena Natuna do idia itaia, ori ena latanai do ia mai, mai ena siahu bada, bona mai ena hairaina danu.

LUKA 21:36

Unai dainai, do umui naria, bona nega ibounai do umui guriguri, vadaeni inai dika ibounai dekena amo do umui heau mauri, vadaeni Taunimanima ena Natuna ena vairana dekenai do umui gini.”

LUKA 24:27

Vadaeni Mose bona peroveta taudia edia buka dekenai, iena sivarai herevadia ibounai edia anina, be Iesu ese idia dekenai ia hadibaia.

IOANE 12:34

Vadaeni taunimanima momo idia haere ia dekenai, idia gwau, “Ai be Dirava ena taravatu hereva dekena amo ai kamonai vadaeni, Keriso be do ia noho hanaihanai. Badina dahaka oi gwau Taunimanima ena Natuna be do idia abia isi? Inai Taunimanima ena Natuna be daika?”

IOANE 3:13

Tau ta lasi guba dekenai ia daekau vadaeni, guba dekena amo ia diho Tauna sibona, Taunimanima ena Natuna unai, iena noho gabuna be guba.”

IOANE 5:27

Bona siahu danu ia henia vadaeni, kota henia gaukara do ia karaia, badina ia be Taunimanima ena Natuna.

APOSETOLO EDIA KARA 7:56

Bona ia gwau, “Inai, lau itaia guba ia kehoa, Taunimanima ena Natuna danu lau itaia, Dirava ena idiba kahanai ia gini noho!”

1 TESALONIKA 4:17

Unai murinai ita mauri noho taudia, be unai mase guna taudia danu do ita daekau lao ataiai, guba ena ori edia latanai, Lohiabada danu do ita hedavari totona. Vadaeni Lohiabada danu do ita noho hebou ela bona hanaihanai.

1 TIMOTEO 6:16

Ia sibona ia mase diba lasi, ia sibona diaridiari bada dekenai ia noho, bona ia kahirakahira ita lao diba lasi. Tau ta lasi ese Dirava ia itaia vadaeni, bona ta ese vaira neganai do ia itaia diba lasi. Iena ladana badana do ita matauraia, badina iena siahu do ia noho, ela bona hanaihanai. Amen.

HEBERU 2:14

Inai iena natuna taudia be taunimanima sibona, mai tauanina bona rara. Unai dainai Iesu danu ese idia edia tauanina toana ia abia, idia hegeregerena ia halaoa. Inai bamona ia karaia, do ia mase diba totona. Bona iena mase dekena amo, Iesu ese mase ia biagua tauna, Satani ena siahu ia hadikaia ore diba.

HEBERU 9:24

Ita diba, Keriso ese, taunimanima ese idia karaia Helaga Gabuna dekenai ia raka vareai lasi. Unai be guba gauna ena laulau sibona. Lasi, to Keriso ese maoromaoro guba dekenai ia raka vareai. Unuseni Dirava ena vairanai, ita durua totona ia gaukara noho.

APOKALUPO 1:13

Lamepa edia huanai tau ta ia gini, iena toana be Taunimanima ena Natuna bamona. Iena dabua be lata, ela bona iena aena dekenai, bona iena kemena be golo beleta ese ia hagegea.

APOKALUPO 1:18

Lau be lau mauri noho. Guna be lau mase vadaeni, to harihari lau mauri noho, ma do lau noho ela bona hanaihanai. Mase ena ki, bona mase taudia edia gabu ena ki, be lauegu imana dekenai ia noho.

APOKALUPO 1:7

Umui itaia, ia be ori edia latanai ia mai noho. Taunimanima ibounai be momokani do idia itaia. Bona ia idia gwadaia taudia ese danu do idia itaia. Tanobada besedia ibounai be ia dainai do idia tai. Inai be momokani! Amen.

APOKALUPO 14:14

Lauegu matana lau negea lou, ori kurokurona ta lau itaia, bona ta, iena toana be Taunimanima ena Natuna bamona, be ori latanai ia helai. Iena kwarana dekenai be golo kwara gauna ia noho, bona iena imana dekenai be kaia badana ta mai matana ia dogoatao.