DANIELA 7:10 - Buka Helaga (Hiri Motu) 1993

¹⁰ “Unai Tau ena terona dekena amo be lahi ia mai, sinavai ena ranu bamona ia heau lao. Taunimanima momo herea ese unai Tau ena hesiai gaukara idia karaia, bona milioni momo ese iena vairana dekenai idia gini. Kota badana ena nega ia ginidae, bona buka danu idia kehoa.

DANIELA 7:10 Iomraidhean Croise

1 KING TAUDIA 22:19

Mikaia ma ia gwau, “Harihari Lohiabada ena hereva umui kamonai: Lohiabada be iena terona dekenai ia helai lau itaia, bona guba ena aneru ibounai iena badinai idia gini noho, idiba kahanai bona lauri kahanai danu.

2 SIVARAI 18:18

Mikaia ma ia gwau, “Harihari Lohiabada ena hereva umui kamonai: Lohiabada be iena terona dekenai ia helai, lau itaia, bona guba ena aneru ibounai iena badibadinai idia gini noho, idiba kahanai, bona lauri kahanai danu.

IOBU 25:3

Tau ta ese, Dirava ena tuari anerudia ia duahia diba, a? Tau ta ena latanai, be Dirava ena diari ia kamokau lasi, a?

SALAMO 103:21

Lohiabada ena hesiai taudia, guba dekenai umui noho, bona Lohiabada ena ura umui karaia noho. Umui ese Lohiabada ena ladana do umui abia isi.

SALAMO 18:8

Iena udubaubauna dekena amo, kwalahu ia daekau lao. Lahi ena siahu, be iena uduna dekena amo ia mai, lahi ena hururuhururu bada herea.

SALAMO 50:3

Iseda Dirava ia mai noho, bona mai regena danu do ia mai. Iena vairana dekenai lahi ena hururuhururu do ia noho, bona lai guba badana ese, Dirava do ia hagegea noho.

SALAMO 68:17

Lohiabada be Sinai Ororo dekena amo, iena helaga gabuna dekenai ia mai, mai ena kariota goadadia momo herea danu.

ISAIA 30:27

Umui itaia, Lohiabada ena Ladana be daudau dekena amo ia mai noho. Lahi bona kwalahu bada ese, Lohiabada ena badu idia hedinaraia noho. Lohiabada ena uduna ena hereva ese, lahi bamona gau ibounai idia gabua ore diba.

ISAIA 30:33

Badina be idaunegai, lahi gabuna idia abia hegaegae, unuseni Asuria ena king do idia gabua ore totona. Inai lahi gabu be dobu bona ena lababa be bada, bona au rakuraku momo dekenai idia hahonua vadaeni. Lohiabada ese unai gabu dekenai do ia laga, lahi hururuhururu do ia siaia, bona do ia gabua ore.

DANIELA 12:1

Ma dabua aukana ia karaia tauna ia gwau, “Unai neganai Mikaela do ia toreisi. Ia be lohia aneru badana, oiemu bese taudia ia gimaia tauna. Unai neganai nega dika bada herea do ia vara. Matamana negana ia mai bona hari ia lao bona unai nega, be nega dika ta unai bamona do ia vara lasi. Bona unai neganai, oiemu bese taudia ese mauri do idia davaria, Dirava ena buka lalonai edia ladana idia torea vadaeni taudia ibounai.

DANIELA 7:22

“Mauri Noho Hanaihanai Tauna ia mai, bona ia ese kota ia karaia, iena kota hereva ese Ataiai Momokani Dirava ena helaga taudia ia durudia. Nega ia ginidae vadaeni, Dirava ena helaga taudia ese basileia do idia abia.

DANIELA 7:26

“ ‘To unai neganai guba ena kota Biaguna Badana ese iena kota do ia hamatamaia, bona unai king ena siahu do ia kokia momokani.

SEKARAIA 14:5

Inai parara gabuna, unai ororo ena kahana rua edia huanai ia noho koura, dekena amo do umui heau mauri. Umui be do umui heau, tano mareremarere neganai emui sene taudia idia heau bamona, king Usaia ese Iuda ia gunalaia neganai. Vadaeni Lohiabada, lauegu Dirava be do ia mai. Iena aneru helagadia ibounai be ia danu do idia mai.

MATAIO 25:31

“Taunimanima ena Natuna be mai ena hairai danu do ia mai, mai ena aneru helagadia danu, ena terona namo herea momokani latanai do ia helai.

DEUTERONOMI 33:2

Lohiabada be Sinai dekena amo ia mai. Edoma ena ataiai dekena amo, dina bamona ia toreisi. Parana Ororo dekena amo ia diaridiari. Mai ena aneru momo momo herea danu ia mai. Taravatu be lahi bamona, iena imana idibana dekenai.

HEBERU 1:14

Badina be aneru ibounai be Dirava ena hesiai gaukara laumadia, ani? Dirava ese idia ia siaia lao, mauri do idia abia taudia durua totona.

HEBERU 12:22

Unai bamona gari gaudia be umui dekenai idia ginidae lasi, ani? To umui be Siona Ororo kahirakahira umui ginidae vadaeni. Inai be Dirava ena hanua badana, mauri gabuna. Inai gabu ena ladana be Ierusalema, guba dekenai. Inai gabu lalonai, aneru momo herea momokani idia noho hebou.

IUDA 1:14

Enoka be tau namba 7 Adamu ena murinai ia vara. Ia ese inai tau dikadia totona peroveta hereva ia gwauraia, ia gwau, “Lohiabada do ia mai, bona iena aneru helagadia momo herea be ia danu do idia hedinarai.

APOKALUPO 11:18

Dirava diba lasi taudia idia badu dikadika, badina be oiemu badu ena nega ia ginidae vadaeni. Mase taudia edia kota henia nega danu ia ginidae vadaeni. Oiemu hesiai taudia, peroveta taudia, be harihari edia davana namona do oi henia. Oi dekenai idia gari henia taudia ibounai, badadia bona maragidia, edia davana namona do oi henia ena nega danu, be ia ginidae vadaeni. Harihari be tanobada idia hadikaia vadaeni taudia do oi alaia ore.”

APOKALUPO 5:11

Vadaeni, egu matana lau negea, bona aneru momo herea edia gadona lau kamonai. Idia ese helai gabuna badana, mauri gaudia, bona badana taudia idia gini hagegea. Edia momo be duahia diba lasi, milioni bona milioni.