DANIELA 4:19 - Buka Helaga (Hiri Motu) 1993

¹⁹ Vadaeni Daniela, iena ladana ta be Belitisasa, be hoa bamona ia noho hora ta, bona ia laloa momo danu. Gabeai king ese ia hereva henia, ia gwau, “Belitisasa e, inai nihi bona ena anina dekenai oi gari lasi.” Belitisasa ia haere, ia gwau, “King badana e, inai nihi bona ena anina be oi dekenai idia tuari taudia dekenai ia lao be namo. Oi dekenai ia lao be dika.

DANIELA 4:19 Iomraidhean Croise

DANIELA 8:27

Vadaeni lau Daniela, gari dainai lau mase bamona, bona lau gorere dina haida. Gabeai lau toreisi, vadaeni king ese lau ia henia gaukara ma lau karaia lou. Unai mata hanai dekenai lau hoa, mai laloa daradara danu, to iena anina be lau davaria lasi.

DANIELA 7:28

“Hereva ena dokona be inai. Lau, Daniela, gari bada ese lau ia abia dainai, lauegu vairana ena toana ia idau, to egu lalona dekenai inai hereva lau dogoatao noho.”

DANIELA 4:24

“King e, unai nihi ena anina be inai: Ataiai Momokani Dirava ese ia siaia herevana be inai, ia gwau:

IEREMIA 4:19

Hisihisi bada! Inai hisihisi ena metau, be lau huaia diba lasi! Egu kudouna e! Egu kudouna ia gari! Unai dainai ia marere haraga noho, mai hisihisi danu! Lau ese egu uduna hereva lau koua diba lasi, badina be kibi edia regena lau kamonai noho, bona tuari taudia edia boiboi danu.

1 SAMUELA 3:17

Eli ia gwau, “Lohiabada ese oi dekenai dahaka ia hamaoroa? Lau dekena amo gau ta do hunia lasi. Bema iena hereva ta lau dekena amo oi hunia neganai, Dirava ese davana oi dekenai do ia henia, bona do ia habadaia.”

HABAKUKU 3:10

Ororo ese oi idia itaia neganai idia mareremarere. Guba dekena amo ranu bada ia bubua diho. Tano henunai ena ranu idia boiboi, ma unai ranu ia pou, ia daekau ataiai, guba dekenai.

DANIELA 7:15

“Unai mata hanai, lau itaia gauna dekenai lau hoa bona lau laloa hekwarahi dikadika.

DANIELA 5:12

“Inai tau ena aonega be idau, bona nihi edia anina hedinaraia ia diba momo, bona hunia gaudia bona hereva aukadia ia gwauraia diba. Namona be hereva oi siaia, inai tau, Daniela, oiemu tamana ese iena ladana ia atoa Belitisasa, do ia mai. Inai Daniela ese inai hereva ena anina oi dekenai do ia hamaoroa.”

DANIELA 2:26

Vadaeni king ese Daniela, iena ladana ta danu be Belitisasa, ia hereva henia, ia gwau, “Lauegu nihi bona nihi ena anina lau dekenai oi hadibaia diba, a?”

DANIELA 1:7

Hesiai tauna badana ese idia ta ta dekenai ladana matamata ia henia, ladana inai, Belitisasa, Sataraka, Misaka bona Abetenigo.

IEREMIA 29:7

“Unai hanua, lau ese umui lau siaia lao, hesiai gaukara do umui karaia totona hanua, ena namo do umui tahua, bona Lohiabada dekenai do umui guriguri, unai hanua taudia dainai. Badina be bema idia ese namo idia davaria neganai, umui danu ese namo do umui davaria.

1 KING TAUDIA 18:7

Obadaia be dala dekenai ia raka neganai, Elia ese ia davaria. Vadaeni Obadaia be ia diba Elia, bona ia tui diho tano dekenai, ia gwau, “Elia e, unai be oi, a?”

1 SAMUELA 26:15

Davida ese Abinere ia gwau henia, ia gwau, “Oi be tau lasi, a? Daika be oi hegeregerena Israela dekenai? Badina dahaka oi ese oiemu lohia bona oiemu king oi gimaia lasi? Badina be tau ta be harihari, oiemu kamepa dekenai ia raka vareai oiemu biaguna do ia alaia totona.

1 SAMUELA 24:8

Gabeai Davida danu ia toreisi, nadi ena matuna dekena amo ia raka, Saulo dekenai ia boiboi, ia gwau, “King e, lauegu lohia!” Saulo ese iena vairana ia giroa, vadaeni Davida be ia tui diho, iena vairana be tano dekenai ia atoa diho, ia tomadiho.

1 SAMUELA 1:15

To Hana ia haere, ia gwau, “Lohia e, lau be kekero lasi. Lau be lalohisihisi bada hahinena. Uaina o kekero muramura ta lau inua lasi, to lauegu lalohisihisi Lohiabada ena vairana dekenai lau gwauraia noho.

ESODO 32:32

Mani emu kara edia kara dika do oi gwauatao. To bema lasi, lauegu ladana, oi ese oi torea bukana dekena amo do oi kokia.”

GENESE 32:18

Vadaeni, do oi haere henia, oi gwau, ‘Inai be oiemu hesiai tauna Iakobo ena. Iena harihari gaudia ia siaia, lauegu biaguna Esau ena. Iakobo danu aiemai murina dekenai ia mai noho.’ ”

GENESE 31:35

Vadaeni Rahela ese iena tamana dekenai ia hereva henia, ia gwau, “Tau badana e, oi badu lasi lau dekenai, oiemu vairana dekenai lau toreisi lasi, badina be hahine aiemai hua gorere lau abia dainai.” Unai dainai ia tahua mai hekwarahi danu, iena dirava edia laulauna ia davaria lasi.

GENESE 40:12

Bona Iosepa ia gwau, “Oiemu nihi ena anina be inai: Vain ena rigi toi be dina toi.

DANIELA 2:37

“King e, oi be king bada hereana ta, badina be guba ena Dirava ese basileia bona siahu bona goada bona hairai oi dekenai ia henia vadaeni.

DANIELA 5:18

“King e, Ataiai Momokani Dirava ese oiemu tamana Nebukanesa ia abia isi, ia be king badana, mai ena siahu bada danu. Hairai bona mataurai danu Dirava ese ia henia ia dekenai.

DANIELA 5:19

“Unai mataurai ia henia dainai bese bona gado ibounai taudia ese oiemu tamana dekenai idia gari henia, bona iena vairana dekenai idia heudeheude. Bema ia ura tau ta ia alaia, be ia alaia, bema ia ura tau ta ia mauri noho, be ia ese dala ia karaia. Iena ura hegeregere ia ese tau ta ia abia isi, o tau ta ia atoa diho.