DANIELA 2:4 - Buka Helaga (Hiri Motu) 1993

⁴ Vadaeni unai meamea taudia ese Aramia gado dekenai king dekenai idia haere, idia gwau, “King badana e, do oi noho hanaihanai! Inai nihi do oi hamaoroa ai dekenai, vadaeni iena anina do ai hamaoroa oi dekenai.”

DANIELA 2:4 Iomraidhean Croise

GENESE 31:47

Vadaeni Labana ese unai gabu ena ladana ia atoa, Iegara Sahaduta, bona Iakobo ese unai gabu ena ladana ia atoa Galeda, ladana ruaosi edia anina be “Hereva hedinaraia nadi”.

GENESE 41:8

Daba ia rere, iena kudouna ia gari dikadika. Vadaeni iena hereva ia siaia lao, Aigupito dekenai puripuri taudia ibounai bona aonega taudia ibounai ia boiridia. Vadaeni Farao ese iena nihi idia dekenai ia hamaoroa, to idia ibounai be nihi edia anina idia gwauraia diba lasi.

1 KING TAUDIA 1:25

Badina ia be hari dina dekenai ia lao, boromakau bona ubua gaudia, bona mamoe momo herea boubou patana dekenai ia henia. Bona king ena natuna ibounai, bona tuari biaguna Ioaba, bona hahelagaia tauna Abiatara be ia boiria vadaeni. Bona harihari idia be Adonaisa ena vairanai idia aniani bona inuinu noho, idia gwau, ‘King Adonaisa ena mauri do ia daudau!’

1 KING TAUDIA 1:31

Vadaeni Bataseba ia tui diho, iena vairana be tano dekenai ia atoa, king ena vairana dekenai, bona ia gwau, “Lauegu lohia, king Davida e, do oi mauri ela bona hanaihanai.”

2 KING TAUDIA 18:26

Vadaeni Eliakimi Hilekaia bona Sebina bona Ioa ese Rabesake dekenai idia hereva, idia gwau, “Mani emu kara Suria gado dekena amo ai dekenai do oi hereva. Ai be unai gado ai diba. Heberu gado oi hereva lasi, magu dekenai idia helai taudia idia kamonai garina.”

ESERA 4:7

Ma danu, Aratasaseta be Parasa ena king neganai, Bisilama bona Miteredata bona Tabele, mai edia bamona taudia ese samania pepa ta king dekenai idia torea. Inai revareva be Arama ena revareva bona gado dekenai idia torea.

NEHEMIA 2:3

vadaeni lau haere, lau gwau, “King do ia mauri hanaihanai! Lalohisihisi ena toana lau dekenai ia noho, ena badina be lauegu sene taudia edia guria gabuna ena hanua be ia dika, bona iena magu ena iduara bona ikoukou be lahi ese ia araia ore vadaeni.”

ISAIA 36:11

Vadaeni Eliakimi Hilekaia bona Sebina bona Ioa ese Rabesake idia hereva henia, idia gwau, “Mani emu kara Suria gado dekena amo ai dekenai do oi hereva. Ai be unai gado ai diba. Heberu gado oi hereva lasi, magu dekenai idia helai taudia idia kamonai garina.”

ISAIA 44:25

Lau ese peroveta koikoi taudia, edia hereva lau koua noho, bona meamea dika taudia dekenai, laloa kavakava lau henia. Aonega taudia edia hereva, be lau ese lau negea, bona edia aonega be kavakava dekenai lau halaoa noho.

DANIELA 1:4

Edia kopina be do ia namo, bona edia tauanina, bona edia toana be do idia dika lasi momokani. Idia be diba momo taudia, bona aonega davaria haraga diba taudia, vadaeni king ena ruma badana dekenai do idia gaukara.” Ma king Nebukanesa ese Asipenasa ia hamaoroa ia ese Babulonia gado be unai uhau dekenai do ia hadibaia.

DANIELA 2:7

Idia haere lou king dekenai, “King badana e, bema unai nihi oi hamaoroa ai dekenai, ai ese iena anina do ai hadibaia diba.”

DANIELA 3:9

Nebukanesa dekenai idia hereva, idia gwau, “King badana e, oi noho hanaihanai.

DANIELA 4:19

Vadaeni Daniela, iena ladana ta be Belitisasa, be hoa bamona ia noho hora ta, bona ia laloa momo danu. Gabeai king ese ia hereva henia, ia gwau, “Belitisasa e, inai nihi bona ena anina dekenai oi gari lasi.” Belitisasa ia haere, ia gwau, “King badana e, inai nihi bona ena anina be oi dekenai idia tuari taudia dekenai ia lao be namo. Oi dekenai ia lao be dika.

DANIELA 4:7

Vadaeni meamea taudia, bona hoa karaia taudia bona vaira neganai dahaka do idia vara gaudia idia diba taudia, bona toa edia anina hedinaraia taudia idia mai. Lauegu nihi lau hamaorodia, to ena anina be idia gwauraia diba lasi.

DANIELA 4:9

‘Belitisasa e, oi be meamea taudia edia lohia, badina lau diba dirava helagadia edia lauma ia noho oi dekenai. Hunia gauna ta be ia auka lasi oi dekenai. Lauegu nihi dekenai lau itaia gaudia bona iena anina danu mani oi gwauraia, gauna inai:

DANIELA 5:10

Unai neganai kwini ese aria rumana dekenai ia raka vareai, badina be king bona iena lohia taudia edia hereva idia habadaia regena ia kamonai dainai. Vadaeni kwini ia gwau, “Egu lohia e, oi noho hanaihanai! Oi gari lasi, bona oiemu vairana ena toana oi haidaua lasi.

DANIELA 5:8

Vadaeni king ena aonega taudia ibounai idia mai, to unai toretore bona iena anina be idia hamaoroa diba lasi.

DANIELA 6:21

Daniela ia haere, ia gwau, “Egu king, oi mauri hanaihanai!

DANIELA 6:6

Unai dainai idia lao king dekenai, idia gwau, “King Dariuse e, oi noho hanaihanai be namo.

DANIELA 6:7

Ai inai, oiemu gavamani ena gaukara taudia ibounai, gavana taudia bona durua taudia, bona lohia taudia badadia bona maragidia, be laloa tamona ai abia, ai ura oi ese taravatu ta oi karaia, bona oi ha-aukaia momokani. Inai bamona: Dina 30 lalonai be tau ta ese gau ta do ia noia lasi dirava ta dekenai, o tau ta dekenai, to oi dekenai sibona do ia noia. Bema tau ta ese inai hereva ia utua, be do idia negea laiona ena guri dekenai.

MATAIO 21:9

Vadaeni taunimanima momo, Iesu vairanai idia raka taudia bona iena murinai idia raka taudia danu idia boiboi, idia gwau, “Hosana, Davida ena natuna e! Lohiabada ena ladanai ia mai noho tauna ita hanamoa. Ataiai momokani ia noho Dirava dekenai, hosana!”

1 SAMUELA 10:24

Vadaeni Samuela ese taunimanima ibounai ia hamaoroa, ia gwau, “Lohiabada ese ia abia hidi tauna umui itaia, a? Taunimanima ibounai edia huanai ia be namo herea momokani, ani?” Bona idia haboua taudia ibounai idia boiboi, idia gwau, “King be nega daudau do ia mauri noho!”